Burundi : Umugore w’Agathon RWASA amaze kurusimbuka!

Publié le 15 mars 2015 par veritas

Agathon Rwasa wambaye ikote ry'ubururu

Kuri uyu munsi wo ku cyumweru taliki ya 15 Werurwe 2015 umufasha w’umunyepolitiki uzwi cyane i Burundi akaba n’umuyobozi w’impirimbanyi w’ishyaka rya FNL Bwana Agathon RWASA amaze gusimbuka urupfu! Ubwo umudame w’uwo munyepolitiki yari mu nzu basukuriramo imisatsi iri muri quartier yitwa Asiatique, umuntu utaramenyekana yamusutseho urusasu akoresheje imbunda, kubw’amahirwe uwo mudame ntiyitabye Imana ahubwo yakomeretse mu mutwe kuburyo budakabije.

Inkuru y’iraswa ry’umugore w’Agathon Rwasa yatangajwe na Bwana Nininahazwe Pacifique kurubuga rwe rwa facebook ariko ikaba yanemejwe na radiyo”Iwacu” ikorera i Burundi; ubu umugore wa Agathon Rwasa akaba yamaze kugera mu bitaro bikuru bya Bujumbura aho ari kwitabwaho n’abaganga. Bwana Nininahazwe Pacifique akaba yavuganye na Bwana Agathon Rwasa wahungabanyijwe cyane n’icyo gikorwa cy’ubwicanyi, akaba yamwihanganishije kuri iyo nkuru mbi y’iraswa ry’umufasha we.

Inkuru nyinshi ziri kuvugwa i Bujumbura nkuko byemezwa na Bwana Nininahazwe Pacifique, ni uko hari gahunda ikomeye yo kwivugana (kwica) Bwana Agathon Rwasa kimwe n’abandi banyepolitiki babangamiye ukwiyamamaza kuri manda ya gatatu kwa Nkurunziza cyane ko n’ubwo yashobora kwiyamamaza muri iyo manda nta mahirwe menshi afite yo gutsinda mu matora Agathon Rwasa nk’uko byerekanywe n’itohoza ryakozwa na radiyo mpuzamahanga y’abafaransa RFI.

Bwana Nininahazwe Pacifique (ku ifoto umuyobozi wa ONG yitwa FOCODE) akaba yamagana yivuye inyuma iterabwoba rikomeje gukorerwa imiryango y’abanyepolitiki batavuga rumwe na Nkurunziza kimwe n’abayobozi b’imiryango itegamiye kuri leta. Bwana Nininahazwe Pacifique aremeza ko mu byumweru 2 bishize, umugore wa Général Niyombare yagombye kwihisha mu iduka ricuruza ibiribwa i Bujumbura yihisha abantu bashakaga kumugirira nabi. Mu kwezi kwa cumi na kumwe 2014 Maman wa Général Bunyoni yagabweho igitero n’abantu bitwaje intwaro iwe mu rugo. Muri uko kwezi kandi urugo rwa Bwana Nininahazwe Pacifique narwo rwaratewe ! Amakuru menshi yatanzwe n’inzego zishinzwe iperereza akaba ahamya ko abo bantu bose bari kugirirwa nabi bikozwe n’abantu bashyigikiye ko Nkurunziza yakwiyamamaza muri manda ya gatatu itemewe n’amategeko kuko babona ko kutaba umukuru w’igihugu kuribo ari ibyago bikomeye kubera ko abakingira ikibaba mu mabi bakora!

Iki gitero kigabwe ku mugore wa Agatho Rwasa, mu gihe Bwana BIGIRIMANA Jacques umuyobozi w’igice cy’ishyaka rya FNL kitandukanyije na Rwasa yatangaje mu nama y’ishyaka yabereye ahitwa i MUTIMBUZI ko igihugu cy’Afurika y’epfo kiyemeje kuba umuhuza wo kunga ibice bihanganye by’ishyaka rya FNL, bityo BIGIRIMANA akaba yaravuze ko bifuza ko Agathon RWASA agamba kuziyamamaza ari umukandida w’ishyaka ryose ryiyunze rya FNL aho kuba umukandida ku giti cye!

Ubu bwicanyi bw’abanyepolitiki mu Burundi buragaragaza umwuka ukomeje kuba mubi utewe na Nkurunziza ukomeje gutsimbarara ku cyemezo cye cyo kwiyamamariza manda ya gatatu kuburyo bishobora no gukurura intambara mu gihugu!

Source : Nininahazwe Pacifique (facebook)