Kagame yari akwiye kugabanya ingendo zidafite akamaro no guhombya igihugu atiza inshuti ze indege zihenze
Ingendo nyinshi Kagame yakoze muri iyi myaka yanyuma, haba muri Amerika, haba mu Burayi cyangwa n’ahandi, usanga akenshi ari izo kwitemberera. Turebye vuba aha, twafata nk’urugendo aherutse gukorera i Boston, Massachussets, USA, ku butumire bwa Professor Michael Porter, uri mu bajya batizwa indege na Kagame, kimwe na Tony Blair, undi mucuti we. Nyuma yo kuvuga amagambo imbere y’abanyeshuri nka 30 ba Harvard, Kagame yakomeje ajya kuvuga andi i Denver, Colorado, USA.
Urwo rugendo ruhenze, ntirwari ngombwa rwose. Ni gute umuperezida ukunda Abanyarwanda yasiga abanyeshuri biyahura, abandi bagwa umudari, akarenga akajya kwigisha abanyeshuli ba Harvard (Boston, tariki ya 22/02/2011), bugacya agakurikizaho amagambo yo kwikuza gusa .
Reka turebe igiciro cy’urwo rugendo, twifashishije ahanini ( Distance calculator-Kigali distance & flight duration time: Athens-Kigali-Boston-Denver-New York-Kigali-Athens): amasaha 52 n’iminota 16. Ushyize kuri cya giciro gishya Kagame yigeneye ($10 000 kw’isaha), bingana n’amadolari 522 667, ni ukuvuga amanyarwanda 313 600 200. Bivuyemo inguzanyo ya buruse y’umwaka wose ku banyeshuri 1254
Kuri ayo mafaranga, hagomba kandi kwiyongeraho amadolari ibihumbi 100, Kagame yipfunyikira uko agiye mu rugendo, yemwe n’iyo rwaba rugufi. Muri izo ngendo, akenshi zigamije kwimenyekanisha ku giti cye, Kagame anishyurirwa mu rugendo presidential suite. Bizwi ko presidential suite igura hagati y’amadolari 5000 na 10 000 kw’ijoro. Dufashe impuzandengo y’amadolari 7500 buri joro, tukabara amajoro arindwi byibuze yarumazemo, dusanga nibura byaratwaye amadolari 52 500. Ushyize byose hamwe : Kagame yarutanzweho byibuze amadolari 152 000, avunje amanyarwanda miliyoni 91 n’ibihumbi 200, ahwanye n’inguzanyo ya buruse y’umwaka ku banyeshuri 365.
Ndetse hiyongeraho n’amafaranga atunze abaherekeje Kagame, byibuze icumi, barara nabo mu mahoteri ahenze, bamwe kandi bakaba banamutangayo bakoresheje indege zisanzwe. Bo tubabarire ku minsi byibuze 10 bamaze muri ruriya rugendo: abantu 10 babona, ku munsi, amadolari y’icumbi 500 n’amadolari 250 y’impamba. Amadolari 750 buri muntu, ku bantu 10 no ku minsi 10, ibyo bivuze ko batanzweho akayabo k’amadolari 75 000. Hiyongeraho kandi nk’amatike yabarirwa byibuze $20 000. Byose hamwe byatwaye amadolari nka 95 000, ni ukuvuga amanyarwanda miliyoni 57, avuyemo inguzanyo ya buruse y’umwaka ku banyeshuri 228.
Abanyeshuri bose hamwe babona inguzanyo ya buruse ku mwaka, urugendo nk’uru atarukoze ni: 1254+365+228=1847.
Kagame yari akwiye kugabanya amafaranga atangwa mu bikorwa byo kwivuga ibigwi no guhuma amaso amahanga ku mabi y’ingoma ye.
Birazwi ko Kagame atanga atitangiriye itama amafaranga menshi, ayaha za agences zimwamamaza mu mahanga n’ibinyamakuru binyuranye, ayo amafaranga akaba asesagurwa nko mu bihugu by’Ubwongereza, Ubugande, Ubufaransa, Amerika n’ahandi. Ingero:
Amafaranga ahabwa Racepoint PR, imwe muri za agencies z’i London zazobereye mu kwamamaza ingoma z’igitugu n’agahotoro: amapawundi miliyoni 2, avunje amanyarwanda miliyari 1 na miliyoni 920, ahwanye n’inguzanyo ya buruse ku mwaka yatabara abanyeshuri 7680.
Amafaranga ahabwa ikinyamakuru ‘The Independent’ cyo muri Uganda: amadolari ibihumbi magana abiri ku mwaka, avunje amanyarwanda miliyoni 120, amafaranga yavamo inguzanyo y’umwaka iramira abanyeshuri 480.
Izo ngero ebyiri gusa zikusanyijwe, amafaranga yo kwiyemera gusa yaramira abanyeshuli bagera kuri 7680+480= abanyeshuli 8160.
Gukuraho amafaranga apfushwa ubusa ku cyiswe amatorero.
Hakurikijwe ikiganiro cyahise kuli radiyo Rwanda, ku cyumweru taliki ya 3/01/2010, kuva 8h00 kugera 11h00, impuguke yankoreye inyigo ku mafaranga itorero ry’igihugu ryatwaye mu mwaka wa 2009. Iyo nyigo yiswe ‘Ikiguzi cy’itorero ry’igihugu’ nashyize ku mbuga za Internet tariki ya 19 Mutarama 2010, ikaba yarerekanaga ko amafaranga macye ashoboka yatanzwe muri uwo mwaka wa 2009, akabakaba miliyari 4 z’amanyarwanda. Ndetse umuntu akaba atashidikanya ko zari zinarenze, kubera ko byaje kugaragara ko hari ibyari byibagiranye. Dufatire rero kuri miliyari 4 z’amanyarwanda, agomba kuba ari macye cyane, kubera amafaranga menshi cyane asigaye akoreshwa mu gushinga amatorero yo mu mahanga.
Miliyari 4 z’amanyarwanda zishora urubyiruko mu bikorwa byo kurwonona ubwonko no kurushora mu bwicayi, ziramutse zizigamiwe inguzanyo za buruse, ibyo byaramira ku mwaka abanyeshuri 16 000.
Nk’uko iyi mibare ibigaragaza, abana b’u Rwanda 281 483 bashobora kubona inguzanyo za buruse umwaka
wose bitaruhanije na busa. Ibyo bisaba gusa ko Kagame yagarura nk’ariya mafaranga yasahuriye mu mahanga (aya kandi ni amacye azwi), ko yagurisha byibuze indege imwe, indi na yo akagira ubutwari bwo kureka kuyihishahisha. Bisaba kandi ko yakwigomwa byibuze urugendo rumwe muri nyinshi we n’inshuti ze bakora ku nyungu zabo bwite (nko kujya kuganiriza abanyeshuri ba Harvard, cyangwa se gusura umuhungu we i New York, abikuyeho ntibyamuvuna, cyane cyane ko abo bose basanzwe banamusanga i Kigali). Bisaba na none ko yagabanya gusesagura amafaranga mu bamwogeza, akanakuraho ibikorwa by’amatorero biganisha urubyiruko mu bikorwa by’ubugome(reba ifoto y'urwo rubyiruko), nk’uko ababisobanukiwe bakunze kubitangaza.
Amafaranga agurijwe abanyeshuri 281 483 umwaka wose, uyageneye ba banyeshuri 24098 bahabwaga inguzanyo ya buruse umwaka ushize, ayo mafaranga bashobora kuyagurizwa imyaka hafi 12. Bisobanura ko ashyizwe ku myaka 6, iyo nguzanyo yabo yanakubwa incuro ebyiri, bityo bakabasha kwiga neza.
Iyo mikorere mibi ya Kagame yerekana ko inkingi yambere y’Icyerekezo 2020, “Ubuyobozi bwiza na Leta ifite ubushobozi”, yamunzwe rugikubita. Yemwe n’iya kabiri, “Iterambere ry’ubukungu bushingiye ku bantu bafite ubushobozi no ku bumenyi”, igeze aharindimuka. Kandi rero n’izindi ni uko. Ntabwo rero ubumungwe bw’izo nkingi bugishoboye guhishirwa na propaganda ihenze, iterabwoba ku banyamakuru n’abatavuga rumwe na Leta.
NDL : Duhereye kuri iri sesengura umusomyi adukoreye ku isesagurwa ry’umutungo w’igihugu , birahita byumvikana neza impamvu Kagame yavugiye kuri radio mpuzamahanga ya BBC mu kinyarwanda kuri uyu wa gatatu taliki ya 23/03/2011 ko abanyeshuri batababuriye buruse ko ahubwo ayo mafaranga bahabwaga, leta yayahaye ministeri y’Uburezi kugirango iyakoremo ibindi bikorwa bifasha uburezi nko kubaka za laboratoire cyangwa kongerera abarimu ubushobozi. Impamvu rero adashobora kuvuga ko nta mafaranga ya buruse leta ifite yo guha abanyeshuri ni uko azi neza ko abaterankunga bamutera hejuru bakamubaza impamvu yavuga ko amafaranbga ya buruse y’abanyeshuri yabuze kandi barayamuhaye ( aha twatanga urugero rw’uko igihugu cya Suède aricyo gitanga amafaranga ya Buruse muri Kaminuza y’u Rwanda naho igihugu cy’ubwongereza kigatanga imishahara y’abarimu bose) ,none se yavuga ate ko buruse atayitanga kandi abaterankunga baba bayatanze, ariko kugirango yifate cyane yavuze ko ayo mafaranga azakora ibindi bikorwa cyane ko iyo nkunga inyuzwa mu mari ya leta ! Reka tuzarebe laboratoires zizubakwa mu Rwanda ni uburyo imibereho y’abarimu izatera imbere ! Ubundi bajya gukuraho Buruse z’abanyeshuri, babanje kujya bafata izo buruse bakajya kuzicuruza (FPR), nyuma abanyeshuri baza gusakuza bigera kubaterankunga b’igihugu cya Suède, bituma Kagame afata icyemezo kihutirwa ko ayo mafaranga yajya atanbgwa vuba , none ubu n’abaterankunga ntibazi ibirimo bikorwa kuko iyo nkunga bayinyuza muri leta ariko bakavuga ibyo izakora ! Umuherwe Kagame ahise abona igisubizo kuko azababwira ko abanyeshuri bifashije ko ahubwo iyo nkunga bazayubakamo laboratoire bagaha n’abarimu agahimbazamusyi ! Reka tubitege amaso !
Ibihe biraca amarenga, Kagame yari akwiye kwibwiriza.
Umusomyi ,Joseph Ngarambe.