Congo yashyikirije u Rwanda Capitaine Jean Paul Renzaho wafatiwe mu bikorwa by'ubutasi!
Intasi Capitaine Jean Paul Renzaho
Amakuru atangazwa n’ibitangazamakuru bitandukanye byo muri Congo no mu Rwanda, aravuga ko kuwa Gatanu w’icyumweru gishize tariki ya 5 Ukuboza aribwo igisirikare cya Kongo Kinshasa cyashyikirije u Rwanda umusirikare warwo ufite ipeti rya Capitaine wafatiwe ku butaka bwa Congo ari mu bikorwa by’ubutasi, ibi bikaba bishimangira ko abacengezi b’inkotanyi bakomeje kwinjira muri Congo mu mugambi wo kujya kwica impunzi z’abanyarwanda ziri muri icyo gihugu!
Uwo musilikare mukuru w’inkotanyi wafatiwe muri Congo ni Capitaine Jean-Paul Renzaho, akaba asanzwe akorera ingabo z’inkotanyi mu kigo cya gisirikare cya Bigogwe, yafashwe ku italiki ya 5 Nzeri 2014 afatiwe muri Kivu y’Amajyaruguru. Avuga kandi ko mu gufatwa kwe Jean-Paul Renzaho, yagaragaje ikarita y’uko ari musivile mu rwego rwo guhisha izindi karita yari afite harimo iyerekana ko ari umusirikare w’u Rwanda ufite ipeti rya Kapiteni, akaba akorera mu kigo cya gisirikare cya Bigogwe .
Ibinyamakuru byo muri Congo bivuga ko amakuru kuri uwo musilikare w’intasi z’ingabo za Kagame ziyakesha inyandiko mvugo yakozwe na commandant wa Région militaire ya 34 mu ngabo za Kongo Kinshasa, Emmanuel Lombe Bangwangu, iyo nyandiko ikaba yashyikirijwe uhagarariye itsinda rihuriwemo n’ingabo zo mu bihugu bigize inama yaguye y’akarere k’ibiyaga bigari “ICGLR” rishinzwe kugenzura imipaka y’u Rwanda na Repubulika iharanira Demokarasi ya Congo (EJVM).
colonel Léon Mahoungou uhagarariye itsinda rya EJVM nawe akaba yaremeje aya makuru yo gushyikiriza u Rwanda capitaine Renzaho wari umaze amezi atatu mu maboko y’ingabo za Kongo Kinshasa, ndetse aboneraho kwibutsa ko nta musirikare w’u Rwanda ugomba kwambuka umupaka uruhuza na Kongo agendera ku byangombwa bitaribyo.
Ubwanditsi