U Rwanda rumaze imyaka 50 rwigenga. (leprophete.fr)

Publié le par veritas

Ibendera rya mbere ry' u Rwanda rwigenga.

Hashize imyaka 18 Umunsi ngarukamwaka w'ubwigenge (1 Nyakanga) utizihizwa mu Rwanda. Ntibyumvikana ukuntu abategetsi bayoboye Urwanda muri iki gihe batinyuka guhigika umunsi ukomeye nk'uw'ubwigenge bw'igihugu . Baba se barabiterwaga no kutamenya agaciro ka Indépendance ? Baba se barabiterwaga n'uko batishimiye ko Urwanda rwasezereye ingoma ya cyami na gikolonize ? Ubwo noneho biyemeje kuwuhimbaza uyu mwaka, abenegihugu bose bakwiye kumva ko uwo munsi mukuru ari uwabo bityo bakawitabira kandi bakihatira no kumenya icyo usobanura. Muri iyi minsi leprophete.fr izabagezaho inyandiko zinyuranye zibafasha kuwukunda no kuwugira uwanyu.[ndlr)

 

 

Taliki ya 01 Nyakanga 2012 Urwanda ruzaba rumaze imyaka 50 rwigenga.Imihango y’umunsi w’ubwigenge le 01/07/1962 i Kigali yabimburiwe n’igitambo cya Misa yabereye muri kiliziya y’Umuryango Mutagatifu (Sainte Famille). Misa yashojwe n’indirimbo yo gushimira Imana yitwa mu kilatini Te Deum”.


Hakurikiyeho ibirori byabereye ku rubuga rwitiriwe Repubulika (Place de la République). Ni hahandi habanje ibiro bya perezida wa repubulika ku ngoma ya Kayibanda n’iya Habyarimana mbere y’uko byimurirwa ku Kacyiru ahari urwunge rw’amazu (village) rwiswe Urugwiro. Aho rero ku rubuga rwa repubulika hari hubatswe ikiraramizi (igisharagati, tribune) cya kijyambere, perezida wa RepubulikaNyakubahwa Geregori Kayibanda yicayemo, akikijwe n’abafasha be ba hafi n’abashyitsi b’imena bari baturuse hirya no hino ku isi.


Ijuru ryari rikeye cyane. Habanje akarasisi (défilé) k’ingabo z’igihugu, hanyuma i saa yine zuzuye (10h00), haba umuhango ukomeye cyane wo kuzamura IBENDERA rya Repubulik  y’Urwanda ari nako iry’Ububiligi ryamanurwaga, haririmbwa kandi indirimbo yubahiriza igihugu ariyo Rwanda rwacu, Rwanda gihugu cyambyaye”. (Murasanga amagambo y’iyi ndirimbo mu nyomeko y’iyi nyandiko).

 

Ibyishimo byari byuzuye imitima, bamwe mu bantu bakuru ntibashoboye kwifata. Bararize bibuka ibibi bari barakorewe n’ingoma ya gihake, cyami na gikolonize byari bigendeye rimwe nk’ifuni iheze. Abakiri bato bari bizihiwe, abana babishoboye bari buriye mu biti kugirango bashobore kureba neza ibirori no kubona abategetsi bashya b’Urwanda n’abashyitsi b’imena bari aho. Hakurikiyeho ijambo rya Nyakubahwa perezida wa Repubulika, Bwana Geregori Kayibanda. 

 

 

Perezida Geregori Kayibanda.

Ibirori byarakomeje, birangiye habaho akanya ko kwakira abashyitsi. Igitekerezo cyari mu mitwe no mu mitima ya bose ni ikivi gikomeye Abanyarwanda bari batangiye cyo guteza igihugu cyabo imbere mu ngeri zose.


Habuze gato

Kuri uwo munsi nyine le 01/07/1962 INYENZI zari zateganije gutera Urwanda kugirango ibyishimo byari mu gihugu bihinduke amarira. Zimwe zagombaga gutera ziturutse i Cyangugu no ku Kibuye. Rukeba wari uziyoboye yagize ubwoba, ntiyabikora. Izindi zagombaga gutumburiza mu mashyamba ya Gisenyi na Ruhengeri, zikamanukira i Gatumba, zigakomereza i Gitarama zigana i Kigali, umurwa mukuru. Itumanaho ryagenze nabi, bituma zitabasha gutera uwo munsi, ariko ziza gutera mu ijoro rya le 03 rishyira le 04/07/1962. Umugambi wazo wari uwo kwica abategetsi no gutera akaduruvayo mu gihugu. Ntizashoboye kubigeraho kuberako Ingabo z’Urwanda rwigenga zazikubise inshuro.


Kwari ugutangira bundi bushya


Urwanda rw’ubu rurakennye, ariko le 01/07/1962 rwari rukennye kurushaho. Impamvu z’ubwo bukene ni nyinshi. Iya mbere ni uko nta mutungo kamere uhambaye rwisanganiwe, n’uwo rufite, ugizwe n’imirima ihingwa, inzuri, amashyamba, amazi n’ibindi ukaba warakoreshwaga nabi kubera gihake no kutamenya gukora kijyambere cyane cyane mu by’ubuhinzi n’ubworozi.


Impamvu ya 2 ni uko Abadage babanje gukoloniza Urwanda batabonye igihe cyo kurukoramo ibikorwa by’amajyambere. Kandi n’ubundi bari bararurebye, basanga icyo rukizeho ari ukuba rutuwe cyane, ku buryo bumvaga bajya bafata Abanyarwanda bakabajyana gutura no gukora muri teritwari ya Tanganyika (Tanzaniya y’ubu ukuyemo ibirwa bya Zanzibar na Pemba), abandi bakabatoza ibya gisirikari ku buryo haramutse habaye intambara, bafasha ingabo z’Ubudage.


Ababiligi bazunguye Abadage mu w’1916 bakomeje gushora ingufu nyinshi mu guteza imbere Kongo (Kinshasa) yanitwaga ndetse Kongo Mbiligi. Mu myumvire y’Ababiligi Kongo ntiyari igihugu gikolonijwe, ahubwo yari imwe mu ntara zigize Ububiligi nk’uko n'Abafaransa bumvaga ko igihugu cy’Alijeriya ari intara (département) y’Ubufaransa. Nyuma ya Kongo, ahandi Ababiligi bashyize ingufu nyinshi ni mu gutuganya umugi wa Bujumbura kuko wari umurwa mukuru w’igihugu abakoloni bitaga Rwanda-Urundi”.


Ngiyo impamvu rero Urwanda rwarinze rugera ku bwigenge nta mazu y’ubutegetsi, nta kibuga cy’indege, nta bindi bikorwa shingiro (infrastructures) biri i Kigali wagereranya n’ibyari i Bujumbura cyangwa muri Kongo. Nyamara mu myaka mike, cyane cyane kuri repubulika ya 2 (1973-1994) yanononsoye ikanashyira mu bikorwa imishinga y’amajyambere yari yarizwe igihe cya repubulika ya mbere (1962-1973), Urwanda rwari rumaze gusiga ibihugu baturanye mu rwego rw’amajyambere ku buryo n’Abazayiruwa (Abanyekongo) benshi bajyaga gushaka imibereho mu Rwanda.


Utayihinganye ntayishira


Iyo ni inzara Abakurambere bacu bavugaga. Abategetsi bo kuri repubulika ya mbere bazirikanye ko Urwanda rukennye, maze birinda kurusonga barusahura. Perezida yagenewe akamodoka k’agaPeugeot n’umushoferi. Abaministiri bagenderaga muri ya mavatiri yitwaga ibikeri (Volkswagen coccinelle) kandi bakitwara ! Ya mafaranga ahabwa abakozi kubera ko bashinze urugo cyangwa ko bungutse umwana (indemnités familiales) ntayo bafataga. Umushahara wa buri kwezi w’umukuru w’igihugu byari ibihumbi 30, uw’abaministiri byari 12.500, uw’umudepite ukaba bitanu (5.000).


Mu Burundi ntabwo ariko byagenze. Mu kwiga itegeko nshinga ry’Uburundi bwikukiye, Abarundi bafashe itegeko nshinga ry’Ububiligi, ahanditse “Ububiligi” bakabihundura bakahandika Uburundi”. Ubwo no mu kwigenera imishahara, abategetsi bo hejuru b’i Burundi ntibagendeye ku bushobozi buke bw’igihugu cyabo, ahubwo bageragezaga kuyihuza n’iya bagenzi babo bo mu Bubiligi!


Kwizirika umukanda byarakomeje mu Rwanda no kuri repubulika ya 2. Ntawagereranya ingoro abakuru b’ibihugu byinshi by’Afurika bikennye nk’Urwanda cyangwa kururusha bari bariyubakiye n’izo perezida Yuvenali Habyarimana yakoreragamo cyangwa yari atuyemo. Ize zari mu rwego ruciriritse, ndetse bamwe bakanavuga ngo “rwo hasi”, ariko amajyambere mu cyaro akiyongera.


Muri make, mu Rwanda rwari rumaze kubona ubwigenge le 01/07/1962, byose byarihutirwaga : mu buvuzi, uburezi, itumanaho, ibikorwa remezo, imibereho myiza y’abaturage n’ibindi byose. Kuvana mu Banyarwanda ibisigisi bya gihake ; kuvana ku izima abari barakamiwe n’ingoma ya gihake na gikolonize rugeretse,kubumvisha ko bashobora kubaho badatunzwe no kunyunyuza imitsi ya rubanda byari intambara ikomeye. Nk’aho ibyo bitari bihagije, hinyongereyeho n’ikibazo cy’umutekano gikomotse ku bitero by’Inyenzi. Tuzabiganiraho ubutaha.


Amahoro ku Banyarwanda bose


Padiri F. Rudakemwa.


 

Inyomeko : 

 

Indirimbo yubahiriza igihugu yaririmbwe le 01/07/1962 yahimbwe na Bwana Michel Habarurema wayoboraga korali Abanyuramatwi.

 

1.Rwanda rwacu, Rwanda gihugu cyambyaye,

Ndakuratana ishyaka n'ubutwali.

Iyo nibutse ibigwi wagize kugeza ubu,

nshimira Abanyarwanda bacyu bazanye Repubulika idahinyuka.

Bavandimwe b'uru Rwanda rwacu twese nimuhaguruke,

Turubumbatire mu mahoro, mukuli, mu bwigenge no mu bwumvikane.

 

2.Impundu ni zivuge mu Rwanda hose,

Republika yakuye ubuhake,

Ubukolonize bwagiye nk'ifuni iheze.

Shinga umuzi Demokarasi

Waduhaye kwitorera abategetsi.

Banyarwanda: abakuru

Namwe abato mwizihiye u Rwanda

Turubumbatire mu mahoro, mu kuli,

Mu bwigenge no mu bwumvikane.

 

3.Bavukarwanda mwese muvuze impundu,

Demokarasi yarwo iraganje.

Twayiharaniye rwose twese uko tungana.

Gatutsi, Gatwa na gahutu Namwe banyarwanda bandi mwabyiyemeje,

Indepandansi twatsindiye

Twese hamwe tuyishyigikire,

Turubumbatire mu mahoro, mu kuli,

Mu bwigenge no mu bwumvikane.

 

4.Nimuze dusingize Ibendera ryacu.

Arakabaho na Prezida wacu.

Barakabaho abaturage b'iki Gihugu.

Intego yacu Banyarwanda

Twishyime kandi twizane mu Rwanda rwacu.

Twese hamwe, twunge ubumwe

Nta mususu dutere imbere ko,

Turubumbatire mu mahoro, mu kuli,

Mu bwigenge no mu bwumvikane. 

 


 

Commenter cet article