Politiki : Ibaruwa ifunguye Ndagijimana JMV yandikiye umuyobozi w'urubuga DHR yiyama Ngarambe wo muri RNC !

Publié le par veritas

NdagijimanaMaître Innocent Twagiramungu
Umuyobozi-propriétaire wa groupe DHR
 
Maître, 


Ndagusuhuje kandi ngushimira kuba waremeye kuncumbikira ku rubuga rwawe rwa Democracy_Human_Rights@yahoogroupes.fr mazeho imyaka itali mike. Nyamara ntangiye kubona urugo wanyakiliyemo rutangiye guhinduka ikotaniro ry'isibaniro kandi bitali ngombwa. Urubuga washyizeho wifuza ko abantu bajya bahura bakaganira mu cyubahiro no mu bwubahane rwahindutse karubanda, aho bamwe bifata mu gahanga bagatuka abandi, bakababeshyera, bakabacira urupfu, wowe ukicecekera ugategereza ko bamarana. 
Reka nkwibarize mpereye ku rugero rukulikira :

 
Maître Twagiramungu, ko uli umunyamategeko, ko uli umuntu w'umunyabwenge kandi ushishoza, uwakurega ko wanga abahutu, abatutsi se cyangwa abatwa wakwituramira ukamurebera kandi uzi icyo bishaka kuvuga n'ingaruka zabyo? Hali abantu benshi baborera muli prisons zo mu Rwanda, Arusha n'ahandi mu mahanga kubera ko barezwe kwanga no kwikoma abatutsi. Kubera amateka y'uRwanda, Iki kirego si icyo gukinisha, ukirega bagenzi be aba agamije kubasiga ibara ry'amaraso. 
Nongere nkubaze : wakiliye abantu mu rugo rwawe, umwe mu bashyitsi yamara guhaga urwagwa, agahaguruka agahamya ko undi mu bashyitsi bawe ali umurozi, akamutunga urutoki amwitiranya na Yohani kandi wowe uziko yitwa Yozefu, wakwicecekera ukabareka bakamarana, cyangwa wabwira uwo nyirabayazana ko abeshyera umushyitsi wawe, byaba na ngombwa uwo mushyitsi w'umubeshyi ukamusaba gutaha akakuvira mu rugo, agaha abandi amahoro ?


Nkuko ugomba kuba ubizi nka modérateur w'urubuga rwacu rwa DHR, nyuma y'imyigaragambyo n'icyunamo amashyirahamwe ya société civile mbereye umwe mu bayobozi yakoreye i Paris kwi'taliki ya 6/4/2012, umunyamabanga mukuru w'ishyaka RWANDA NATIONAL CONGRESS (RNC),Bwana Joseph Ngarambe yatangiye kwandika kuli Democracy_Human_Rights@yahoogroupes.fr anyibasira, acura amalisti y'abo yita abahutu b'abahezanguni banga abatutsi. Izina ryanjye likunze kugaruka kuli iyo liste ya Ngarambe. Igipimo n'umunzani akoresha kugira ngo amenye abahutu banga abatutsi niwe ukizi ! Naramwiyamye, mubwira ko inyandiko anyitilira atali izanjye, yanze kunyumva. 

 

Nawe nka modérateur wa DHR narakwiyambaje kugira ngo uce urwo rubanza, ntiwigeze ukoma. Ese waba nawe wemeza ko abitwa ba Charlie Rwembe na Josef Muhamira ngo baba barwanya abatutsi bo muli RNC ali amazina y'amahimbano ya Jean-Marie Vianney Ndagijimana koko ? Niba alibyo, bihamye n'abandi dusangiye urubuga babimenye, niba kandi Joseph Ngarambe abeshya akandika ibyo yarose nkuko njye mbihamya, ugomba kubivuga bikamenyekana. Groupe DHR isomwa n'abantu 4050. Ni ukuvuga ko buli kinyoma gisebanya (propos diffamatoires) gisomwa kandi kikaba gishobora kuyobya abantu 4050. Aha niho responsabilité ya propriétaire-modérateur itangilira iyo adakoze akazi ke ngo acyahe abatukana, abahemu, ababeshyera n'abasebya abandi mu ruhame. Icyo gihe mu mategeko biba bivuga ko modérateur abifitemo uruhari.


Ngire n'icyo mbwira umuvandimwe kandi murumuna wanjye Ngarambe, n'inshuti nyinshi duhuliyeho. Ngarambe sigaho! Ibyo wandika umbeshyera, umpimbira, unsebya, ntibigusa. Icara ucururuke, wibaze neza, uzasanga usa n'umuntu ukunda amata yamara kurengwa akamena igisabo. RNC ni impitagihe, ni ishyaka nk'ayandi, ni nk'ibihango byose byagiye byaduka, byageraho bikazimira. Nyamara gusebya no guhemukira abavandimwe byo ntibihanagurika. Ejobundi numara kuva muli RNC tuzongera duhure dusabane nka mbere nta kibazo. Aliko wibuke ibu bikulikira : Ikinyoma kivanze n'urwango no gutungana agatoki akenshi bitewe n'umujinya w'umuvuduko, ni nka bwa burozi Dan Munyuza yashatse guha General Kayumba Nyamwasa. Ubu Dan Munyuza ali hehe? Kera muli za 91, 92 93,94 mu Rwanda mbere yuko amarozi ava mu Bushinwa yaduka, uburozi bw'amagambo n'inyandiko z'ibinyoma zatungaga agatoki ibyitso, inyenzi, abasederi, ibipinga, nibyo byahitanye abantu barenga miliyoni mu Rwanda.

 

Sinshobora kwumva ukuntu umuntu nkawe Ngarambe utinyuka gukoresha uburyo nk'ubu bw'ibinyoma kubera inyungu ntarabasha kwumva neza. Nongere nkubaze : abagabo witwaza ko uvugira alibo Theogene Rudasingwa na Kayumba Nyamwasa nibo bagutuma kuvuga ko nanga abatutsi cyangwa ni excès de zèle ufite ? Ese bo ntibakimenya kwandika ngo banyibwilire face à face ko naba mbanga. Abatutsi bakubwiye ko mbanga ni bande? Ikikubwira ko njye ntali umututsi ni iki ko utamfashe ADN (DNA)? Ese niyo nakwanga RUDASINGWA na KAYUMBA NYAMWASA, ibyo byaba bishaka kuvuga ko nanga abatutsi ? Njye sinemera na busa ko bahagaraliye abatutsi. Ba nyirubwite ntibigeze babivuga ngo tubimenye. Niyo bashaka kubigerageza, abatutsi ntibabibemerera. Nta muntu
n'umwe ufite uburenganzira bwo kwiyorosa ubwoko akomoka mo kugira ngo yigire indahangarwa. Niet.


Nyibutsa : ibarwa nabandikiye le 15/5/2012 ushobora kuba mutarayisomye, nongeye kuyomeka hano hasi kugira ngo muyibone. 

Mugire amahoro kandi Imana ikomeze ibahe imigisha n'ubushishozi bwinshi. 


JMV NDAGIJIMANA
IBUKABOSE-RENGERABOSE UTAVANGURA AMOKO

 

Ndlr : Nyuma y’iyi baruwa ifunguye y’Ambasaderi Ndagijimana JMV, Ushinzwe urubuga DHR yatanze igisubizo kuri uyu wa kabiri taliki ya 22/05/2012 (mu rurimi rw’igifaransa) asaba aba bagabo (Ndagijimana na Ngarambe) kwitondera kiriya kibazo cy’inyandiko ziri mu mazina y’abantu bavuzwe muri iyi baruwa , abamenyesha ko yiyambaje impuguke za gisilikare mu gushakisha abagizi ba nabi mu ikoranabuhanga kandi akaba amaze kugezwaho amakuru adashobora gutangaza ku mbuga , kuburyo bibaye ngombwa ;umuyobozi wa HDR ashobora gushyikiriza ayo makuru abayobozi b’urubuga rucumbikiye DHR rwo  mu gihugu cy’ubwongereza.

 

Commenter cet article

alex 22/05/2012 15:27


iyi baruwa nyabuneka muyihe na Pdiri Thomas wa le prophete agire moderation y'urubuga rwe kuko rwabaye urwa gishumba!