Rwanda: Intambara irakomeje yo guhiga Major Callixte SANKARA wa FLN!

Publié le 24 juillet 2018 par veritas

Major Callixte Sankara

Ubuzima bwahagaze mu gihugu cyose, ambasade y'igihugu cy'Ububiligi n'iy'igihugu cy'Ubwongereza zatanze amatangazo yo kumenyesha abenegihugu babyo bifuza gukorera ingendo mu Rwanda ko bagomba kwitonda cyane kubera ikibazo cy'umutekano utameze neza mu gihugu! Amatangazo y'izo z'ambasade avuga ko n'ubwo muri rusange u Rwanda rufite umutuzo ariko ntibibujije ko hari ibitero bya hato na hato bigabwa n'imitwe irwanya ubutegetsi bikorwa hirya no hino mu gihugu; izo ambasade zongera ho hari kugaragara imirambo ahantu hanyuranye y'abantu bicwa ku manywa yihangu mu Rwanda! Muri iri joro rya cyeye ryo kuwa mbere rishyira kuwa kabiri taliki ya 24/07/2018, abasilikare benshi b'inkotanyi banyuze mu mujyi wa Ruhengeri (Musanze) bahetse ibikapu biremereye cyane byuzuye amasasu kandi bitwaje imbunda nini, aho abo basilikare berekezaga nta muntu urahamenya.

Inkengero z'ishyamba rya Nyungwe nazo zigoswe n'abasilikare b'inkotanyi bafite imbunda nini kandi abo basilikare bakaba bizengurukije umubiri wose amashene y'amasasu ndetse bakaba bambaye n'ingohero z'ibyuma (camouflet)! Abaturage baturiye Nyungwe bari kubwirwa ko bagomba kwitegura kwimuka mu turere batuyemo kubera ikibazo cy'umutekano mucye! Hirya no hino mu gihugu hari inkuru zivuga ibitero biri kugabwa ku baturage bikozwe n'abantu batazwi, igipolisi n'igisilikare cya Kagame bikaba biri gutanga amatangazo yo kumenyesha abaturage ko igihugu cyatewe n'insoresore zishonje kandi zirwaye amavunja kuburyo batari bakwiye guhungabana; abantu bose baziranye bya hafi cyangwa se bya kure na Major Callixte Sankara basabwe gutanga ubutumwa mu binyamakuru bikorera mu kwaha kwa leta ya Kagame bumenyesha rubanda ko bitandukanyije nawe.... ibi byose ni ibimenyetso byerekana ko intambara iri mu gihugu ikomeye n'ubwo nta rusaku rw'amasasu ruri kumvikana!

Impfubyi zirakuze!

Uyu mwuka uremereye w'intambara uri mu Rwanda warushijeho gufata indi ntera ubwo Major Callixte Sankara uri mu buyobozi bw'umutwe wa gisilikare wa FLN ndetse akaba n'umuvugizi wawo atangarije ko ibitero byagabwe mu karere ka Nyaruguru (Gikongoro) byakozwe n'uwo mutwe! Umuvugizi w'igipolisi cya Kagame Théos Badege yavuze ko Major Sankara agomba gufatwa agashyikirizwa ubutabera kandi ko bazasaba ibihugu ashobora kuba aherereyemo ku muta muri yombi agashyikirizwa leta ya Kagame! Aha ariko umuvugizi w'igipolisi cya Kagame yiyibagije ko u Rwanda rucumbikiye Nkunda na Niyombare kandi nabo bashakishwa n'ibihugu bakomokamo kandi bakaba baranze kubasubiza leta z'ibyo bihugu, kuki bumva ko bo bagomba kubakorera ibyo bo batabakorera? Leta ya Kagame niyo icumbikiye abarwanyi benshi bahungabanya umutekano mu bihugu bihana imbibi nayo! Hagati aho leta y'Uburundi ikaba yahise yamagana imvugo ya Kigali, ikaba yibutsa ko abarwanya Kigali bari mu Rwanda batari mu Burundi!

Mu bisobanuro Major Callixte Sankara atanga byatumye yegura umuheto, ni uko avuga ko leta ya Kagame nta bwisanzure bwa politiki itanga kandi ikaba igizwe n'abicanyi ruharwa bamaze abahutu bakica n'abatutsi! birazwi ko FPR itinya urugamba rw'amagambo kurusha urw'amasasu, FPR izi neza ko idashobora gutsinda intambara mu gihe idashobora gutanga ibisobanuro by'icyo irwanira! Sankara rero azanye urugamba rukomeye kuri FPR rw'uko arwanya ubwicanyi bwakorewe abahutu n'abatutsi! Kugirango FPR izashobore kurwana iyi ntambara ntibizashoboka kuko Major Callixte Sankara yayirashe mucyico! Sankara agira ati:

"Nta pfunwe na rimwe mfite ryo gukorana n'umunyarwanda wese ushaka impinduka! bariya bantu bo muri CNRD abenshi barimo ni abana...dufite twebwe uko tubizi twakoze ubushakashatsi, twatumye abantu, intumwa zacu zijyayo turabasura,turagenzura dusanga ari abantu barengana babaye! Abana bafite imyaka 18 na 19 bararambiwe, bashaka gutaha iwabo bakagira uburenganzira ku gihugu cyabo... biriya birirwa bishaririza (Inkotanyi) baririmba jenoside igihe cyabyo cyararangiye... Kagame na bariya bantu be dufitanye urubanza, ndavuga twebwe abatutsi bari mu gihugu (mbere y'1994), dufitanye urubanza kuko barateye miri 90 tuboherereza abana bacu, ingororano yabaye ni ukubakubita amafuni, n'udutorokotse bagenda batwica umugenda, bariya bantu bafata abatutsi b'abagogwe bakajya bagenda bakoresha za DMI bakoherezayo abantu b'abasilikare babo bita ngo ni abatekinisiye bakajya kubica, bariya bantu baricaye bafata muri 94 bapanga gahunda yo guhanura indege ya Perezida Habyarimana kandi yemeye gushyikirana akagabana nabo ubutegetsi, banyura ruhinganyuma baramurasa baramwica; bazi neza ko twe abari mu gihugu bazatugira isaso kugirango batwice! Amagambo bagiye bavuga ba TITO Rutaremara na ba Murigande yo kuvuga ngo ntibarya umuleti batamennye amagi, ayo ngayo turayazi!

Inyuma yaho, Kagame we ubwe, jenoside itangiye afata abasilikare b'abatekinisiye abavanga n'interahamwe kuri bariyeri kugirango batwicire ababyeyi, no kuzitiza umurindi kugirango isi bayereke! Nta rukundo bigeze batugirira n'umunsi n'umwe, nta mpuhwe badufitiye, nta nubwo bakwiriye kujya hariya ngo bajye kubeshya abantu ngo jenoside, jenoside! umushinga wabo bashakaga bawugezeho ariko bizabagaruka! Baduteye intimba... Uyu munsi ikintu nsigaje cyo kurwanirira ni ukuva ngo FPR iveho nibura abana bazavuka, ari umwana w'umuhutu azabe afite uburenganzira mu gihugu bungana n'ubw''umwana w'umututsi ... Abana b'abahutu biciwe bashobore kurihirwa ishuri nkuko twe twigaga baturihiye ariko bo (abahutu) badashobora kubarihira...Umwana w'umuhutu wiciwe ntanuburenganzira afite bwo kwibuka abe, inzozi zanjye uyu munsi mfite na bagenzi banjye bo muri FLN ni uburyo tugomba kurwana tukazubaka u Rwanda umuhutu n'umututsi bibonamo....

Sankara yakubise igisasu cya kirimbuzi ku butegetsi bwa Kagame!

Kugirango mushobore kumva uburemere bw'intwaro Major Callixte Sankara yasobanuye muri uru rugamba FLN yatangiye rwo guhindura ibintu mu Rwanda, birabasaba gusubiza amaso inyuma mukareba ibirego Madame Adeline Rwigara ashinjwa na Kagame! Mu kirego Adeline Rwigara ashinjwa bavuga ko yavugiye kuri telefoni, akaganiriza umuvandimwe we ubwicanyi inkotanyi zikorera abatutsi bari mu Rwanda muri iki gihe. Madame Adeline akaba ashinjwa ko yavugiye kuri telefone anenga ubutegetsi bwa Kagame bisobanura ko yakoze icyaha cyo kwangisha abaturage ubutegetsi! Niba kuvugira kuri telefoni bishobora guhirika ubutegetsi bwa Kagame; ntabwo ubwo butegetsi bwe buzashora gutsinda urugamba FLN na Sankara barwana kandi bakoresha intwaro n'amagambo!

Ubutegetsi bwa Kagame bufashwe n'inkingi ebyeri: Inkingi ya mbere ni ikinyoma cyo kubeshya ko yahagaritse jenoside amahanga akabyemera gutyo, inkingi ya kabiri ni abatutsi bari mu Rwanda bavuga ko bacitse ku icumu bakingira ikibaba ubutegetsi bwa Kagame! Iyo witegereje urugamba rwa Sankara muri CNRD na FLN ubona ubutegetsi bwa Kagame bushobora guhirima byanze bikunze kuko ziriya nkingi zombi ziri gushegeshwa n'ibisobanuro Sankara atanga! Ubwo nibwo bwoba leta ya Kagame ifite kuko idashobora guhanga na Sankara mu bisobanuro atanga. Iyo Sankara avuze ko barwanya abicanyi ba Kagame, inkotanyi zihita zegura imbunda zigafata n'amasasu menshi zikarara zizerera igihugu cyose, none se icyo nicyo gisubizo batanga ku birego bashinjwa na FLN ndetse na opposition yose?

Kenshi abahutu bavuga ko abatutsi ari abagome, ibyo bakabihera ku buryo bitwara mu kibazo cy'ubwicanyi bwa Kagame na FPR. Mbere y'umwaka w'1990 abahutu n'abatutsi bari babanye neza mu gihugu, abatutsi bari muri Uganda (ba Kagame) bacura umugambi wo gutera u Rwanda. Muri iyo gahunda yabo bakaba baragize abatutsi bari mbere mu gihugu ikiraro cyo gufata ubutegetsi no kwica abanyarwanda. Mu byukuri FPR ikaba yarishe abatutsi ubugira 3:

a)Ku nshuro ya mbere, Kagame na FPR bishe abatutsi ubwo babacengeragamo rwihishwa bakabasaba kohereza abanaba babo mu nkotanyi no gushyigikira intambara yabo. Abatutsi n'abahutu bose babaga mu ishyaka rimwe rukumbi rya MRND, niba abanyarwanda bari barambiwe iryo shyaka, ntibyumvikana uburyo abatutsi bohereje abana babo rwihishwa mu Nkotanyi abahutu batabizi. Iyi mikorere Kagame yashyize mu batutsi bari imbere mu gihugu nta kindi yabyaye uretse gushyamirana hagati y'amoko y'abahutu n'abatutsi aribyo byabyaye za jenoside z'amoko yombi zikomeje kwigaragaza mu Rwanda. kuri iyi ngingo abatutsi bose bazi ko Kagame ariwe nyirabayazana ,kuki bamuhishira?

b)Ku nshuro ya kabiri, Kagame na FPR bishe abatutsi ubwo inkotanyi zicaga abana b'abatutsi bazisangaga mu ishyamba, zigatoranyamo abajijutse kandi bazi igifaransa zikabakubita agafuni ngo batazazinyaga ubutegetsi bageze mu Rwanda. Inkotanyi zimaze kwica Habyarimana ndetse na mbere yaho zivanze n'interahamwe maze zica abatutsi karahava ngo zikunde zibone ibirego zishinja abahutu mu mahanga. Ubu bwicanyi bwose abatutsi barabuzi, kuki batabuvuga?

c)Ku nshuro ya gatatu, Kagame na FPR bashyizeho Gacaca, maze bashishikariza abatutsi kwihimura ku bahutu bakabafunga ndetse bakabambura ibyabo! Iyi gacaca yarushijeho gutandukanya cyane abahutu n'abatutsi. Abo bahutu bafungishijwe muri Gacaca n'abatutsi abenshi bapfiriye muri gereza kuburyo abahutu bita babatutsi babafungishije abicanyi! Ibi byose abatutsi bari imbere mu gihugu barabizi, kuki babiceceka?

Hejuru y'ubu bwicanyi bwose, nta mututsi numwe utinyuka ngo avuge ko Paul Kagame na FPR aribo babishe kandi babizi neza ahubwo bagakomeza kuvuga ko bishwe n'abahutu, abo batutsi bahisha ukuri nibo bagome mubyukuri! Niba abahutu bishwe n'abahutu batinyuka bakavuga ko abo bahutu bene wabo (interahamwe) babishe; kuki abatutsi badatinyuka ngo bavuge ko inkotanyi zabishe kandi babizi neza ko arizo? Aha rero niho ibisobanuro bya Sankara bifite ishingiro kandi akaba ari igisasu cya kirimbuzi ku butegetsi bwa Kagame! Byanze bikunze abatutsi bazakurikira Sankara nabo bavugishe ukuri kubwicanyi Kagame yabakoreye, icyo gihe nibwo ibintu bizaba bigiye guhindiuka mu Rwanda!

Ingaruka z'ibitero bya FLN n'ibisobanuro bya Major Callixte Sankara!

Burya urugamba rukomeye ntabwo ari ugufata imbunda ngo urase amasasu gusa, ahubwo intambara ikomeye ni ukubona impamvu usobanurira abantu zituma urwana. Nyuma y'aho Major Callixte Sankara atangarije ko urubyiruko rw'abahutu n'abatutsi rwihurije mu mutwe wa FLN kugirango rukureho ubutegetsi bubi bwa FPR inkotanyi, abantu banyuranye ndetse n'abanyepolitiki b'abanyarwanda banyuranye bagize icyo babivugaho. Abantu benshi bashyigikiye ibisobanuro Major Callixte Sankara yatanze byatumye we n'abo bari kumwe barafashe intwaro bakarwanya ubutegetsi bwa Kagame. Ku mbuga nkoranyambaga hakaba hari abagaragaje ko Sankara adasanzwe, kuba ari umututsi wifatanyije n'abana b'abahutu bose ari abana b'u Rwanda bakiyemeza kurwanira hamwe, ko icyo ari igikorwa kigomba gushyigikirwa! Hari abanenze uburyo ibyo bitero FLN yabikozemo ariko nta numwe wavuzeko ibisobanuro Sankara yatanze bidasobanutse! Twizereko abo babona hari ukundi byakorwa nabo bazajya mu rushya bakerekana akarusho mu guhirika iriya ngoma ngome!

Inkotanyi zo zashatse guhisha ko zatewe ariko ay'ubusa byaje kumenyekana, cyane cyane ubwo inkuru y'ibyo bitero yasohokaga mu itangazamakuru mpuzamahanga. Inkotanyi zahise zibuza itangazamakuru ryo mu Rwanda kwandika inkuru zivuga kuri iyo mirwano. Televiziyo TV1 ikorera mu Rwanda yahagaritswe iminsi 4 bitewe n'uko yatangaje inkuru zivuga kuri iyo mirwano. Inkuru zivuga ku ruzinduko rwa Perezida Filipe Nyusi wa Mozambike, Jinping w'Ubushinwa na ministre w'intebe w'Ubuhinde Narendra Modi ntizahawe agaciro n'abanyarwanda kubera ko inkuru yakomeje kuvugwa mu Rwanda ari iy'imirwano ya FLN n'Inkotanyi. Abantu benshi batangiye kwibaza ku masezerano y'Arsenal n'inkotanyi yo kurushakira ba mukerarugendo mu gihe isi yose itangiye kuvuga ko mu Rwanda hari kuba ibitero bya hato na hato no kwica abantu ku manywa yihangu!

Igikomeye ariko kurushaho, ni uko abasilikare ba Kagame bamaze kurambirwa intambara; abatutsi benshi bakaba batangiye kugira ibitekerezo nkibya Sankara! Ese byagenda gute abana b'abasilikare b'inkotanyi biyemeje gukurikira Sankara mu bitekerezo bye bakiyemeza kurwanya Paul Kagame wabiciye ababyeyi? Nta kundi byagenda ibintu byarara bihindutse mu gihugu nta sasu rivuze, uru nirwo rugamba Callixte Sankara yashoye kuri FPR na Kagame kandi amaherezo ibintu bizahinduka! Ntabwo abahutu bagomba kujya mu nguni yabo ngo barashaka guhindura ibintu mu Rwanda bonyine, n'abatutsi nabo ntibashobora guhindura ibintu bonyine, birasaba guhuza imbaraga; ubwo amoko yombi atangiye kubonekamo intwari zibona ibintu kimwe, impinduka iri hafi!

Byaba bitangaje cyane haramutse hari abantu bavuga ko barwanya ubutegetsi bwa FPR ariko bakarwanya ibitekerezo bya Callixte Sankara na FLN byo guhuza abana b'abanyarwanda mu gushaka umuti w'ibibazo bibatanya no gutaha mu gihugu cy'ababyeyi babo!

Veritasinfo