Kenyatta yahagurutse i Nairobi yerekeza i La Haye kwitaba urukiko

Publié le 7 octobre 2014 par veritas

uwo wambaye ingofero ni perezida wa Kenya ugiye gufata indege

Kuri uyu wa kabiri saa mbili n’igice za mugitondo nibwo Perezida Kenyatta yahagurutse n’indege yerekeza mu Buholandi kwitaba urukiko mpuzamahanga mpanabyaha. Niwe Perezida wa mbere ku isi witabye uru rukiko akiri mu mirimo y’umukuru w’igihugu.

Kenyatta yagiye nk’umuntu usanzwe n’indege itwara abagenzi bisanzwe yerekeza i Amsterdam; ku kibuga cy’indege abantu benshi baje kumwereka ko bamushyigikiye. Yaherekejwe n’umugore we, umukobwa we, abadepite batandatu n’abaminisitiri batatu nk’uko bitangazwa na AFP.

Kuwa gatatu nibwo azitaba bwa mbere urukiko aho azabanza gusomerwa umwirondoro we nk’abantu bose baregwa mu nkiko. Kenyatta w’imyaka 52 urukiko mpuzamahanga mpanabyaha ruramurega ibyaha bitanu bishingiye ku bwicanyi n’imvururu zakurikiye amatora ya 2007 muri Kenya aho abantu bagera ku 1200 bishwe abarenga 600 000 bakava mu byabo.

Uhuru,umuhungu wa Jomo Kenyatta ufatwa nk’umubyeyi w’igihugu muri Kenya, yatorewe kuyobora Kenya muri Werurwe 2013. Kenyatta n’umwungirije William Ruto bashinjwa kugira uruhare mu bwicanyi bushingiye ku moko bwakurikiye amatora, bombi bahakana ibyo baregwa.

Kenyatta yitabye urukiko nyuma y'impaka ndende leta ayoboye yagiranye n'urukiko kuburyo Kenya yari igiye kwanga ko Perezida w'icyo gihugu yitaba urukiko mpuzamahanga ariko urukiko narwo rukavuga ko natarwitaba hazandikwa impapuro zo kumuta muri yombi. Kwandika izo mpapuro byari kubangamira bikomeye imikorere ya perezida wa Kenya kuko atashoboraga gusohoka mu gihugu cye ,bityo agasa n'ufungiwe mu gihugu cye nk'uko perezida wa Sudani ya ruguru byamugendekeye.

Umuryango w'ubumwe bw'Afurika wagerageje kurwana kuri Kenyatta kugira ngo atitaba urukiko ari perezida, byageze n'aho ibihugu byose by'Afurika bibwira urukiko ko bigiye guhagarika imikoranire yabyo n'urukiko mpuzamahanga mpanabyaha byaba ngobwa bikaruvamo; ariko ibyo nabyo ntacyo byatanze! Ibihugu byasabye ko Kenyatta aburana nyuma ya manda ye nabyo biranga; igihugu cya Kenya cyasabye ko Kenyatta aburanira kubyuma bya video nabyo biranga, urukiko rukavuga ko agomba kuburana nk'abandi bandi bose.

Imbere y'inteko ishingamategeko y'igihugu cye , perezida Kenyata yagize ati:"kubera impamvu yo kurengera ubusugire bwa Repuburika ya Kenya,mpaye Visi Perezida William Ruto ububasha bwo gukora akazi nk’Umukuru w’Igihugu, nanjye nkitaba urukiko."

AFP