Burundi : Imodoka ya Général Adolphe Nshimirimana yagabweho igitero kiramuhitana !

Publié le 2 août 2015 par veritas

Général Adolphe Nshimirimana

21H50: Kubera iyicwa rya Général Adolphe Nshimirimana , Perezida Pierre Nkurunziza yagejeje ijambo kubanyagihugu, akaba yahaye ubucamanza bw'icyo gihugu igihe kingana n'icyumweru kimwe gusa buka bumaze kugaragaza abicanyi ba Général Adolphe Nshimirimana! Nkurunziza yasabye abarundi gutuza muri ibi bihe bahanganye n'umwanzi.

15H35: Iyicwa rya Général Adolphe Nshimirimana rishobora gukurikirwa ni imvururu niba abarundi batitonze! Abantu benshi i Bujumbura bafite ubwoba bw'ibintu bishobora gukurikira uru rupfu cyane ko abantu bishe uyu musilikare mukuru bataramenyekana bakaba bashobora no gukomeza gukora ibindi bikorwa bibi. Mu mujyi wa Bujumbura hari ubwoba bumeze nk'ubwo mu gihe cy'intambara. Nyuma y'urupfu rwa général Adolphe, abashinzwe umutekano bahagaritse lieutenant-colonel Michel Ndenzako, Commandant w'ikigo cya gisilikare cya Ngagara; igikorwa cyo kumuhagarika cyabereye hafi ya kiliziya "Bon berger" iri mu Ngagara; yambuwe intwaro yari afite kimwe n'abamurinda, akaba yajyanwe mu biro bishinzwe iperereza, bikaba bivugwa ko akigera muri ibyo biro yakubiswe inkoni nyinshi, nyuma aza kurekurwa ubu akaba ari kwivuriza mu bitaro bya gisilikare bya Kamenge.

15H00: Mu gihe umunyamakuru wa radiyo mpuzamahanga y'abafaransa RFI ukorera i Bujumbura Esdras Ndikumana yari atangiye gufata amafoto y'aho imodoka ya Général Adolphe Nshimirimana yarasiwe, yahise atabwa muri yombi n'abashinzwe umutekano mu Burundi. Uwo munyamakuru bamujyanye mu biro bishinzwe ubutasi maze bamukubita inkoni nk'iz'akabwana, nyuma baramurekura ubu akaba ari mu kwivuza mu bitaro by'i Bujumbura kuko urutoki rwe rwavunitse kuburyo bukomeye! Abo bafashe uwo munyamakuru bamushinjaga kuba ari "umunyamakuru w'umwanzi w'igihugu"; radiyo mpuzamahanga RFI yahise ihamagara mu biro bya perezida Nkurunziza kugira ngo imugaragarize akababaro yatewe n'ifatwa ndetse no gukubitwa byakorewe umunyamakuru wayo.

12H15: Ubuhamya buri gutangwa n'ababonye imodoka ya Gén.Adolphe Nshimirimana iraswa buremeza ko yarashwe n'imodoka irimo ingabo z'u Burundi. Umwe mubabihagazeho yagejeje kuri "veritasinfo" ubuhamya buteye butya: "Adolphe ahejeje kuraswa nuko yamaze gucikana naba AT2. Uko vyagenze nuku haje pick up yigisoda iramudubura, igeze ku metero nka cumi, uwarafise roket aca arayitera imodoka ira irasambuka aracikana nabo abandi 2 barakomereka.Iyo modoka yarashe yaciye ibandanya.

Uko imodoka ya gén. Adolphe yarashwe n'umurambo we werekana aho yakomeretse

Mu gitondo cyo kuri iki cyumweru taliki ya 02/08/2015, umuhanda wa 1 (RN1) wafunzwe. Iryo fungwa ryaturutse ku mpamvu y’uko ibisasu bibiri bikomeye byo mu bwoko bwa roquette byarasiwe kuri uwo muhanda bigafata imodoka ya Général Adolphe Nshimirimana wigeze kuyobora ibiro by’igihugu bishinzwe iperereza bita SNR.

Abantu bari muri iyo modoka kimwe n’abari bahegereye bataramenyekana umubare bapfuye kubera icyo gitero. Nkuko bitangazwa n’ibiro by’abanyamakuru bigenga i Burundi icyo gitero cyokomerekeje n’abandi bantu benshi ; bamwe mubarwaza bo kubitaro byitwa « Roi Khaled » bari hafi yaho icyo gitero cyabereye nabo bapfuye abandi barakomereka. Bamwe mu nkomere bakaba boherejwe mu bitaro.

Pacifique Ninahanzwe, umwe mubayoboye imyigaragambyo yamagana manda ya gatatu ya Nkurunziza yatangaje k’urubuga rwe rwa facebook ko Général Adolphe Nshimirimana yahitanywe n’icyo gitero cyagabwe ku modoka ye cyabereye mu Kamenge. Umukobwa wa Général Alain Guillaume Bunyoni nawe aremeza ko Général Adolphe Nshimirimana yaguye muri icyo gitero cyagabwe ku isaha ya saa mbiri za mu gitondo n’iminota 45.

Iki gitero kibaye mu gihe abanyepolitiki b’imbere mu gihugu kimwe n’abanyepolitiki baba hanze y’u Burundi bamaze iminsi 2 bateraniye mu gihugu cya Ethiopie mu nama y’ibanga rikomeye, bakaba barashyizeho urwego bahuriyeho bose bise Rnarec rwiyemeje ko amasezerano y’Arusha n’itegeko nshinga byubahirizwa uko byakabaye. Uru rwego ruvuga ko niba Nkurunziza akomeje gukoresha imbaraga narwo ruzagera aho rugafata intwaro. Abagize urwo rwego rw’Rnarec harimo n’abahoze ari abakuru b’igihugu cy’u Burundi batoye Léonard Nyangoma washinze CNDD kuyobora iryo huriro ryabo.

Source : SOS médias burundais