Rwanda: Ese aho Paul Kagame yambariye inkindi ntiyaba agiye kuhambarira ubucocero?
Itorwa rya Kagame muri RPF rimeze nkaho yakwiyandikira ibaruwa akayiyoherezaho ayinyujije mu iposita!
Kuwa gatandatu taliki ya 17 Kamena 2017, Paul Kagame yongeye gukora ikinamico ryo kugaragaza ko ngo agizwe umukandida na FPR ku mwanya wa Perezida wa Repubulika y'u Rwanda mu ikinamico ry'itora riteganyijwe ku italiki ya 4 Kanama 2017! Iyo nkuru yo kugirwa umukandida nta gaciro amahanga n'abanyarwanda bayihaye kuko nta gishya kirimo! Abantu bose bakaba bamaze kumenyera ko Paul Kagame ari umubeshyi ruharwa wiyemeje kuzagwa ku butegetsi!
Paul Kagame yakoresheje amayeri menshi n'ubugome bukabije kugirango agere ku butegetsi! Kugirango yitoze kuyobora igihugu no kwiga ururimi rw'ikinyarwanda , yihaye umwanya wa Visi Perezida mu mwaka w'1994, avuye kuri uwo mwanya yahise ahirika Bizimungu wamutozaga uko bayobora igihugu, Kagame ntiyemeye ko umwanya wa Visi Perezida yari afite uhabwa undi muntu! Abanyarwanda bamwe n'abanyamahanga bahaga Paul Kagame ibyubahiro bikomeye kuko batekerezaga ko agiye kuba umukuru w'igihugu wa mbere muri Afurika ushobora gushimangira demokarasi mu gihugu no guhererekanya ubutegetsi mu mahoro!
Iyo ubajije abanyamahanga barataga ibigwi Kagame inzira ari kwerekezamo u Rwanda, bararuca bakarumira, abandi bakavuga ko abanyafurika ari uko bameze! Muri iki gihe nta muntu numwe uha agaciro imvugo ya Paul Kagame, n'abamutega amatwi kandi bakamukomera amashyi menshi ntabwo babikorera ko bamukunze cyangwa babona ko ari kubajyana ahantu heza, ahubwo babikora gutyo kubera ubwoba kugira ngo atabakata amajosi!
Paul Kagame yivugiye ubwe ko "atari umusazi kuburyo yafata indi manda", iyo ndahiro n'ibinyoma byinshi byayiherekeje byafatwagaho ukuri n'abanyamahanga, none Kagame aberetse aho abera itabi afata manda ya 3! Kubera indahiro n'ibinyoma yabeshye byatumye Paul Kagame afatwa ukundi! Ntabwo ari umuntu wo kwizerwa, kandi araganisha igihugu ahantu habi. Paul Kagame ari kubeshya ko hazaba amatora ku italiki ya 4 Kanama 2017 ngo y'umukuru w'igihugu akibagirwa ko amaze kwemeza ko muri iyi myaka 7 agiye kuyobora azashakisha uzamusimbura! None se ko yemeje ko ubutegetsi yakomeje kubugundira amatora azaba ari ay'iki?Niba mu nteruro imwe Paul Kagame avugamo ijambo rimwe akanavuga n'ikinyuranyo cyaryo birasobanura neza ko ubuzima bwe bubangamiwe cyane! Kagame ameze nka wa muntu ugenda mu nzira yivugisha wenyine kubera ko ibibazo byamurenze! Amakuru tugezwaho n'abantu bari hafi ya Kagame yemeza ko Amerika (USA) yamusabye guha umwanya w'ubuperezida umugore we Jeannette Kagame ariko nabyo ntiyabyemeye kuko yatekereje ko umugore we yamutanga! None se mumyaka 7 agiye kugundiramo ubutegetsi mu bibazo byinshi nibwo azatinyuka kubuha umwana we Cyomoro nk'uko bivugwa?
Kugira ngo Paul Kagame atange ubutegetsi agihumeka birakomeye cyane nk'uko ingamiya byayikomerera mu kwinjira mu mwenge w'urushinge! Kagame yavuze ko atariwe ugomba kujya gushaka umusimbura, ko aramutse abikoze nta demokarasi yaba irimo, none yemeje ko agiye kuzishyiriraho umusimbura we uretse ko ari ikinyoma kugirango arebe ko asunika iminsi! None se ntibigaragaye ko Paul Kagame yakuyeho amatora mu Rwanda kugeza naho avuga ko azishyiriraho umusimbura? Kagame yafashe ubutegetsi yitwa intwari none abusaziyeho yitwa umwicanyi n'umubeshyi! Ese ubwo iyi myaka yose amaze ku butegetsi yayungutsemo iki? Yamumariye iki?
Veritasinfo