Rwanda : Guterana amagambo ku muhango wo gutanga igihembo cya « Mo Ibrahim » i Kigali

Publié le 1 mai 2018 par veritas

Mo Ibrahim na Faustin Twagiramungu ntibavuga rumwe ku muhango wo gutangira icyo gihembo i Kigali

Umuryango « Mo Ibrahim » wahaye igihembo cyawo cy’imiyobonerere myiza uwahoze ari umuyobozi w’igihugu cya Liberiya « Madame Ellen Johnson Sirleaf. Iryo shimwe yariherewe mu muhango wabereye i Kigali mu Rwanda. Uko guhitamo aho uwo muhango wabereye byamaganwe n’uwigeze kuba ministre w’intewe w’u Rwanda ubu uba mu gihugu cy’amahanga. Yavuze ko yatewe impungenge n’uko icyo gihembo cy’imiyoborere myiza cyatanzwe hirengangijwe ibyaha bikomeye byakozwe na Perezida Paul Kagame.

Muri uyu mwaka, ku nshuro ya gatanu, kuva mu mwaka w’2007, Umuryango washinzwe n’umuherwe «Mo Ibrahim» watanze igihembo cyawo kitiriwe imiyoborere myiza muri Afurika. Uwo muryango wahembye uwahoze ari perezida w’igihugu cya Liberiya «Ellen Johnson Sirleaf », wavuye ku buyobozi bw’icyo gihugu amaze gukora manda ebyiri nk’uko itegeko-nshinga ry’icyo gihugu ribitegenya. Ariko guhabwa icyo gihembo bikaba byaravuzweho amagambo menshi. Kuruhande rumwe, ayo magambo akaba yaratewe n’uko Madame Ellen Johnson yijanditse mu byaha bya ruswa mu gihe yari umuyobozi w’icyo gihugu, kandi akaba yaragize uruhare mu buryo buziguye mu ntambara yabaye muri Liberiya. Kurundi ruhande kandi, amagambo menshi kuri icyo gihembo yatewe n’uko cyatangiwe mu Rwanda, aho prezida Kagame nawe aregwa ibyaha by’ubwicanyi no gutegekesha igitugu.

Umuherwe « Mo Ibrahim » asobanura impamvu yahisemo gutangira icyo gihembo mu Rwanda, yagize ati : «Ntabwo nemera ko Paul Kagame ari umuntu uteye ikibazo. Urwanda n’igihugu cy’Afurika gifite umwihariko, kuko gifite amateka yihariye. Urwanda rwateye intambwe ndende igana imbere. Impaka twakoze muri iki cyumweru zavugaga kuri iyo ntambwe yo kugeza ibikorwa byiza ku baturage. Icyo ni ikintu cy’ingenzi iyo uvuga imiyoborere myiza. Ntabwo nigeze mvuga ko u Rwanda ari ntamakemwa cyangwa se ko Kagame ari umutagatifu. Ariko ni ngombwa bombi kubakurira ingofero kubikorwa bagezeho ».

Ayo magambo yo kwifata Mo Ibrahim yavuze, ntabwo yanyuze uwigeze kuba ministre w’intebe w’u Rwanda uba hanze y’igihugu. Muri iki gihe Faustin Twagiramungu aba mu gihugu cy’Ububiligi ; yababajwe n’uko igihembo cy’uwo muryango cyatangiwe mu Rwanda. Kuri we, gutanga icyo gihembo bikaba ari ugushimangira ko igitugu n’ibyaha bikomeye byakozwe cyangwa byategetswe gukorwa na Paul Kagame ntashingiro bifite. Twagiramungu yagize ati :

« Ndatekerezako, nkurikije ibyo amaze kuvuga (ndlr : Mo Ibrahim), icyo gihembo kigomba kuvaho. Ntacyo kivuze mubyukuri. Giteye ishozi. Ntabwo ari igihembo cyo gushimira abantu bateje imbere demokarasi, habe na gato. Kugerageza kuvuga ko hari utubazo duto two kutubahiriza uburenganzira bwa muntu n’ubwa demokarasi, birenze ukwemera. Ibyo kandi ni ikimenyetso cy’uko uwo Muherwe yirengagiza burundu uburyo tubayeho cyangwa uburyo abaturage b’igihugu cyanjye babayeho. Abantu bari kwicwa n’inzara, abantu bari kwicwa n’indwara z’ubwoko bwinshi zo mukarere k’Afurika yo hagati. Muri iki gihe, mu Rwanda hari ivangura ry’abantu bapfuye. Hari jenoside yakorewe abatutsi, ntabwo abahutu bishwe na FPR bavugwa. Ibyo ntibivugwa na rimwe ».

Madame Ellen Johnson Sirleaf wayoboye igihugu cya Liberiya, abaye umwe mubakuru b’ibihugu bacyuye igihe bagahabwa igihembo n’umuryango « Mo Ibrahim » ; uwo muryango ukaba utarigeze ubona uwo uha icyo gihembo kuva mu mwaka w’2014.

Inkuru ya RFI yashyizwe mu kinyarwanda na « veritasinfo »

Kanda aha wumve uko Mo Ibrahim na Faustin Twagiramungu bavuga ku itangwa ry’iki gihembo.