Burundi: Perezida Pierre Nkurunziza agejeje imbere y'ubutabera umunyamategeko Bernard Maingain n'umwanditsi David Gakunzi!

Umunyamategeko "Bernard Maingain" n'umwanditsi "David Gakunzi" bategetswe kwitaba urukiko rw'i Paris mu Bufaransa, ruburanisha ibyaha by'urugomo n'ubugome; bakaba bagomba kwitaba urwo rukiko  mu mpera z'ukwezi kwa Mutarama 2019. Abo bagabo bombi barezwe na leta y'Uburundi, bakaba bazajya kuburana imbere y'urukiko  ibyaha baregwa byo "Guharabika k'ubushake no gusebya umukuru w'igihugu cy'Uburundi na leta y'Uburundi" mu kiganiro cyatambukijwe na "Televiziyo France 3" ikorera mu gihugu cy'Ubufaransa; icyo kiganiro kikaba cyarahitishijwe kuri iyo televiziyo mu kwezi kwa Mbere mu mwaka w'2016 kandi iyo televiziyo nayo ikaba iri mu baregwa n'Uburundi. 

Ku mataliki ya 24 na 25 Mutarama 2019, nibwo umunyamategeko Bernard Maingain, umwanditsi David Gakunzi na Televiziyo "France3" bazisobanura imbere y'urukiko rw'i Paris mu Bufaransa ku byaha byo gusebya no guharabika umukuru w'igihugu na leta y'Uburundi. Guhera mu mwaka w'2015, abo baregwa uko ari 3, bahagurukiye ibikorwa byo kunenga itorwa rya Perezida Pierre Nkurunziza bavuga ko ngo yitoresheje muri manda ya gatatu itemewe n'itegeko nshinga ry'igihugu cy'Uburundi. Umunyamategeko Maingain ashinjwa na leta y'Uburundi kwibasira icyo gihugu abinyujije mu butabera naho umwanditsi David Gakunzi akifashisha itangazamakuru.

Amakuru "veritasinfo" ikesha ikinyamakuru "Jeune Afrique" yemeza ko icyemezo cyo kuburanisha umunyamategeko Bernard Maingain, Umwanditsi David Gakunzi n'abanyamakuru ba France 3 aribo Delphine Ernotte (Umuyobozi wa televiziyo France 3) na Luc Lagun-Bouchet, urukiko rwemeje uwo mwanzuro italiki ya 14 z'ukwezi kwa Kane 2017. Abo bose bakaba bashinjwa gukora icyaha cyangwa se kuba ibyitso by'abakoze icyaha cyo "gutuka mu ruhame umuntu ku giti cye" (délit de diffamation publique envers un particulier). Icyo cyaha kikaba cyarakorewe mu kiganiro cyatambutse kuri televiziyo "France 3" ku italiki ya 13/01/2016 cyiswe: "le Burundi en proie à des violences extrêmes".

Muri icyo kiganiro, hahitishijwemo amashusho (vidéo) yerekanaga ibikorwa by'ubugome bukabije, bakavuga ko ibyo bikorwa byarimo bikorwa na leta y'Uburundi mu majyaruguru ashyira iburasirazuba bw'umujyi wa Bujumbura mu karere kitwa "Karuzi". Muri icyo kiganiro basobanuraga ko ibyo bikorwa by'ubwicanyi biri gukorerwa abanyepolitiki batavuga rumwe na Petero Nkurunziza. Icyemezo cy'urukiko rw'i Paris gihamagara abarezwe na leta y'Uburundi kikaba gihamya ko icyo kiganiro kerekaniwemo ayo mashusho cyari kigamije "guharabika no kwambika isura mbi Perezida Petero Nkurunziza, hagamijwe kwanduza icyubahiro cye".

Leta y'Uburundi,ishinja umunyamategeko Bernard Maingain kuba ariwe wahimbye ayo mashusho (vidéo) akanagerekaho no kuyazana kuri televiziyo muri icyo kiganiro cyasebyaga Nkurunziza. Isesengura ryakorewe ayo mashusho (vidéo) ryerekanye ko abantu bagaragara muri ayo mashusho batavugaga ururimi rw'ikirundi, ahubwo bavugaga ururimi rw'igihawusa ( l'haussa) ruwuga mu bihugu by'Afurika y'iburengerazuba; ibyo bikaba bigaragaza ko ayo mashusho atafatiwe mu gihugu cy'Uburundi. leta y'Uburundi kandi ishinja umunyamategeko Bernard Maingain uburanira abasilikare 4 bashinjwa icyaha cyo gushaka guhirika leta y'Uburundi ko nawe yari mu gikorwa cyo guhirika ubutegetsi bw'i burundi afatanyije n'abo basilikare! Naho umwanditsi David Gakunzi akaba ashinjwa na leta y'Uburundi gukwirakwiza mu binyamakuru binyuranye ibinyoma biharabika leta y'Uburundi bishingiye ku mashusho yahimbwe n'umunyamategeko Bernard Maingain kandi akemeza ko ari ukuri!

Leta y'Uburundi ishinja abanyamakuru ba France 3 gutambutsa amakuru y'ibihuha kandi aharabika leta y'Uburundi n'umukuru w'igihugu babizi neza kandi babishaka! Si ubwa mbere abakuru b'ibihugu cyangwa leta zo muri Afurika barega mu nkiko z'i Paris. Mu karere k'ibiyaga bigari na Paul Kagame uyoboye u Rwanda yigeze kurega umunyamakuru "Charles Onana" mu rukiko rw'i Paris amushinja ko yamuharabitse akamushinja guhanura indege ya Habyarimana Juvénal kandi ari umwere! Kagame yabonye ko urwo rubanza ruzamukubita hasi akura ikirego cye mu rukiko! Petero Nkurunziza na leta y'Uburundi nabo bafashe icyemezo cyo kuregera urukiko rw'i Paris, twizere ko  bazakomeza urubanza ntibakuremo ikirego!

Twakwibutsa abasomyi ba "veritasinfo" ko uyu munyamategeko Bernard Maingain ariwe uburanira Paul Kagame ku kirego cyo guhanura indege ya Habyarimana Juvénal yaguyemo na Perezida Cyprien Ntaryamira w'Uburundi; uyu munyamategeko Maingain kandi yifashishije ayo mashusho yahimbye ayajyana mu rukiko mpuzamahanga mpanabyaha CPI ruri i La Haye mu gihugu cy'Ubuholandi ; arega Perezida Nkurunziza na leta y'Uburundi ko bari gukora jenoside mu Burundi! Nk'uko jenoside yo mu Rwanda yabaye igicuruzwa cyiza cyo kugundira ubutegetsi niko no mu Burundi hifuzwa jenoside kugirango ibe inzira y'ubusamo yo kugera ku butegetsi!

Leta y'Uburundi yemeza ko ikirego yatanze mu rukiko rw'i Paris kizaburanishwa, ariko nta bindi bisobanuro itanga kuri icyo kibazo.

veritasinfo