Congo: Abasenyeri ba kiliziya Gatolika baremeza ko bazi izina ry'umukandida abaturage batoye nka perezida, bakaba basaba CENI gukoresha ukuri!

Inama nkuru y'abepiskopi Gatolika muri Congo (Conférence épiscopale congolaise) yemeje kuri uyu wa kane taliki ya 3/01/2019 ko izi izina ry'umukandida watsinze itora ry'umukuru w'igihugu muri Repubulika Iharanira Demokarasi ya Congo. Abasenyeri bagize urwo rwego rukuru rwa kiliziya muri Congo bakaba basaba komisiyo y'amatora muri icyo gihugu (céni) gutangaza amajwi yavuye mu itora ryo ku cyumweru taliki ya 30/12/2018 kandi iyo komisiyo igatangaza imibare y'amajwi binyuze "mu nzira y'ukuri n'ubutabera"!

Nkuko amakuru "veritasinfo" ikesha radiyo mpuzamahanga y'abanyamerika "VOA Afrique" abyemeza; intumwa zakurikiranye amatora zihagarariye inama nkuru y'abepiskopi Gatolika (Cenco) muri Congo zigira ziti:

"Tumaze kubona imibare yose y'amajwi yabaruwe ku biro by'itora binyuranye mu gihugu cyose, nk'uko byemezwa n'inyandiko-mvugo dufitiye kopi zashyizweho umukono n'abahagarariye ibiro by'itora mu gihugu hose, turemeza ko izina ry'umukandida watorewe umwanya wo kuba umukuru w'igihugu cya Congo turizi"!

Ibi bikaba byatangajwe n'umuvugizi w'inama nkuru y'abepiskopi gatolika muri Congo, uwo muvugizi w'iyo nama y'abepiskopi, akaba yasebye urwego rushinzwe amatora muri Congo arirwo bita "Céni", gufata icyemezo mu bubasha rufite, maze rugatangaza amajwi nyayo kuri buri mukandida yavuye mu biro by'itora  kandi urwo rwego rukabikora rwubahirije ukuri n'ubutabera nyabwo bujyanye n'imibare nyakuri y'amajwi yabaruwe muri buri biro byitora.

Kiliziya gatolika ya Congo ni urwego rufite ingufu mu gihugu kandi abaturage bose bakaba bemera ukuri kwayo, bishobora gukurura intambara ikomeye cyane mu gihugu cya Congo mu gihe urwego rushinzwe amatora rushobora gutangaza amajwi abakandida biyamamarije ku mwanya wa Perezida babonye atandukanye n'amajwi ashobora kuzatangazwa na kiliziya gatolika muri Congo.

Source: VOA Afrique