Rwanda: Abasilikare b'inkotanyi bari kurasirwa muri Nyungwe bagashyingurwa mu ibanga!

Dore igitekerezo gisobanura amayeri ya FPR-Kagame mu ntambara inkotanyi ziri kurwana muri Nyungwe na FLN!

Ingwe yabyaye abana (ibibwana) 3 basa. Umunsi umwe, iyo ngwe yigira inama yo gushaka imbwa izajya iyirerera abana kugira ngo nayo ibone umwanya wo kujya gushaka amahaho. Mu gihe ingwe yabaga yagiye guhiga, imbwa nayo yajya gushaka amagufwa ihekenya! Ikibazo, ni uko mu gihe iyo mbwa yahekenyaga amagufwa, utubaru twayo twatarukaga tukagwa mu jisho ry'umwana w'ingwe agahita apfa! Iyo umwana w'ingwe yapfaga, iyo mbwa yahitaga imutapfuna (ku murya) kugirango izimanganye ibimenyetso! Ku mugoroba ingwe itashye ivuye guhiga, yasaba imbwa kuzana abana ngo bonke.

Bitewe nuko abana b'ingwe basa, imbwa yazanaga  umwana umwe umwe, akonka, noneho mu mwanya w'umwana wapfuye, ya mbwa ikagarura umwana yazanye mbere imwita uwa gatatu, nabwo akongera konka, ingwe ikishima cyane ko abana bayo bameze neza!  Mu gihe hari hasigaye umwana umwe, imbwa yamuzanaga gatatu akonka. Ya ngeso y'imbwa yo guhekenya amagufwa yanze gushira, yongera ijya guhekenya amagufwa, nabwo agataru k'igufwa karasimbuka kagwa mu jisho ry'umwana wa nyuma w'ingwe wari usigaye nawe arapfa! Imbwa yahise imutapfuna, ahasigaye ikizwa n'amaguru ijya kwihisha ku mukecuru w'umupfumu ayihisha mu mutiba!

Ingwe itashye ikubitwa n'inkuba kuko yabuze abana bayo ibura na ya mbwa yabareraga! Byabaye ngombwa ko ingwe ijya kuraguza kuri wa mukecuru w'umupfumu kugirango ayibwire aho imbwa n'abana bayo barengeye! Mu gihe umukecuru yateraga inzunzi, yaburiraga ya mbwa iri mu mutiba, yatera inzuzi avuga ati : "urabe wumva mutimamucye wo mu mutiba!" Amaherezo ariko, ingwe yaje gucakira ya mbwa iyifatiye ku mayezi y'inka yabagiwe mu rutoki rwa wa mukecuru, maze irayica! Iyo niyo nkomoko y'urwango rw'imbwa n'ingwe!

Abanyarwanda bashobora kuzarabukwa abana babo bari mu nkotanyi bashize!

Aya mayeri imbwa yakoreshaga mu kujijisha ingwe mu gihe yarimo yica abana bayo, niyo mayeri kuva cyera Paul Kagame yamwe akoresha yica abana b'abanyarwanda! Muri iki gihe, iyo Kagame avuze abanyarwanda, aba ashaka kuvuga agatsiko k'abatutsi b'indobanure kamugaragiye kandi kamufasha kwica abanyarwanda bandi yahaye izina ry'ibipinga! Abo banyarwanda Kagame yita ibipinga ni abahutu ariko muri iki gihe n'abatutsi bari basanzwe mu gihugu mbere y'1994 Kagame yabahaye iri zina ry'ibipinga ngo kuko batekereza nk'abahutu mbere y'uko akibohoza, naho abatutsi bavuye muri Uganda batavuga rumwe nawe, Kagame yabise "ibigarasha"! Nyamara abo batutsi b'imbere mu gihugu kimwe n'abo yise ibigarasha nibo batanze abana babo kuva mu 1990 kugeza ubu kugirango bicaze Kagame ku ntebe y'ubutegetsi, inyiturano y'abahaye kugeza ubu ngo ukubashora mu ntambara z'urudaca, abandi akabakubita agafuni akabaroha muri Rwaru! aba yujuje wamugani ugira uti" abatutsi basangira amaraso, ntibasangira amata"!  

Abo bana b'abatutsi batangiye gupfa mu 1990 kugeza na nubu baracyakomeje gupfa kandi Kagame ntiyiteguye kunamura icumu ngo abo bana bagire agahenge kuko abahutu batararangira! Kuva Kagame yatangira intambara, ntabwo arigera avuga ko hari abasilikare b'inkotanyi bapfa, abatutsi bamuhaye abana babo bategereje ko bazababona ari bazima none amaso yaheze mu kirere!  Umunsi umwe, ababyeyi b'abatutsi bavuye i Bugande bagiye gutakira Kagame ngo abafashe kuko abana babo baguye ku rugamba rw'inkotanyi, Kagame yasubije abo babyeyi ko impamvu abana babo bapfuye ngo ni uko bari ibigwari!  Inkotanyi zaguye muri Congo ntizigira umubare ariko nta ndishyi z'akababaro Kagame yigeze aha imiryango yabo!

Iyo ngeso yo guhekura abanyarwanda Kagame arayikomeje, muri iki gihe inkotanyi ziri kurasirwa muri Nyungwe ziri gushyingurwa mu ibanga maze ababyeyi babo bakabwirwa ko abana babo bishwe n'uburwayi! Kuwa gatatu taliki ya 10/04/2019 habaye imirwano ikomeye muri Nyungwe, abasilikare benshi b'inkotanyi barapfa abandi barakomereka bikomeye. Abo bose bajyanwe mu buruhukiro bw'ibitaro bya gisilikare i Kanombe, noneho bakajya batuma kubabyeyi babo bababwira ngo nibaze bashyingure ngo uburwayi  aribwo bwishe abana babo!

Urugero rutari kure n'urw'umusore w'umusilikare w'inkotanyi warasiwe mu mirwano yo kuwa gatatu agahita yitaba Imana, ariko umuryango we ukabwirwa ko yishwe n'uburwayi bw'igihe kirekire! Uwo musilikare yitwa Hatangimana (ifoto ye iri ku ntangiriro y'iyi nkuru no kuri iki gika), avuka mu karere ka Nyamashe. Kuwa kabiri taliki ya 9/04/2019 nibwo yarimo avugana n'ababyeyi be kuri telefoni ababwira ko ntakibazo afite ko kandi ari mukazi ka gisilikare muri Nyungwe; ku mugoroba wo kuwa gatatu taliki ya 10/04/2019, nibwo abayobozi b'igisilikare cy'inkotanyi bamenyesheje umuryango wa Hatangimana ko bagomba kuza kumushyingura kuko yishwe n'uburwayi, bababwiye ko yari amaze igihe kirekire arwariye mu bitaro bya gisilikare i Kanombe!

Ababyeyi bakubiswe n'inkuba bakimara kumva iyo nkuru, ndetse batangira kuvuga ko bakeneye kumenya icyamwishe kuko bavuganaga nawe kenshi kandi akaba atarigeze ababwira ko arwaye! Abo babyeyi bahise bacecekeshwa, bababuza no kugira umuntu babwira ko umwana wabo yapfuye, uwo Hatangimana yashyinguwe ababyeyi be batarebye mu maso y'umurambo we!! Ese inkotanyi uko zakoraga cyera zibona zishobora kubikomeza kandi itumanaho ryarateye imbere? "Veritasinfo" yabonye andi makuru yemeza ko abandi babyeyi mu gihugu bafite abana mu gisilikare cy'inkotanyi bari kugenda bamenyeshwa ko abana babo bitabye Imana bazize uburwayi kandi bishwe n'amasasu barasiwe mu ntambara yo muri Nyungwe!

Maherezo ababyeyi bohereje abana mu nkotanyi bazamera nk'iriya ngwe, bazakanguka abana babo barashize naho Kagame wabamaze yarahungiye muri Amerika! Kubera kutizerako ashobora kuzagaruka mu gihugu, Paul Kagame asigaye azerera amahanga aherekejwe n'indege 3 zikoreye imitungo ye yose yasahuye mu Rwanda no muri Congo; Kagame aba afite ubwoba ko ashobora kuzahirikwa ku butegetsi akamburwa umutungo yasahuye. 

Ese abanyarwanda bazashobora kujya kuraguza muri Amerika? ibihe bizaza biduhishiye byinshi!

veritasinfo