icyemezo cya Petero Nkurunziza cyo kutaziyamamaza mu 2020, gitunguye abantu nk'icyo Zinedine Zidane yafashe yegura muri Real Madrid!
Petero Nkurunziza akina politiki nk'uko akina umupira! We na Zidane bazajya mu mateka!
Hashize icyumweru, ubwo umutoza w'ikipe y'umupira w'amaguru ya Real Madrid ariwe Zinedine Zidane afashe icyemezo gitunguranye imbere y'abanyamakuru kuwa kane taliki ya 31/05/2018, Kuri uwo munsi yatangaje ko yeguye ku mwanya wo gutoza iyo kipe! Nyamara Zinedine Zidane akaba ariwe mu toza wa mbere ku isi, watoje ikipe igatwara igikombe gikomeye cy'umupira w'amaguru i Burayi incuro 3 zikurikiranyije! Kuri uyu wa Kane taliki ya 07/06/2018, umukuru w'igihugu cy'Uburundi Pierre Nkurunziza nawe yafashe icyemezo cya tunguye benshi; mu ijambo yavuze ubwo yari amaze gushyira umukono no gutangaza itegeko nshinga rishya ry'igihugu cy'Uburundi! Muri Afurika Nkurunziza niwe ubaye Perezida wa mbere ukoresheje itora rya Kamarampaka ryo guhindura itegeko nshinga ryongerera ububasha umukuru w'igihugu, ku munsi wo kurishyiraho umukono, akaba aribwo avuga ko ataziyamamariza manda nshya yemerwa n'iryo tegeko! Ibigwi bya Zidane na Nkurunziza bikaba bizandikwa mu mateka!
Abantu benshi batunguwe n'icyemezo cya Nkurunziza cyo kutaziyamamaza mu mwaka w'2020, bamwe babifashe nk'ikinyoma cyane ko Paul Kagame yahakanye incuro zirenga 5 ko ataziyamamaza mu mwaka w'2017, ariko mu mayeri menshi agahindura itegeko nshinga, akiha manda idasobanutse kandi akabeshya amahanga ko abanyarwanda aribo bamusabye gukomeza kuyobora! Uko byagenda kose, abantu benshi batunguwe n'uko Nkurunziza yavuze ko ataziyamamaza. Mu ijambo yagejeje kubanyagihugu ari i Bugendana mu ntara ya Gitega; ubwo yari amaze gushyira umukono no gutangaza itegeko nshinga rishya ry'Uburundi, Nkurunziza yagize ati:
Mu mwaka w'2015, Nkurunziza yatsinze amatora yo kuba umukuru w'igihugu kuri manda yakuruye impaka ndende muri politiki y'Uburundi. Kuva Nkurunziza yatorerwa iyo manda yahanganye n'imvururu zaterwaga n'abadashyigikiye ubutegetsi bwe ariko izo mvururu akaba yarashoboye kuzihosha. Nkurunziza yashoboye kandi no kuburizamo abashatse guhirika ubutegetsi bwe bakoresheje intwaro. Ibyo byose bikaba byarahaye Nkurunziza uburyo bwo kuvugurura inzego z'ubuyobozi bw'igihugu n'igisilkare , ndetse bituma ashobora no gutegura itegeko nshinga rishya rihuza amasezerano y'amahoro y'Arusha n'itegeko nshinga ryari risanzweho! Ibi byose byakorwaga mu nyungu zo gushimangira inzego zikomeye z'ubutegetsi bw'Uburundi abantu benshi bagatekereza ko ari Nkurunziza uri gutegura uburyo agomba kugundira ubutegetsi ubuziraherezo!
Icyemezo cya Nkurunziza cyo kutaziyamamaza mu mwaka w'2020 kikaba cyatunguye abantu benshi kuburyo umwe mubanyepolitiki batavuga rumwe na Nkurunziza atasobanukiwe impamvu Nkurunziza yakoze biriya byose none akaba avuze ko ataziyamamaza! Twizereko Nkurunziza atazabeshya isi yose nka Paul Kagame, ahubwo akazashyira mu bikorwa icyemezo yafashe cyo guteza imbere demokarasi y'Uburundi no gushimangira umuco mwiza wo gusimburana ku butegetsi mu mahoro!
veritasinfo.fr