Igihugu cy’u Rwanda gishobora guterwa n’«umuzimu w’umugwagasi »! (Cassien Ntamuhanga)
Abantu barapfa ariko ukuri ntigupfa
«Byumvikane neza rero, ntabwo mu byukuri twazize ko twavuganye n’abantu bo muri RNC, ahubwo nkanjye nk’umunyamakuru,nka Gérard w’umunyamakuru ndetse akaba n’umwigisha, Kizito nk’umuhanzi ; twazize ko twifuzaga kugaragaza ukuri kw’ibibazo by’u Rwanda, mu gihe leta yo ishaka ko ariyo ijya ibyivugira, ikavuga ibyo ishaka kabone naho byaba akenshi na kenshi ari ibintu by’ibinyoma yihimbiye » (Ntamuhanga Cassien).
Kizito Mihigo, Niyomugabo Gerard n’umunyamakuru Cassien Ntamuhanga bambitse ubusa politiki y’ikinyoma ya FPR Kagame yo kubeshya ko mu Rwanda hari ubwiyunge! Kuva aho umunyamakuru Cassien Ntamuhanga ashoboreye gutoroka Geraza ya Kagame, agahungira mu gihugu cy’amahanga yagize ibanga kubera impamvu z’umutekano we, yashoboye gushyira ahagaragara icyatumye we ubwe, kimwe na Kizito Mihigo bafungwa, naho Niyomugabo Gérard akicwa. Ntamuhanga cassien yavuze amazina y’abishe Niyomugabo Gerard, asobanura uburyo we na Kizito Mihigo bafunzwemo n’inyerezwa ry’abavandimwe be ryakozwe na FPR Kagame,ibyo bikaba aribyo byatumye afata icyemezo cyo gutoroka gereza!
Ku italiki 6 Mata 2014 nibwo Kizito Mihigo yashimuswe n’igipolisi cya Kagame, gikurikizaho Niyomugabo Gerard na Ntamuhanga Cassien. Ishimutwa ry’aba bagabo ryakozwe na FPR rikaba ryarahuriranye n’iyibukwa ry’urupfu rwa Perezida Habyarimana Juvénal wahanuwe mu ndege ku italiki ya 6 Mata 1994 ; ihanurwa ry’iyo ndege akaba ariryo ryabaye imbarutso ya jenoside mu Rwanda! Kuri iyi taliki ya 6 Mata 2018 hakaba hibukwa imyaka 24 jenoside ibaye mu Rwanda. Mu mwaka w’2014, mbere gato yo kwibuka ku ncuro ya 20 jenoside ibaye mu Rwanda ; Kizito Mihigo na Niyomugabo Gérard batangiye uburyo bushya bwo kugeza ibiganiro ku banyarwanda bigendanye no kwibuka jenoside ndetse no kunga umuryango nyarwanda, ibyo biganiro bikaba byarahawe izina« Ityazo ». Ibyo biganiro umunyamakuru Ntamuhanga Cassien yabigezaga kuri rubanda abanyujije kuri radiyo «Amazing Grace».
Ushobora kwica umuntu ariko ntushobora kwica «ukuri yavuze » !
Jenoside yabaye mu Rwanda ntabwo Kagame ashaka ko abahanga bayikoraho ubushakashatsi, ngo bamenye icyayiteye n’uburyo abanyarwanda bagomba kwirinda ngo batazongera kugwa muri ayo mahano ! Imwe mu mpamvu ikomeye cyane ituma Kagame adashaka ko hakorwa ubushashatsi ndetse n’isesengurwa rya jenoside y’u Rwanda ni uko ariwe wayiteye ndetse akanayikora! Kubera iyo mpamvu kuvuga kuri jenoside y’u Rwanda bifatwa nka kirazira, nyamara se kuyiceceka bizatuma ukuri kuriyo kuvaho cyangwa kwibagirana? Umuhanzi Kizito Mihigo n’umushakashatsi Niyomugabo Gérard nta kindi bazize uretse kuvuga ukuri kuri jenoside no gushaka kunga umuryango nyarwanda !Kizito Mihigo na Niyomugabo Gérard bagiraga bati :
[«Igihe cy’icyunamo si igihe cyo gushakisha urusha undi amakosa, ahubwo ni igihe cyo gushakisha inyungu rusange. Icyunamo ni igihe cy’ubumwe, kigomba kuba igihe cyo gushyira hamwe. Abanyarwanda bagomba kuzamuka mu myumvire batarageraho kuko iyo icyunamo gitangiye mu Rwanda abantu bamwe bahunga igihugu abandi bagatangira kugishakamo inyungu zigendanye nacyo ! Jenoside yakorewe abatutsi ntabwo ari ishyano ryagwiriye abatutsi, ahubwo ni ishyano ryagwiriye u Rwanda. Igihe abatutsi barimo bicwa hari abantu barimo babica, abo barimo babica nabo ni ishyano ! Ntabwo igihugu cyatakaje abantu bapfuye gusa cyanatakaje abantu babishe. Abantu bagomba kumva ko abari barabanje gupfa ari abishe abantu, bagomba kumva ko abantu bishe abantu bari bafite ikibazo ; ntabwo mu gihe cyo kwibuka ari ugufata jenoside ukayikoreza abantu runaka ! Mbere yo kureba ikibazo cyatejwe n’uwakoze jenoside ni ngombwa kureba ikibazo yari afite cyatumye ayikora ! Igihe cyo kwibuka ntabwo ari igihe cyo gushinja (culpabiliser) abahutu, ahubwo ni igihe cyo kureba ikibazo abahutu nabo bari bafite muri icyo gihe !... »]
Aya magambo yuzuye ukuri n’ubushishozi yakoze ku mutima wa Kagame atanga itegeko ryo kunyereza Kizito Mihigo na Niyomugabo Gérard kuko yumvaga bamucira urubanza ! Kizito yaratotejwe yishinja ibyaha bamuhimbiye, Niyomugabo Gérard yanze kubyemera baramwica! Abashimuse Niyomugabo akaba ari nabo bamuhitanye ni Rukara Justin DPS w’akarere ka Nyanza wamuvanye mu rugo na Rwanyindo Odald wamwambuye mudasobwa nto na telefoni ye ! Ntamuhanga Cassien yemeza ko yafungiwe mu nzu imwe na Niyomugabo mu gihe kingana n’icyumweru ! Ntamuhanga yemeza ko kuba abacitse ku icumu bari batangiye kumva uburemere bw’ubwicanyi bwabaye mu Rwanda ndetse bukagera no kurundi ruhande, ariko ibyo ubutegetsi bwa FPR bukaba butarashatse ko bikorwa bugahita bubapfukirana ! Cassien Ntamuhanga avuga ko kuba mu Rwanda hari abantu badashyinguwe ngo « rushobora guterwa n’umuzimu w’umugwagasi », kandi ibyo nabyo kubivuga mu Rwanda ngo uba ukoze icyaha cyagucisha umutwe !
Ntamuhanga Cassien bamujyanye ku Rusumo incuro 2 mu rwego rwo kumutera ubwoba ko ashobora kugaburirwa ingona ! Cassien Ntamuhanga yababajwe cyane no kubona barumuna be 3 barashimuswe: Ngabo, Mutuyimana na Ngabonziza, bakaba barashimuswe ku italiki 4/10/2016 ! Ishimutwa rya barumuna be akaba atarashoboye kuryihanganira bigatuma atekereza uburyo bwo gusohoka muri gereza. Ntamuhanga Cassien avuga ko atacitse ubutabera kuko mu Rwanda ntabuhari !
veritasinfo