Rwanda: Umutangabuhamya mushya ku ihanurwa ry'indege yashimuswe n'abantu batazwi!
Publicité
Kuwa kane taliki ya 13/11/2014 mu masaha yegereje saa sita z'ijoro nibwo Emile Gafirita wagombaga gutanga ubuhamya ku ihanurwa ry'indege yari itwaye perezida Habyarimana Juvénal na Perezida Ntaryamira Cyprien w'u Burundi taliki ya 06/04/1994 yashimuswe n'abantu batazwi ari hafi y'urugo rwe.
Abacamanza b'Abafaransa Marc Tréviduc na Nathalie Poux bashinzwe gukora iperereza kuri iryo hanurwa ry'indege bongeye gufungura iryo perereza n'ubwo bavugaga ko bari bararirangije bitewe ni uko babonye abandi batangabuhamya bashya; abo bacamanza, bakaba bari biteguye mu minsi ya vuba kwakira ubuhamya bushya bwa Emile Gafirita wari utuye mu gihugu cya Kenya ari naho yashimutiwe kuri iryo hanurwa ry'indege.
Nk'uko ababibonye babibwiye radiyo mpuzamahanga y'abafaransa RFI dukesha iyi nkuru; abo batangabuhamya bari mu mujyi wa Nayirobi umurwa mukuru wa Kenya ari nawo Emile Gafirita yashimutiwemo, babonye abagabo babiri baje bihuta bafata Emile Gafirita bamushyiramo amapingu bamutegeka kwinjira mu modoka yabo ku ngufu, kuva ubwo nta muntu uramenya irengero rye!
Polisi y'igihugu cya Kenya ivugako itigeze ihagarika Emile Gafirita kandi ikaba itazi aho aherereye kimwe n'uko itaramenya abamushimuse ubu ikaba iri gukora iperereza ryo kumushakisha!
Iyi nkuru tuyikesha RFI