RDC: Imirwano hagati ya M23/RDF na FARDC muri iri joro ryo kuwa 15/10/2013 !

Publié le par veritas

http://www.tv5.org/TV5Site/info/afp/francais/special/afrique/676aea15491a5a03f0ea5be39658ec27290d3b8e.jpgKu isaha ya saa munani z'ijoro kuri uyu wa kabiri taliki ya 15/10/2013 ingabo za Congo FARDC zakozanyijeho n'abarwanyi b'umutwe wa M23/RDF, imirwano ikaba yabereye mu karere ka Kibumba ku birometero 15 uvuye mu mujyi wa Goma.Amakuru veritasinfo icyesha "TV5 monde" aremeza ko impande zombi zemera ko zarasanye iri joro.

 

Uko kurasana kubaye mu gihe inama y'abakuru b'ibihugu by'akarere k'ibiyaga bigari yateraniye i Kampala yari yasabye ko impande zombi zirinda ubushotoranyi ubwo aribwo bwose kugira ngo ibiganiro leta ya Congo n'umutwe wa M23/RDF basabwe gukora mu mujyi wa Kampala bigende neza. kuwa gatanu ushize umutwe wa M23/RDF wagabye igitero ku ndege yo mu bwoko bwa kajugujugu y'ingabo z'umuryango w'abibumbye. Imirwano y'iri joro irerekana ko ikibazo cya M23/RDF kitazarangizwa na politiki cyane ko n'ibiganiro biri kubera i Kampala nta kizere ko bizagera kumwanzuro w'amahoro.

 

Umuvugizi w'ingabo za Congo Lt Col Olivier Hamuli aremeza ko M23/RDF yabagabyeho igitero ku isaha ya saa munani z'ijoro ariko ingabo za Congo zikaba zaburijemo icyo gitero, yakomeje avuga ko ingabo za Congo zikomeje kwifata ariko ko zidashobora kwihanganira ubushotoranyi bwa M23/RDF, ko nibakomeza gushotora ingabo za Congo uwo mutwe uzirengera ingaruka zizakurikiraho !

 

Amani Kabasha ushinzwe ibikorwa by'itangazamakuru mu mutwe wa M23/RDF yatangaje ko ingabo za Congo zabagabyeho igitero kubirindiro byabo biri ahitwa  Kanyamahoro werekeza Kibumba. Impande zombi n'ubwo zitana ba mwana mu gusembura urundi,nta ruhande na rumwe ruvuga icyo iyo mirwano yangije. Ingabo za ONU ziri muri ako karerere nazo ziremeza ko ingabo za Congo FARDC n'abarwanyi ba M23/RDF barasanye bitewe n'uko abasilikare ba Congo barimo bacunga umutekano w'ibirindiro byabo bakubitanye n'abarwanyi ba M23/RDF nabo bacungaga ibirindiro byabo maze bakarasana, iyo mirwano ikaba yamaze iminota 20.

 

Ibikorwa bimaze iminsi byigaragaza mu mutwe wa M23/RDF biragaragaza ko uwo mutwe witeguye imirwano ikaze, ukaba ndetse uherutse kubona inkunga ikomeye cyane y'amakamyo 9 yuzuye abasilikare n'ibikoresho bivuye mu gihugu cy'u Rwanda na Uganda.

 

 

Ubwanditsi

Commenter cet article

Mayele Karegeya 15/10/2013 14:38


Bazarwana ali uko M23 ibashyize kuli defensive. Kandi icyo gihe probabilité yo gutsindwa iba aliyo nini. Aliko ibihugu/ abantu baratandukanye. Umuntu azaza agutere iwawe ku mugaragaro, yirare mu
byawe, nawe ngo uli gutanga abagabo ko nta bushotoranyi ugira. Fin des fins biviramo n'ububwa, ubwitonzi bwa cyane en cas flagrant ya violabilité du " domicile" ni impamvu ihagije yo kwivuna
umwanzi, niba nyine koko gucisha make kwa we atali ububwa guhatse.