Rwanda: Nyuma y'ikinamico ry'amatora, tugiye gukurikira umukino w'abayobozi b'abasazi!
Aba bombi babaye inshuti magara za USA
Nubwo igihugu cya Leta Zunze Ubumwe z'Amerika (USA) ari igihugu cy'igihangange ku isi; icyo gihugu gifite ibyago by'uko abaturage bacyo bibasirwa n'ibyihebe biba byarahawe imyitozo n'ubushobozi n'igihugu cyabo cya USA. Urugero rutari kure ni uko ikihebe gikomeye kurusha ibindi byose ku isi "Osama Bin Laden" yahawe ubushobozi n'ubuhangange n'Amerika, nyuma aza gusenya imiturirwa 2 yo muri Amerika akoresheje indege, icyo gikorwa kibi kikaba cyarahitanye ubuzima bw'abanyamerika bagera ku bihumbi 4! Paul Kagame nawe ashobora kuzabera ikigeragezo igihugu cy'Amerika (USA) kandi bizwi ko ubushobozi n'ubutegetsi afite yabihawe n'icyo gihugu k'igihangange!
Muri iyi minsi Paul Kagame yiyemeje gufata ku ngufu ubutegetsi mu Rwanda atitaye ku nama agirwa n'abazungu bamuhaye ubwo butegetsi; ibinyamakuru mpuzamahanga cyane cyane ibyandikirwa mu gihugu cy'Ubwongereza na Leta Zunze Ubumwe z'Amerika, byatangiye kwandika inyandiko zikakaye zijora ubutegetsi bwa Kagame! Imiryango mpuzamahanga ishinzwe kurengera uburenganzira bw'ikiremwamuntu nayo yarahagurutse ivugisha ukuri kubibera mu Rwanda! Ari iyo miryano ari nibyo binyamakuru byose byemeza ko u Rwanda ruyobowe n'umunyagitugu w'umwicanyi ko kandi iterambere rivugwa ko ryagezweho mu Rwanda ari itekinika! Iyo miryango n'ibyo binyamakuru byemeza ko Paul Kagame yiyemeje gufata ubutegetsi mu Rwanda akazabukurwaho n'urupfu!
Mu ikinamico ryo kwiyamamaza mu muhango w'amatora mu Rwanda, Paul Kagame n'agatsiko kamuri inyuma bakoze ibishoboka byose: bafunga amasoko, bafunga ibitaro, bafunga amashuri... maze bazana ku ngufu abaturage bose muri za mitingi zo gutega amatwi Paul Kagame! Intego nyamukuru yari igamijwe muri icyo gikorwa kwari ugufata amafoto n'amashusho y'abaturage bose maze bakayakwiza ku isi yose kugira ngo berekane ko Paul Kagame akunzwe nk'Imana mu Rwanda! Ikibazo Paul Kagame yagize n'agatsiko kamugaragiye ni uko amahanga yose yamaze kumenya ko ibyo Kagame ari gukora ari ikinamico! Ibinyamakuru n'imiryango mpuzamahanga byemeza ko amatora yo mu Rwanda ari ikinyoma ko kandi n'ibindi byose byavuzwe ku Rwanda ari ibinyoma!
Madame Mushikiwabo ushinzwe ububanyi na mahanga kwa Kagame, yasomye ubwo butumwa ntiyihangana ngo ashishoze maze arahubuka nawe yandika ubutumwa ku rukuta rwe asubiza uriya muyobozi mukuru wa HRW; Madame Mushikiwabo yagize ati: "Ken, Ken, Ken... Ese aho ntiwibagiwe gufata imiti y'uburwayi ufite? Hari ivuriro rishobora kukwitaho rikakuvura riri ahantu hitwa i Ndera mu Rwanda, muri iryo vuriro wahabona ubufasha bwakugirira akamaro!"
Politiki y'ibitutsi no gusebanya!
Ibitutsi no guharabika Madame Mushikiwabo yavuze kuri uyu muyobozi w'umuryango ukomeye wa HRW birerekana neza ko ubuyobozi bw'i Kigali buri mu bihe bikomeye kandi ko bitazabworohera guhangana n'ababunenga! Ntabwo byumvikana uburyo ministre w'Ububanyi n'amahanga asubizanya ibitutsi ku bantu banenga ibitagenda neza mu Rwanda! Niba Mushikiwabo nta bisobanuro yashoboraga kubona byo guha umuyobozi wa HRW ibyiza ni uko yari kwicecekera aho kwiha amenyo y'abasetsi yandika ibitutsi no gusebanya nk'umushumba! igihugu cy'u Rwanda kigomba gukorana n'imiryango mpuzamahanga ishinzwe uburenganzira bw'ikiremwamuntu; ariko se niba nka Ministre w'Ububanyi n'amahanga atinyutse kuvuga ko umuryango wa HRW uyobowe n'umurwayi wo mu mutwe ugomba kuvurirwa i Ndera, murumva u Rwanda rwakorana iki n'uwo muryango? Ese Mushikiwabo ashobora gutinyuka kwicarana na Keneth Roth bakaganira?
Kuba Mushikiwabo atinyutse gusebya umuyobozi wa HRW ku mugaragaro ni ukuvuga ko umubano w'u Rwanda na HRW wahagaze kera! Abakurukirana politiki ya Kigali, basanga ubutegetsi bwa Paul Kagame bwaramaze imyaka 23 bubeshya amahanga cyane cyane abongereza n'abanyamerika. Muri iyi manda Kagame yiyongeje, ubutegetsi bwe bukaba bwaravumbuwe n'abazungu ko Kagame ari umunyagitugu w'umwicanyi! Mu ikinamico ryo kwemeza abo bazungu ko akundwa n'abanyarwanda nabyo ntamusaruro byatanze! Paul Kagame akaba yariyemeje gukurikiza politiki y'ibyihebe mu gucecekesha amahanga!
Intore yashoboye kuvugana na "veritasinfo" yasobanuye ko Paul Kagame agiye gukurikiza politiki yakoresheje ku gihugu cy'Ubufaransa! Hashize imyaka 23 yose Paul Kagame yandagaza igihugu cy'Ubufaransa avuga ko ingabo z'icyo gihugu zakoze jenoside! Leta y'Ubufaransa n'ibinyamakuru byo muri icyo gihugu byaracecetse kugirango bidakomeza gushyirwa ku karubanda ku kinyoma cya Kagame cyo kubita aba jenosideri! Bitewe ni uko ubwo buryo bwashoboye gucecekesha Ubufarnsa, leta ya Paul Kagame yiyemeje gutuka no kwandagaza ibinyamakuru, imiryango mpuzamahanga cyangwa se ibihugu bizagerageza kunenga politiki mbi ya Kagame, kugirango nabyo biceceke nk'Ubufaransa!
Ese gutukana, kwandagaza bizatuma koko iriya miryango na biriya bihugu byose biceceka kuri politiki mbi y'agahotoro iri mu Rwanda? Ese abanyarwanda bo bazakomeza kuba inkoma mashyi? Ni ukubitega amaso!
Veritasinfo