Imyitwarire ya Joseph KABILA ku Rwanda na M23 ihangayikishije abacongomani benshi

FPR- Inkotanyi ikimara gufata u Rwanda ifashijwe n’ibihugu by’ibihangange kuri iyi si ; maze ikabona uko yishingikiriza jenoside y’abanyarwanda yagizemo uruhare rukomeye mu kuyitegura no kuyitangiza (la guerre et l’attentant ) ; abatutsi b’imbere mu gihugu bakaba ibitambo by’umugambi mubisha wo kwigarurira akarere kose k’ibiyaga bigari ; FPR-Inkotanyi yatangiye gahunda ndende yo gufata igihugu cya Congo ikoresheje ingufu za gisilikare nkuko yari yarabyijeje ba mpatsibihugu bari bayishyikiye kugeza na nubu bakiyifashe mu mugongo mu guhisha ibyaha byo kurimbura abaturage b’akarere kose ku nyungu z’ubutegetsi no gusahura Congo!

FPR-Inkotanyi yirukanye Mobutu kubutegetsi yifashishije Désiré Kabila wakoreshejwe nk’agakingirizo kashyizwe mu maso y’abacongomani kugirango bitagaragara ko Congo (yari Zaïre icyo gihe) yatewe n’u Rwanda. Laurent Désiré Kabila yari umucongomani wuzuye, intambara y’u Rwanda kuri Congo ikaba yaramwitiriwe ngo abacongomani bumve ko baje kubohozwa na mwane wabo ; mubyukuri twavuga ko Laurent Désiré Kabila yari nka BIZIMUNGU Pasteur ku Rwanda.

Muri iyo gahunda yo gushyira Désiré Kabila imbere byatumye u Rwanda rutsinda igitego cy’umutwe kuko rwashoboye kwirukana Mobutu, rufata n’inzego zose z’ubutegetsi ndetse igisilikare gihita kiyoborwa na James Kabarebe, akaba ariwe muntu  wenyine kuri iyi si ya rurema washoboye gufata imyanya ikomeye ya gisilikare mu bihugu bibiri bitandukanye kandi byose akabikorera mu gihe kimwe, mu gihe James Kabarebe yari ayoboye igisilikare cya Congo yari n’umugaba mukuru w’ingabo z’u Rwanda.

Nyuma yo gufata igihugu cya Congo , Laurent Désiré Kabila yagizwe perezida w’icyo gihugu ariko asanga adafite ijambo kuko ibyemezo byose yafataga yagombaga kubanza kugisha inama Kagame , agize ngo arinyagambuye ngo nawe afate ibyemezo nk’umukuru w’igihugu cya Congo nibwo Kagame na Kabarebe bamurwanyije, Laurent Désiré Kabila yatabawe na Zimbambwe na Angola , ariko bitewe ni uko ingabo zamurindaga zari zarinjiwe n’inkotanyi nihahandi Kagame yaramwivuganye maze yimika umunyarwanda uzwi ku mazina ya Hypolite Kanambe akaza guhabwa amazina na FPR- Inkotanyi  ya Joseph Kabila (byakorewe i Kigali muri 1996 mbere gato yo gutera Zaïre ya Mobutu).

Kugira ngo mwumve neza ko Joseph Kabila yateguwe na FPR- Inkotanyi kuva mbere hose ;ko ariwe uzayobora igihugu cya Congo ni murebe vidéo iri hasi aha , maze mukurikirane amagambo James Kabarebe yabwiye Joseph Kabila mbere gato yo gufata Kinshasa mu rugamba rwo kwirukana Mobutu kubutegetsi.James Kabarebe yagize  ati : 

« Ariko njye ndibuka neza icyo uwo munsi nabwiye Joseph, umuhungu wa Kabila…aba bantu barimo baririmba ubu ngo turabohowe, turabohowe, nibo bazaguhindukirana ;bagutezeho ikintu gishya,hanyuma rero niba nta kintu gishya ubazaniye,itegure kuzahura n’ibibazo ».

Nkuko mubibona, Kabarebe arerekana neza mu mvugo ko yari azi neza kuva mbere ko Joseph Kabila ariwe uzaba prezida wa Congo mu nyungu za FPR-Inkotanyi kuko yagombaga gusahura ubutunzi bwa Congo no kwica abahutu bose bayihungiye muri Congo ; kandi ibyo barabikoze ! Muri iyi Vidéo murabonamo uruhare rwa Leta Zunze Ubumwe z’Amerika mu rupfu wa Désiré Kabila n’uko inkomoko y’urwo rupfu iri mu Rwanda , murabonamo n’urundi ruhare rw’ibindi bihugu harimo n’u Burundi ; ibyo byose bikaba byaratewe n’impamvu yo gushaka kugira umunyarwanda umukuru w’igihugu cya Congo.

Ibyavuzwe birimo bisohora :

Ibyavuzwe na James Kabarebe byarasohoye kandi nanubu bikomeje kwigaragaza ; ubwo umutwe wa M23 wavukaga ubyawe na FPR –Inkotanyi abacongomani benshi baketse ko Joseph kabila ari inyuma y’uwo mutwe , bimwe mubigaragaza ubwo bugambanyi bwa Kabila n’u Rwanda bigaragazwa n’ibi bikurikira :

1.Umutwe wa M23 ugitangira , inkotanyi zikawinjiramo, zikinjiza mo abandi basilikare n’ibikoresho bya gisilikare , inzego zishinzwe ubutasi za Congo zari zibizi ndetse na raporo yarageze kwa Kabila ariko Leta ya Congo yaricecekeye kugeza ubwo ONU n’imiryango irengera uburenganzira bwa muntu iteye hejuru ikavuga ko M23 yashyizweho n’u Rwanda ndetse akaba ari uRwanda rurimo rurwana ! Congo yabyemeje ,nyuma abacongomani barumirwa !

2.Igihugu cy’Angola cyashatse kohereza abakomando bo mungabo zacyo ngo birukane M23, Joseph Kabila perezida wa Congo asubiza icyo gihugu ko baba baretse ko akibitekerezaho !

3.Igihugu cy’Ubufaransa nacyo cyashatse kohereza abajyanama bacyo mu byagisilikare muri Congo kugirango bafashe icyo gihugu mu gushaka ibisubizo bya gisilikare ingabo za Congo (FARDC) zifite mu kurwanya M23 Joseph Kabila ababwira ko akibitekerezaho.

4.Uwahoze ari Ministre w’ubucamanza muri leta ya Laurent Désiré Kabila witwa Mwenze Kongolo, yavuze ko imyitwarire ya Perezida Joseph Kabila ku mutwe wa M23 no ku Rwanda igaragaza ubugambanyi, kugeza ubu Leta ya Congo ikaba itarashobora kubeshyuza ibyo yavuze !

5.Muri gahunda yo gushyiraho umutwe w’ingabo zizarwanya M23 kandi zikajya no kumupaka w’ibihugu by’u Rwanda na Congo na Uganda, inama y’abaministre b’ingabo b’u Rwanda na Congo yabereye i Goma ivuga ko izo ngabo zizajya mu duce turi inyuma y’utwo M23 igenzura ubu (muri Congo imbere) bityo M23 ikagumana aho yafashe haruta u Rwanda kure kandi hari n’amabuye y’agaciro kuburyo M23 izafatwa nk’umutwe wemewe na Leta u Rwanda narwo rugakomeza kwisahurira ayo mabuye bityo Congo ikaba inyazwe igice cy’ubutaka bwayo ! Abacongomani benshi baratinya ko Joseph Kabila ashobora kuzemera uwo mwanzuro w’abakuru b’ingabo ! Ubu umutwe wa M23 watangiye gahunda yo gukomeza inzego mu gace wafashe ukaba umaze no gushyiraho leta ! Sibwo buhoro buhoro Kivu ibaye u Rwanda !!

Ni ukubitega amaso , ababishoboye mwirebere iyi video :

Ngoga Jean Veritasinfo