Fungura Kenshi iyi paje urebe aho ibintu bigeze muri Burukina Faso, Afurika yose ihanze amaso ibiri kubera muri iki gihugu!
15H48: Nubwo Lt.Colonnel Zida yari yavuze ko Général Traoré atemerewe kuba umukuru w'igihugu; uwo musilikare wari usanzwe ari umugaba mukuru w'ingabo za Burukina Faso amaze gutangaza ko ariwe wafashe umwanya wo kuba umukuru w'igihugu cya Burukina Faso. Général Honoré Traoré akaba yavuze ko ariwe perezida wa repubulika. Kugeza ubu ntibiramenyekana niba yafashe uwo mwanya awuhawe n'abakuru b'amashyaka cyangwa se niba yawufashe ku ngufu, nta nubwo biramenyekana neza uko abaturage bari bwakire icyo cyemezo cyane ko kuva mbere hose bavugaga ko badashaka ko umusilikare aba umukuru w'igihugu! Igihugu cy'Ubufaransa kikaba cyashimye icyemezo cyafashwe na Blaise Compaoré, icyo gihugu kikaba kizeye ko igihugu cya Burukina Faso kigiye kugira umutuzo.
14H40: Blaise Compaoré wari perezida wa Burukina Faso ashyize ahagaragara itangazo avugamo ku avuye ku mwanya wa perezida wa Repubulika w'igihugu cya Burukina Faso, akaba yasabye ko yifuzako hagomba kuba amatora mu minsi 90 yo gutora undi mukuru w'igihugu wa Burukina Faso binyuze mu matora adafifitse. Akimara kwegura ku mwanya w'umukuru w'igihugu hari amakuru ataremezwa neza avuga ko Blaise Compaoré yahise ahunga umurwa mukuru wa Ouagadougou akaba yahungiye mu mujyi witwa Pô uri kumupaka w'igihugu cya Burukina Faso n'igihugu cya Ghana.
14H00: Umuvugizi w'ingabo za Burukina Faso Lt.Colonnel Zida amaze kubwira abaturage bari mu myigaragambyo muri icyo gihugu ko Blaise Compaoré akuwe ku mwanya wo kuba umukuru w'igihugu. Lt.Col Zida akaba yavuze ko muri aya masaha ya nyuma ya saa sita hatangiye ibiganiro hagati y'abanyepolitiki bo muri icyo gihugu kugira ngo hashakishwe ugomba gufata umwanya w'umukuru w'igihugu ugomba kuyobora inzibacyuho.Abaturage bari mu myigaragambyo bavuze ko badashaka ko umwanya w'umukuru w'igihugu uhabwa umusilikare cyangwa umwe mu banyepolitiki bo mu ishyaka rya Blaise Compaoré. Lt.Col Zida yamenyesheje abaturage ko umugabamukuru w'ingabo Général Traoré wifuzaga kuba umukuru w'igihugu atemerewe gufata uwo mwanya. Perezida w'Ubufaransa François Hollande yasabye Blaise Compaoré gufata icyemezo cya kigabo akubahiriza ibyifuzo by'abaturage.
12H30: Mu murwa mukuru wa Burukina Faso "Ouagadougou", abaturage benshi cyane bateraniye aho bita " Place de la Nation", abo baturage bakaba bari kwerekeza ku Ngoro y'umukuru w'igihugu kujya kuyikuramo Blaise Compaoré. Ubuyobozi bukuru bw'ingabo za Burukina Faso (Etat-major) bwagoswe n'abasilikare biyemeje kwifatanya n'abaturage mu myigaragambyo yo kubahiriza ibyifuzo byabo. Général Traoré, umugaba mukuru w'ingabo za Burukina Faso ari kuri Etat -major yafashe ijambo abwira abantu benshi bagose ubwo buyozi bw'ingabo bari kumwe n'abasilikare ko igihe kigeze muri Burukina Faso cyo kubahiriza demokarasi hagakurikizwa ibyifuzo by'abaturage. Abantu benshi bari bateraniye aho bahise baha amashyi menshi Général Traoré; igisigaye ubu ni ukumenya igiteganyirijwe perezida Blaise Compaoré.
Muri iki gitondo cyo kuwa gatanu taliki ya 31/10/2014 abaturage ba Burukina Faso baramutse babwirwako Blaise Compaoré akiri umukuru w'igihugu nk'uko yabitangaje ku mugoroba w'ejo kuwa kane mu majwi yafatiwe aho yihishe (mu ndaki) akanyuzwa kuri imwe muri radiyo yigenga muri icyo gihugu bitewe ni uko radiyo y'igihugu abaturage bayibohoje ibiganiro byayo bigahagarara.
Icyifuzo umukuru w'igihugu cya Burukina Faso yatanze cy'uko yaguma kubutegetsi akayobora leta y'inzibacyuho igomba gutegura amatora y'uzamusimbura, ayo matora akaba agomba kuba nyuma y'amezi 13; abaturage ba Burukina Faso ntabwo bakiriye neza icyo cyifuzo. Umugaba mukuru w'ingabo za Burukina Faso Gen Nabéré Honoré Traoré nawe yatambukije itangazo rikuraho guverinema ndetse rigasesa n'inteko ishingamategeko y'icyo gihugu ryarushijeho gushyira abaturage mu rujijo.
Abanyepolitiki n'abaturage muri Burukina Faso bakomeje imyigaragambyo mu gihugu cyose, barashaka ko Blaise Compaoré ava kubutegetsi burundu kandi bakaba badashaka ko asimburwa n'undi musilikare! Abaturage bavuga ko barambiwe ubutegetsi bw'abasilikare muri icyo gihugu. Ubu ibintu bikaba bikomeje kuba urujijo muri Burukina Faso.
Uko Afurika iri gukurikirana ibiri kubera muri Burukina Faso
Mu bihugu byinshi by'Afurika abaturage babyo barasanga ibiri kubera muri Burukina Faso bigomba kubera isomo abategetsi babo.
Rwanda: Abantu benshi ku migabane yose y'isi barasanga ibiri kubera muri Burukina Faso bishobora kuzaba muri Afurika yose ariko bagera ku gihugu cy'u Rwanda bagacaho akarongo gatukura kuko babona muri icyo gihugu ibintu bishobora kuzaba bibi cyane bakurikije imiterere y'abantu bafite ubutegetsi mu Rwanda muri iki gihe! Inkuru nyinshi ziri kunyura ku mbuga za internet kimwe n'ibiganiro biri kunyura ku maradiyo atandukanye biremeza ko mu Rwanda ibintu bizahinduka hamenetse amaraso menshi cyane! Birabe ibyuya!!
Congo: Abaturage b'abakongomani benshi (RDC) baravuga ko perezida Joseph Kabila adashobora gupima kongera gukinisha ibyo guhindura ingingo yo mu itegeko nshinga kugira ngo azongere kwiyamamaza. Umunyepolitiki muri icyo gihugu witwa Vital Kamerhe yavuze ko Kabila akinishije guhindura itegeko nshinga ngo yongere kwiyamamaza abakongomani bamwereka uburakari bwabo kurusha ubwo abaturage ba Burukina Faso beretse Blaise Compaoré, ngo ntabwo abakongomani ari ibigwari mu kurengera uburenganzira bwabo!
Tchad: Nyuma y'imyigaragambyo yo muri Burukina Faso amwe mu mashyirahamwe ya politiki n'ay'uburenganzira bw'ikiremwamutu muri icyo gihugu yatangiye gusaba abayoboke bayo kwisuganya bakandika inyandiko (pétition) ihamagarira perezida w'icyo gihugu Idriss Deby kwitegura kuzava kubutegetsi mu mwaka w'2016 adakuruye amahane mu gihugu.
Ibindi bihugu biri kuvugwa cyane ni u Burundi, Gabon, Congo Brazzaville, Uganda....
Afurika yose irashyushye muri iki gihe!!
Ubwanditsi
