Congo - Kinshasa: Uyu Ministre wa Congo azabara inkuru ya FDLR !!

Minisitiri w’amashuri makuru na za kaminuza muri Repubulika Iharanira Demokarasi ya Congo, Dr. Léonard Mashako Mamba, kuwa Gatandatu tariki ya 7 Gicurasi 2011 yagabweho ibitero n’inyeshyamba za FDLR mu Burasirazuba bwa Congo-Kinshasa, aho yasahuwe ibyo yari afite. Abantu batatu mu bo bari kumwe bahasize ubuzima.

Uyu muminisitiri yari yerekeje mu ntara ya Kivu y’Amajyaruguru, aho yari agiye kwiyandikisha kuri lisiti y’itora. Ni mu bilometero nka 20 uvuye mu Mujyi wa Goma, mu gace ka Rusthuru niho iki gitero cyabereye. Bakigera muri ako gace, imodoka zari ziherekeje uyu mu minisitiri zamishweho amasasu.

Avuye i Rusthuru, Minisitiri Mashako yabwiye abanyamakuru ku kibuga cy’indege cya Goma, ati: “Hari mu ma saa kumi z’umugoroba(ku isaha yo muri Congo) ubwo twageraga i Katwiguru(Rusthuru), twasanze umuhanda ufunze, ako kanya abantu baturutse mu gihuru hafi aho, batangira kuturasaho”.

Minisitiri Mashako yemeje ko umushoferi we n’umwe mu bapolisi bamurinda basize ubuzima muri iki gitero (abantu batatu baguye muri iki gitero, abandi batatu bakomeretse ariko ubu bamaze gusohoka mu bitaro). Ku ruhande rwe ibi bikorwa yabishinje Ingabo z’umutwe wa FDLR ko ari zo zabikoze.

Mashako yabwiye BBC ko izi nyeshyamba zavugaga mu ndimi ebyiri, Ikinyarwanda n’Igiswayiri. Ati “Bavugaga mu ndimi ebyiri, kuko baduhaga amategeko mu rurimi rw’Igiswayiri, ariko hagati yabo baganiraga mu rurimi rw’Ikinyarwanda”. Dr Mamba yashimangiye ko nta kabuza abo babateye ari inyeshyamba za FDLR.

Umuvugizi wa Leta ya Congo, Lambert Mende Omalanga yatangaje ko izo nyeshyamba nyuma yo gusahura imodoka eshanu zari ziherekeje Dr. Mashako zahise nawe zimurekurana n’abo bari kumwe bakomeza urugendo bajya aho bagombaga kwiyandikisha kuri lisiti y’itora.

Kugeza ubu ariko abayobozi ba gisivili cyangwa ba gisirikare ba FDLR ntabwo baragira icyo batangaza kuri iki gitero bashinjwa ko bagabye kuri Minisitiri wa Congo.

Kuri iki Cyumweru taliki ya 8 Gisurasi, Mashako yagize ati: “Ikibazo cy’umutekano muke kigomba gusaba ubufatanye bw’abantu bose, by’umwihariko abayobozi bagomba gukaza umutekano w’abaturage kugira ngo bagire ituze hirya no hino mu gihugu”.

Rusthuru niho uyu mu Minisitiri atorera, akaba yarigeze kuba intumwa ya rubanda mu nteko ishinga amategeko ya Congo mbere yo kwinjira muri Guverinoma.

Muri Gashyantare uyu mwaka nibwo inyeshyamba zigera kuri 700 za FDLR zagabye igitero ku mutwe w’abasivili ushinzwe kurinda pariki, uwitwa Muhindo Mburungani ahasiga ubuzima nyuma yo kuraswa amasasu abiri mu gituza. Amasasu kandi yafashe umushoferi w’ abarinzi ba pariki amukomeretsa mu mutwe n’ukuboko amusiga ari intere.

Izi nyeshyamba za FDLR uretse kuba ziregwa ko harimo benshi basize bakoze Jenoside muri Mata 1994 mu Rwanda, ziranaregwa ibikorwa byo gusahura ndetse no gufata abagore ku ngufu muri Repubulika Iharanira Demokarasi ya Congo, nabyo Umuyobozi wabo Mukuru Ignace Murwanashyaka akurikiranyweho aho ari kuburanira mu gihugu cy'u Budage.

NDL: Umuvugizi wa FDLR Raforge Fils Bajeye arabeshyuza iyi nkuru akavuga ko ari propagande yo kubasebya nkuko byumvikanye kuri radiyo mpuzamahanga ya BBC kuri uyu mugoroba taliki ya 09 Gicurasi 2011. Ngo FDLR nta mpamvu yo kugaba ibitero kuri Ministre wa Congo, ngo aho bari muri Congo birwanaho gusa ntabwo bagaba ibitero .

Hejuru ku ifoto:Minisitiri Léonard Mashako Mamba

(Source : igihe.com )