RDC: Loni irasaba ko impunzi 2000 zifungiye mu kigo cya gisilikare cya Nyamuyinyi zitabarwa ku buryo bwihutirwa!

Umuhuzabikorwa w'Umuryango w'abibumbye wa ONU ushinzwe ibikorwa by'ubutabazi Bwana David Mclachlan-Karr yagaragaje impungenge atewe n'uburyo impunzi zirenga ibihumbi bibiri zifungiye mu kigo cya gisilikare cya Nyamuyinyi zibayeho mu buryo bubi cyane, ku buryo impunzi 21 muri izo zimaze kwitaba Imana; izo akaba ari ingaruka z'ibikorwa by'ingabo za Congo FARDC byo guhiga impunzi z'abanyarwanda ziri i Kalehe mu ntara ya Kivu y'amajyepfo.

Uwo muhuzabikorwa wa Loni ushinzwe ibikorwa by'ubutabazi akaba asaba abategetsi ba leta ya Congo kubahiriza uburenganzira bw'ikiremwa-muntu no kubahiriza kuri izo mpunzi zifunze amategeko mpuzamahanga ajyanye n'ibikorwa by'ubutabazi. Ubwo busabe bw'uwo muhuzabikorwa wa Loni bwo gutabariza izo mpunzi yagejeje ku bayobozi ba Congo bukaba bwashyizwe ahagaragara kuri uyu wa gatatu taliki ya 18/12/2019 n'umuvugizi w'agateganyo wa MONUSCO  bwana Mathias Gillman.

Icyo kibazo cy'impungenge zo kutarengera impunzi, cyagaragajwe na David Mclachlan-Karr cyongeye kugarukwaho mu kiganiro cyakozwe mu izina ry'umuryango w'abibumbye ONU, icyo kiganiro kikaba cyari kiyobowe na Bwana Mathias Gillman wasobanuyeko MONUSCO n'Abatabazi batemerewe kujya muri icyo kigo cya gisilikare gifungiyemo izo mpunzi kugirango bazihe ubutabazi zikeneye, yagize ati:

"bitewe n'ibitero bya gisilikare by'ingabo za Repubulikara Iharanira Demokarasi ya Congo, hari impunzi zirenga ibihumbi bibiri zifungiye mu kigo cya gisilikare cya Nyamuyinyi kiri hafi ya Kalehe muri Kivu y'amajyepfo. Tukaba twabonye amakuru atumenyesha ko muri izo mpunzi zihafungiye, izigera kuri 21  zimaze kwitaba Imana bitewe n'uburyo bubi zifunzwemo".

Inkuru ya "radiyo Okapi" yashyizwe mu kinyarwanda na "Veritasinfo".