RD Congo: Abacamanza bemeje ko Félix Tshisekedi ariwe watorewe umwanya wa Perezida!
Mu ijoro ryo kuwa gatandatu rishyira ku cyumweru taliki ya 20/01/2019 nibwo abacamanza b'urukiko rurinda itegeko nshinga muri Repubulika Iharanira Demokarasi ya Congo batangaje ko Félix Tshisekedi ariwe watorewe umwanya wo kuba umukuru w'igihugu mu itora ryo kuwa 30/12/2018, Tshisekedi akaba abaye umuperezida wa gatanu kuva Congo yabona ubwigenge mu mwaka w'1960.
Nyuma yo gusuzuma ibirego byatanzwe n'umukandida Martin Fayulu, urukiko rwasanze ibirego yatanze bifite ishingiro ariko akaba atarashoboye gutanga ibimenyetso bigaragaza ko yibwe amajwi. Urukiko rwasanze impapuro zerekana uko amajwi yagiye aturuka mu biro by'amatora zatanzwe na komisiyo y'amatora (céni) zuzuye, naho izatanzwe na kiliziya gatolika zikaba zituzuye. Félix Tshisekedi ufite imyaka 55 akaba asimbuye Joséph Kabila batavugaga rumwe ku mwanya wa perezida kuburyo bunyuze mu nzira y'amahoro.
Abakurikiranira hafi politiki yo mu karere k'ibiyaga bigari basanga urukiko rurinda itegeko nshinga rwa Congo rwarihutiye gutangaza umwanzuro w'amajwi yavuye mu matora bitewe ni uko Paul Kagame yari amaze kuvuga ko kuwa mbere azajya i Kinshasa ari kumwe na bamwe mu bakuru b'ibihugu by'Afurika bahuriye mu nama muri Etiyopiya kujya gusaba Congo kongerera kubarura amajwi yavuye mu matora!
Yishingikirije umwanya afite wo kuyobora umuryango w'Ubumwe bw'Afurika, Paul Kagame yatumije inama y'abakuru b'igihugu 10 gusa maze bafata umwanzuro mu izina ry'umuryango w'ubumwe bw'Afurika UA wo gusaba urukiko rw'igihugu cya Congo ko kitagomba gutangaza izina ry'uwatsinze amatora, ibyo bakaba barabivuze bamaze kunenga ko amajwi y'agateganyo yatangajwe na komisiyo y'amatora ya Congo afifitse! Ku mbuga nkoranyambaga hahise hagaragara abantu benshi bagaye iki cyemezo cya Kagame, bakabavuga ko ibyo abo bakuru b'ibihugu bavuze ari ibyifuzo by'abazungu kandi ko bibangamiye ubusugire bw'igihugu cya Congo. Umunyamabanga mukuru w'umuryango w'abibumbye ONU yahise yamagana icyo cyemezo cya Kagame amusaba kubaha ubucamanza bwa Congo.

Biteganyijwe ko Félix Tshisekedi azarahirira imirimo ye mishya nk'umukuru w'igihugu kuwa kabiri taliki ya 22/01/2019. Niba Kagame, Museveni na Sassou Nguesso biyemeje kuzajya i Kinshasa kuwa mbere taliki ya 21/01/2019 ubwo bazakirwa na Perezida Mushya Félix Tshisekedi. Abantu benshi ku mbuga nkoranyambaga banenze ku buryo bukomeye uburyo Kagame (Rwanda), Museveni (Uganda), Idriss Déby (Cadi) na Dénis Sassou Nguesso (Congo Brazza) bajya gutanga amasomo ya demokarasi muri Congo kandi abo bakuru b'ibihugu bose barahinduye itegeko nshinga mu bihugu byabo kugirango bazapfire ku butegetsi, bakaba bakora amatora afifitse ndetse bagahohotera n'abanyepolitiki batavuga rumwe nabo mu bihugu byabo.
Abo bakuru b'ihugu bayobowe n'umunyagitugu w'umwicanyi Paul Kagame bakaba bakoreshwa n'abazungu mu bikorwa byo guhungabanya umutekano w'ibihugu by'Afurika bityo abazungu bakaboneraho gusahura umutungo w'Afurika bitwaje akavuyo kaba katewe n'abo bagaragu babo!
Nyuma yo gutangaza Félix Tshisekedi nka perezida mushya wa RD Congo, hategerejwe uko abakongomani bazakira ubutegetsi bwe n'uburyo azakorana n'ibihugu by'amahanga bikomeye byagaragaje ko atatsinze amatora akaba yaribiwe amajwi.
Veritasinfo