Indishyi: Ubufaransa bugiye guha USA miliyoni 60, Amaherezo ONU nayo izishyura abanyarwanda bishwe na FPR kukagambane kayo !

Publié le 5 décembre 2014 par veritas

Iyi ni imirambo y'abari mu nkambi i Kibeho bishwe na FPR ku kagambane k'ingabo za ONU (minuar) zari zirinze iyo nkambi!

Mu gihe cy'intambara ya kabiri y'isi yose (1940-1945), Adolph Hitler wari uyoboye igihugu cy'Ubudage yigaruriye igihugu cy'u Bufaransa, ategeka sosiyete y'abafaransa itwara abantu muri gare ya Moshi yitwa SNCF kujya itwara abayahudi ihawe ingabo z'u Budage kugira ngo bajyanwe mu nkambi bagombaga kwicirwamo n'ingabo za Hitler. Muri abo bajyanwe mu nkambi harimo abayahudi bafite ubwenegihugu bw'abanyamerika , none bibaye ngombwa ko igihugu cy'u Bufaransa cyiyemeje huga igihugu cy'Amerika miliyoni 60 z'amayero nk'indishyi y'akababaro z'abo banyamerika bishwe!

Iki gikorwa kibaye nyuma y'imyaka hafi 70 Hitler atsinzwe ariko amaherezo u Bufaransa butanze indishyi z'akababaro kandi nabwo bwari bwarigaruriwe n'u Budage! Iyi nkuru ihita yibutsa abanyarwanda n'abanyamahanga uburyo abanyarwanda batagira ingano biciwe mu nkambi y'i Kibeho (Gikongoro) n'ingabo za FPR- Inkotanyi ku itegeko zahawe na Paul Kagame kandi iyo nkambi ikaba yari irinzwe n'ingabo z'umuryango w'abibumbye MINUAR! Birumvikana ko atari Paul Kagame wahindukira ngo ajye kwaka indishyi z'akababaro ONU z'abo yishe, ahubwo mu gihe u Rwanda ruzaba rufite ubundi buyobozi butari ubwa FPR iyo dosiye izabyuka !

Ntabwo ari Kibeho gusa impunzi z'abanyarwanda zishwe ku kagambane ka ONU, kuko mu gihugu cya Congo (Ex-Zaïre) hari inkambi nyinshi z'abanyarwanda kandi zicunzwe n'umuryango w'abibumbye binyuze mu ishami ryawo ryitwa UNHCR, izo mpunzi hafi ya zose Paul Kagame yarazishe kandi ntacyo umuryango w'abibumbye wakoze ngo umubuze gukora ubwo bwicanyi (1996-kugeza ubu)! Amategeko mpuzamahanga avuga ko iyo udatabaye umuntu uri mu kaga, uba ubaye umufatanyacyaha cyangwa icyitso cy'umunyacyaha. Sibyo gusa kuko muri raporo mapping hagaragaramo ibimenyetso by'uko UNHCR yabaye icyitso cy'abicanyi ba Kagame, abakozi bayo bakajya guhamagara impunzi aho zihishe mu mashyamba ngo bagiye kuziha ibyo kurya, bamara kuzegeranya bagatungira agatoki inkotanyi zigatsemba izo mpunzi!

Ibyo byaha bikomeye nibyo Paul Kagame yasangiye n'umuryango mpuzamahanga ONU mu kurimbura abanyarwanda akaba ariyo mpamvu uwo muryango n'ibihugu bikomeye biwushamikiyeho bikomeza gukingira ikibaba Paul Kagame na FPR, ariko burya ngo "Iminsi ntimujya inama", bitinde bitebuke Paul Kagame na FPR bazabazwa ubwicanyi bakoze na ONU itange impozamarira ku gihugu cy'u Rwanda kubera kuba icyitso cy'abicanyi ruharwa yakoranye nabo ibizi kandi ibishaka! Uko abayahudi b'abanyamerika mu Bufaransa bashyirwaga muri gareyamoshi za SNCF bagiye kwicwa niko UNHCR yashyiraga impunzi z'abanyarwanda muri gareyamoshi muri Congo ngo bazegeranye inkotanyi zibone uko zica izo mpunzi nk'uko amashusho yombi abyerekana (iyo hejuru ni mu Bufaransa ,iyo hasi ni muri Congo)!

Ntabwo nyuma y'imyaka 70 u Bufaransa bwatanga impozamarira ku banyamerika bo mu bwoko bw'abayahudi batwawe na gareyamoshi za SNCF ngo ONU izasimbuke amahano y'ubwicanyi bwakozwe na Paul Kagame kubanyarwanda bari mu nkambi zirinzwe n'ingabo za ONU!

Byose tugomba kubitega igihe!

Ubwanditsi.