Rwanda: Kutumvikana ku ngamba zo kurimbura FDLR no kugumana ubutegetsi bitumye mu nkotanyi hacikamo ibice 2 ku mugaragaro!
Col.Tom Byabagamba ni uwo wambaye imyenda ya gisilikare
Col. Tom Byabagamba umusirikare mu ngabo z’igihugu wigeze kuba umuyobozi w’umutwe ushinzwe kurinda umukuru w’igihugu yatawe muri yombi aho akurikiranyweho ibyaha bijyanye no guhungabanya umutekano w’igihugu. umugore we Mary Baine nawe akomeje guhatwa ibibazo n’urwego rw’igihugu rushinzwe iperereza bitewe n’uko Mary Baine ari kumwe na Ambasaderi Joseph Mutaboba bavugiye mu kabari kari i Nyarutarama ko Jeannette Kagame yagize uruhare rukomeye cyane mu rupfu rwa Aloysia Inyumba ngo wishwe n’uburozi . Col.Tom Byabagamba yatawe muri yombi ku mugoroba wo kuwa Gatandatu w’icyumweru gishize taliki ya 23/08/2014.
Col.Tom Byabagamba abaye umusirikare mukuru wa gatatu utawe muri yombi mu cyumweru gishize nyuma ya Brig. Gen. Frank Rusagara wavuye ku rugerero watawe muri yombi kuwa mbere na Capt. David Kabuye, watawe muri yombi kuwa Gatatu. Si ibyo gusa, ku mugoroba w’ejo ku cyumweru tariki ya 24-08-2014, ubuyobozi bwa RDF bwohereje abasilikare bo gufata umu ofisiye wo hejuru ukomoka mu Bagogwe bitewe ni uko yasuzuguye Paul Kagame wamusabye gucengera muri Congo akabyanga ; abo basilikare baje gufata uwo mu offier barasanye n’abamurinze bari mu ishyamba rya Gishwati kugeza ubwo abaje kumufata basubiyeyo batamufashe, abaturage bumvise urusaku rw’amasasu babwiwe ko ari inkotanyi ziri mu myitozo !
Amakuru aturuka mu basilikare b’abagogwe barinze uwo musilikare mukuru w’umugogwe kimwe no mu bikomerezwa bya FPR avuga ko ubu mu ngabo za Kagame hacitsemo ibice bibiri bikomeye bitumvikana ku ngamba (stratégies) zigomba gufatwa kugira ngo FPR igumane ubutegetsi ubuziraherezo. Igice kimwe k’ingabo za Kagame kiteguye gukorana n’umutwe w’ingabo ziri hanze y’igihugu ugizwe ahanini n’abasilikare ba FPR bayihunze. Uwo mutwe ufite ubuyobozi bukuru mu gihugu cy’Afurika y’epfo kandi ukaba ukorana byahafi n’igice kimwe cy’abasilikare ba FPR bari imbere mu gihugu. Abasilikare b’uwo mutwe w’inkotanyi uri hanze barangije kwitegura urugamba ndetse ngo bafite n’ibihugu bizabafasha ! Uwo mutwe w’inkotanyi ziri hanze ukaba ugamije kugaba igitero kuri FDLR ukoresheje uburyo bwa gicenegezi muri Congo niba ingabo za ONU ntacyo zikoze ngo zirwanye FDLR ; nyuma yo kurangiza kwica abasilikare ba FDLR uwo mutwe uteganya kazashaka uko wiyunga na bene wabo b’inkotanyi bari imbere mu gihugu bashyigikiye Paul Kagame, bakumvikana uko bakemura ibibazo byatumye bashwana !Paul Kagame n’abasilikare bamushyigikiye ntabwo bakozwa iby’uwo mutwe wundi kuko Paul Kagame abona amaherezo uwo mutwe wundi uzamuhirika numara kurimbura FDLR, akaba ariyo mpamvu Paul Kagame nawe yiteguye kugaba igitero kuri FDLR muri Congo akayirimbura ariko adasize n’abasilikare b’inkotanyi bo muri icyo gice kindi cy’abasilikare bashaka kwifatanya na bene wabo b’inkotanyi bari hanze kugira ngo barimbure FDLR nyuma baze kumvikana nawe. Kugira ngo ibintu byihute Paul Kagame we arashaka kugaba igitero byihuse muri Congo akarwanya ingabo za ONU n’iza Congo icyarimwe ariko amaherezo akarimbura impunzi zose z’abanyarwanda ziri muri Congo.
/http%3A%2F%2Fwww.rushyashya.net%2FIMG%2Fjpg%2Frnc.jpg)
Uru ni urubyiruko rwa RNC mu nama muri Afurika y'epfo Paul Kagame afata nk'umutwe w'ingabo ushaka kwiyunga n'inkotanyi ze!
Bitewe ni uko Paul Kagame ashaka no kwikiza igice cy’abasilikare b’inkotanyi batamwumvira bashaka kwifatanya na bene wabo bari hanze y’igihugu ategenya ko mu gihe azaba yashoje urugamba muri Congo azohereza ku rugamba umusilikare wese ukekwa kuba ari mu gice cy’abasilikare bashaka gukorana n’abasilikare b’inkotanyi bamuhunze, abo akaba aribo bajya imbere kurugamba, bityo urugamba rwo kwica impunzi muri Congo rukazarangira n’inkotanyi zitamwemera zirangiye , niyo mpamvu abasilikare bo kuruhande rukorana n’inkotanyi zahunze Paul Kagame bari guhabwa amabwiriza yo gucengera muri Congo bakanga kuko bamenye ayo mayeri, Paul Kagame nawe yiyemeje gufunga no kwica abayobozi n’abashyigikiye icyo gice cy’abasilikare bashaka kumvikana n’inkotanyi ziri hanze ; ibyo nibyo bisobanura intambara yifungwa ry’abasilikare bakuru b’inkotanyi muri iki gihe kuko baketsweho gushyigikira umugambi wo kumvikana na bene wabo bari hanze ariko ni muntangiriro kuko kagame agomba gufunga benshi abandi bato akabohereza kurugamba muri Congo !
Ikibazo gikomeye Paul Kagame afite akaba ari uko ataramenya neza niba mu basilikare bamurinda hatarimo abashobora gukoreshwa bakaba bamugirira nabi, icyo kibazo kiramuhangayikishije kuburyo byabaye ngombwa ko iri joro yakoresheje inama y’ikitaraganya abakuru b’ingabo ze kugira ngo bahangane n’ibibazo 2 bikomereye Kagame, ibyo bibazo ni ibyerekeranye no kurinda umutekano we kuburyo bukomeye no gutegura urugamba rwo kurwana muri Congo ariko bamaze kwikiza ibyitso by’inkotanyi zose bishobora gutuma batagera ku ntego zabo ! Ikibazo kagame afite ni uko ashobora kuba abo ari gusaba gushyira mu bikorwa ibyifuzo bye nabo bashobora kuba batekereza nk’inkotanyi ziri kuruhande rwo gushaka gufatanya n’inkotanyi ziri hanze y’igihugu !
Ng’uko uko ibintu byifashe ikambere mu nkotanyi tukaba twasaba Imana ko ayo macakubiri yabo atazasakara mu baturage bakarimburwa !
Ubwanditsi