Umufaransa yirukanwe mu gihugu kuko yashyize hanze amakuru y'iperereza ku bwicanyi bw'ingabo za Kagame muri Centrafrique !

Publié le 1 juin 2018 par veritas

Umunyamategeko Juan Branco, yari umukandida wo kuba intumwa ya rubanda mu ishyaka rya Melenchon

"Ingeso mbi, nti rara bushyitsi koko!" Inkotanyi za Paul Kagame zishinjwa ibyaha by'ubwicanyi bukomeye zakoreye mu Rwanda, Zaïre (Congo) n'Uburundi, ariko umuryango w'abibumbye ukaba warakingiye ikibaba izo nkotanyi ntiwazigeza imbere y'ubutabera, ahubwo uzigororera kuziha akazi ko kujya kwica abaturage bo mu bindi bihugu! Kubera kuba imburagihana byatumye inkotanyi ziri mu mutwe wa ONU mu gihugu cya Centrafrique witwa "Minusca" zikora ubwicanyi bukomeye bw'abaturage b'icyo gihugu! Umuryango w'abibumbye ONU ukaba warashinze urukiko rudasanzwe rwo kuburanisha inkotanyi zagize uruhare muri ubwo bwicanyi. Nubwo bimeze gutyo ntabwo umwuka ari mwiza mu bakozi ba ONU muri Centrafrique bari gutegura imirimo y'ibanze y'urwego rw'umushinjacyaha mukuru kuko urwego rw'ingabo za Minusca rushaka kugenzura ubutabera!

Amakuru dukesha radiyo mpuzamahanga y'abafaransa "RFI", aremeza ko inzobere y'umufaransa mubyerekeranye n'amategeko mpuzamahanga "Bwana Juan Branco" yirukanywe ku kazi yakoraga, ndetse biba ngombwa ko ava mu gihugu cya Centrafrique igitaraganya kubera impamvu z'umutekano we kuko yashoboraga kwicwa! Bwana Juan yahawe akazi n'umuryango w'abibumbye muri Centrafrique kugirango afashe umushinjacyaha mukuru, imirimo yo gutangira iperereza ku byaha by'ubwicanyi bwakorewe abaturage, bityo ababigizemo uruhare bashyirizwe "urukiko mpanabyaha rudasanzwe" rwashyiriweho Centrafrique rwitwa CPS (Cour Pénale Spéciale) rugomba kubanisha ibyaha by'ubugome byakozwe muri icyo gihugu kuva mu mwaka w'2003.

Juan Branco akaba yari ashinzwe gutegura ingamba zidasanzwe zo gukurikirana abanyabyaha no gutegura gahunda y'ibikorwa by'umushinjacyaha mukuru. Ku buryo butunguranye, ubuyobozi bw'umutwe w'ingabo za ONU muri Centrafrique "Minusca" bukaba bwarafashe icyemezo cyo guhagarika Juan Branco ku mirimo ye ndetse ahita ategekwa kuva muri Centrafrique hutihuti. Ubuyobozi bwa "Minusca" buvuga ko bwafashe icyo cyemezo bitewe n'uko "Juan Branco" yakoresheje urubuga rwe rwa "Twitter" maze ashyiraho amakuru yashoboraga gutuma ashobora kugirirwa nabi ndetse bikagira n'ingaruka z'umutekano mucye kubakozi bose b'urukiko rudasanzwe mpanabyaha CPS! Bwana Juan Branco avuga ko kwirukanwa kwe ari ikimenyetso cy'uko ubutabera butazashobora kwigenga muri Centrafrique kubera igitutu buzakomeza kujya bushyirwaho na Minusca kandi ariyo ifite abantu bari gukorwaho iperereza ry'ibyaha bikomeye by'ubwicanyi bw'abaturage bakoze.

Hashize iminsi micye Bwana Juan Branco yanditse kurubuga rwe rwa "twitter" ubutumwa bwinshi buvuga ko ku italiki ya 10 Mata uyu mwaka, ingabo z'u Rwanda ziri mu mutwe wa ONU ushinzwe kugarura amahoro muri Centrafrique wa Minusca zishe abaturage ba Centrafrique barenga 30 bari batuye mu murwa mukuru wa "Bangui" mu gace kitwa PK5. Juan ntiyagarukiye aho kuko yatanze n'ibitekerezo bigaragaza ibibazo bikomeye byerekana ko ruriya rukiko mpanabyaha rudasanzwe CPS rutazashobora gucira imanza abasilikare b'abicanyi bari mu mutwe w'ingabo za ONU wa Minusca. Ibyo bitekerezo bya Juan Branco nibyo byamuviriyemo kwirukanwa ku mirimo yahawe na ONU bikozwe na Minusca ndetse akanirukanwa muri Centrafrique! Umuvugizi wa Minusca Vladimir Monteiro, avuga ko ibyo bitekerezo bya Juan byashoboraga kumukururira akaga ndetse bigateza n'umutekano mucye kubo bakorana!

Juan Branco we agaragaza ko Minusca yivanga mu butabera kandi icyemezo yafatiwe kikaba kinyuranye n'amategeko, akaba yariyemeje gushyikiriza ikirego inzego zibishinzwe kugira ngo arenganurwe.

Veritasinfo