Burundi :CNDD FDD irasaba leta y’icyo gihugu kubaza u Rwanda ibyerekeranye n’urupfu rwa perezida Ntaryamira!
Perezida Nkurunziza n'umufasha we bibutse ku ncuro ya 23 urupfu rwa Cyprien Ntaryamira.
Ku mugoroba wo kuwa gatatu taliki ya 06 Mata 1994 saa mbiri n’igice za ni mugoroba, nibwo ishyano ryaguye mu Rwanda. Kuri iyo taliki no kuri iyo saha, nibwo indege yari itwaye umukuru w’igihugu cy’u Rwanda Juvénal Habyarimana ari kumwe na Perezida w’Uburundi Cyprien Ntaryamira, yarashwe iri hafi yo kugwa ku kibuga cy’indege k’i Kanombe i Kigali ivuye I Dar-es salaam muri Tanzaniya. Abari muri iyo ndege bose bahise bitaba Imana, nta numwe warokotse. Iyo ndege yaguyemo kandi abadelevu b’iyo ndege b’abafaransa n’abanyacyubahiro bari kumwe n’abo ba perezida bombi. Ihanurwa ry’iyo ndege rifatwa n’umuryango mpuzamahanga w’abibumbye ONU ko ariyo mbarutso ya jenoside mu Rwanda.
Kuri iyi taliki ya 06 Mata 2017, leta y’u Burundi ikaba yibutse imyaka 23 Perezida w’icyo gihugu Cyprien Ntaryamira amaze yiciwe mu Rwanda aguye muri iyo ndege. Mu muhango wo kwibuka kuri iyo ncuro ya 23 mu Burundi, ishyaka riri ku butegetsi CNDD FDD ryongeye gusaba leta y’Uburundi gusaba leta y’u Rwanda kugaragaza abishe perezida Ntaryamira kandi bakagezwa imbere y’ubutabera. Ishyaka CNDD FDD rinenga amahanga ko yirengagije urupfu rwa Perezida w’Uburundi mu Rwanda kandi rigasaba ko imiryango y’abarundi ifite abantu bayo baguye muri iyo ndege nayo yahabwa impozamarira zingana nizahawe imiryango y’abanyarwanda n’abafaransa nabo batakaje ababo bari muri iyo ndege.
Leta y’Uburundi isanga bigoranye gusaba u Rwanda kugaragaza ukuri ku rupfu rwa Ntaryamira mu gihe umubano w’ibihugu byombi wifashe nabi muri iki gihe, ariko amaherezo u Rwanda rukaba ruzashyira rukagaragaza ukuri ku rupfu rwa Ntaryamira. Leta ya Paul Kagame ivuga ko indege yari itwaye abo bakuru b’ibihugu byombi yahanuwe n’intagindwa z’abahutu, ariko ntivuge amazina y’izo ntagondwa izo arizo! Ikindi gikomeza gutera urwicyekwe kuri icyo gikorwa kiterabwoba, ni uko leta ya Paul Kagame mu Rwanda ikora ibishoboka byose kugirango iburizemo iperereza ry’abafaransa bashaka kumenya abahanuye iyo ndege ! Abantu bakaba bakomeje kwibaza impamvu Paul Kagame akingira ikibaba abahutu b’intagondwa bakoze iryo shyano, ntibashobore kumenyekana ! Urukiko rwa ONU rwa TPIR rwari Arusha narwo rwafunze imiryango yarwo rudashoboye gukora iperereza ryo kumenya abakomye imbarutso ya jenoside mu Rwanda bahanura iriya ndege ! Gusa abashinja cyaha b’urwo rukiko bemeza ko Paul Kagame yabangamiye ibikorwa byo gukora anketi yo kumenya abahanuye iyo ndege ! Ikindi leta ya Paul Kagame igomba kumenya, ni uko iriya ndege yahanurwa n’interahamwe cyangwa inkotanyi, abo bose bakoze iryo shyano ari abanyarwanda, leta y’Uburundi ikaba igomba kubaza u Rwanda ibyerekeranye n’urupfu rw’umuperezida w’Uburundi wishwe n’abanyarwanda! Uretse Leta y’Uburundi, abanyarwanda nabo ntibavuga rumwe ku ihanurwa ry’iriya ndege, ndetse n’italiki yo kwibuka abahitanywe na jenoside ntibayivugaho rumwe! Bwana Faustin Twagiramungu, umunyepolitiki w’inararibonye kandi watakaje abantu benshi muri jenoside yo mu Rwanda, yanditse ku rukuta rwe rwa twitter amagambo akurikira, yagize ati :
«Mu mezi 3 gusa, mu mwaka w’1994, interahamwe zo muri MRND n’inkotanyi zo muri FPR, barwaniraga gufata ubutegetsi bica miriyoni irenga y’abaturage ONU irebera! Nyamara, Ministre w’intebe w’igihugu cya Libani, Hariri yarishwe mu mwaka w’2000 ; ONU yahise itegeka ko haba iperereza mpuzamahanga ryo kumenya abamwishe ! Kandi iyo ONU ntacyo yakoze ku baperezida 2 b’abanyafurika biciwe mu Rwanda mu mwaka w’1994! Niba ingabo za MINUAR zari ziyobowe na Jenerali Romeo Dallaire mu Rwanda, mu mwaka w’1994, zikaba zari zishinzwe umutekano w’abaturage koko, ONU igomba gukoresha iperereza mpuzamahanga ryo kumenya abishe Perezida Habyarimana Juvénal !».
Abanyarwanda mu Bubiligi nabo bibutse jenoside ku italiki ya 6 Mata
Abandi banyarwanda benshi bari mu gihugu cy’Ububiligi bibumbiye mu mashyaka no mu mashyirahamwe anyuranye, nabo bakoze urugendo rwo kwibuka imyaka 23 habaye jenoside mu Rwanda. Abanyarwanda bari mu Bubiligi bahisemo kujya bibuka jenoside ku italiki ya 06 Mata buri mwaka kuko ariyo taliki nyirizana iyo jenoside yatangiriyeho, ubwo indege ya Perezida Habyariamana Juvénal yaraswaga ! Mu ijoro ryo kuwa 6 Mata 1994, indege ikimara guhanurwa abanyarwanda bo mu bwoko bwose barishwe ! Niba Leta ya FPR Kagame yibuka abishwe guhera ku italiki ya 07 Mata, ni uko abapfuye mbere y’iyo taliki itabibuka, iryo akaba ari ivangura ry’abapfuye ritagomba gushyigikirwa ! Urwo rugendo rwateguwe n’ikigo giharanira guca akarengane mu Rwanda kitwa CLIIR. Umuyobozi w’icyo kigo, impirimbanyi Joseph Matata, yafashe ijambo abwira abitabiriye urwo rugendo impamvu bibuka taliki ya 6 Mata buri mwaka jenoside yakorewe abanyarwanda, Matata yagize ati :«Uyu munsi ni ku ncuro ya 12 tuje kwibuka abanyarwanda bose : Abahutu, Abatwa, Abatutsi, bapfuye bazira icyo baricyo. Twanze ko mu Rwanda bakomeza kubavangura, duhitamo ko twebwe tuzajya tubibuka bose. Ngirango amateka arimo yerekana ko twahisemo neza, kuko n’amashyaka muri rusange nayo asigaye asabira bose. Nubwo tubikora ku mataliki atandukanye, ariko tuzi neza ko igihe kizagera tukumvikana ku italiki imwe, sinshidikanya ko itazaba iyi ngiyi kuko niyo yateje byose (…) ».
Ni ubwo ubutegetsi bwagira imbaraga ziterura imisozi, ntabwo bushobora guhindura italiki umuntu yavukiyeho cyangwa iyo yapfiriyeho ! Abantu benshi bakaba bibaza ibyo FPR iba irimo yirengagiza italiki ya 06 Mata jenoside yatangiriyeho mu Rwanda bikabayobera!
Veritasinfo