Leta ya Kagame Paul ifite ubwoba bw'uko abaturage bashobora kuyitinyuka !

Publié le par veritas

manif.pngNdlr :Ubutegetsi bwa FPR na Kagame buhorana ikidodo cy’uko abaturage bashobora kubutinyuka bakabutera hejuru ; uko iminsi ishira, niko ubutegetsi bwo mu Rwanda bugenda bugaragaza intege nke zo kugirirwa ikizere n’abaturage, FPR na Kagame bagifata ubutegetsi muri 1994 hejuru y’imivu y’amaraso ,byayifashije gukanda abanyarwanda bari bafite igihunga kandi bizeraga ko FPR ishobora guha igihugu imiyoborere myiza, ibyo bikaba byaranafashije FPR na Kagame kwizerwa n’amahanga bitewe n’amahano ya jenoside yari amaze kuba mu gihugu ; uko iminsi ishira niko ikizere cy’abanyarwanda n’amahanga kigenda kirushaho kuyoyoka !

 

Birazwi ko hagize akantu gakoma gato mu gihugu FPR na Kagame byaba bibarangiranye ! Nta nubwo babona umwanya wo kwinjira mu mitamenwa bubatse ngo bafate n’ikirahure cy’amazi !Kugira ngo ibyo bitaba bahora bashyira abaturage ho iterabwoba ngo bazabamara nibivumbura ! Nyamara byaragaragaye cyane ko gukumira uburakari bw’abaturage bari ku ngoyi ari nko kugomera amazi ! Urayatangira akagenda yiyegeranya yamara kuba ikidendezi agasenya inkuta zose zayagomeraga ! Muri sondage veritasinfo yakoze muri iki gihe kubintu bihangayikishije ubutegetsi bwa FPR na Kagame imibare yigaragaza kuri ubu buryo :

 

1.imyivumbagatanyo y’abaturage 54%

2.Inyeshyamba za FDLR 24%

3.Amashyaka akorera hanze 12%

4.Ibinyamakuru bikorera hanze 10%

 

 

Iyi nkuru ifite ishingiro :

 

Mu gihe urubuga Rwanda Liberation (ubu rwitwa Rwanda in Liberation Process) rwabagezagaho amakuru y’itangizwa ry’intambara mu burasirazuba bwa Kongo intambara yatangiye yitwa iya CNDP ikaza guhindura izina ikitwa iya M23 igahindura n’abayobozi ariko tukaba twarahise tunabereka uburyo iyo ntambara yari itangijwe na Kagame ndetse tukanababwira uburyo benshi bavugaga ko ishobora kuzaba intandaro y’irangira ry’ubutegetsi bwe, ubu i Kigali haravugwa ubwoba bwinshi ko abatavuga rumwe n’ubutegetsi bwa Paul Kagame baba bamereye nabi ubutegetsi bwe.

 

Amakuru dukesha abantu bari ku rukiko rw’Ikirenga rwa Kigali taliki 19 Nyakanga 2012 igihe habaga urubanza rw’ikirego umuyobozi wa FDU Mme Victoire Ingabire yarezemo leta ya Paul Kagame ko itubahiriza amategeko igashyiraho amategeko avuguruzanya, ayo makuru aratumenyesha ko abarwanashyaka b’amashyaka atavuga rumwe n’ubutegetsi bwa FPR buyobowe na Kagame ngo bahanganye n’igipolisi aho ku rukiko biratinda. Intandaro y’iryo hangana ngo ikaba yari amafoto yafatiwe aho ku rukiko n’abatavuga rumwe n’ubutegetsi bigatuma polisi ishaka kubambura ibyuma bafatishaga ayo mafoto.

 

Mu guhangana kw’impande zombie ngo Komanda wa polisi muri Nyarugenge n’ushinzwe iperereza ndetse n’abandi bapolisi n’abacungagereza bari aho bashatse gukoresha imbaraga ngo bambure abatavuga rumwe n’ubutegetsi ibyo bafatishije amafoto ariko ngo byatumye havuka umuvurungano ku buryo abari bitabiriye urubanza bahuruye ku buryo wabonaga ko hashobora kuvuka impagarara hagati y’impande zari zihanganye. Icyaje guhosha ayo makimbirane ngo Komanda wa polisi n’ukuriye iperereza muri Nyarugenge ngo bavuze ko bazi neza ko abatavuga rumwe n’ubutegetsi bateguye imyigaragambyo ngo bakaba barashakaga impamvu yatuma itangizwa.

 

Amakuru aturuka mu nzego z’igipolisi cya Kigali akaba atumenyesha ko leta yaba ifite ubwoba ko Kigali ishobora kwibasirwa n’imyigaragambyo simusiga ishobora kugera ku gipimo cy’iyabereye muri Tuniziya, Misiri, Libiya ndetse na Siriya hamwe na Cote d’Ivoire. Ibi kandi bikaba ngo biteye ubwoba leta kuko n’ubundi iri mu bibazo bikomeye kubera uruhare iregwa rwo gufatanya n’abarwanyi b’inyeshyamba za M23 muri Kongo ibyo ngo bikaba byatuma imyigaragambyo iramutse itangiye leta ishobora gucika intege ikananirwa guhangana n’abayirwanya bashobora ngo no gufashwa na bamwe bo mu nzego za gisirikari batishimiye ubutegetsi bwa Kagame bityo ngo bika bibaye intangiriro y’iherezo ry’ubutegetsi bwa Kagame na FPR ye.

 

Kagame igihe yahuraga n’abanyarwanda baba I Buruseli mu Bubiligi mu mwaka wa 2010 akaba yarababwiye ko ngo abifuza gutaha mu gihugu ari uko yavuye ku butegetsi ngo bazabyibagirwe kuko ngo nta nzira n’imwe byaba byanyuzemo. Nyamara ubanza ayo yari amirariro kuko kuba ubu abari inshuti ze batangiye kumufungira robinet buhoro buhoro ni ikimenyetso cyerekana ko no kuva ku butegetsi kwe gushoboka hakaba hari n’abemeza ko kwaba kuri bugufi. Kuba ubu Kigali ihora yikanga imyigaragambyo ya baringa ni ukubera ubwoba bw’uko nta cyizere igifite cyo gutegekesha abanyarwanda igitugu. Tukaba twashimira abitanga bose bakora uko bashoboye kugirango ubutegetsi buhonyora uburenganzira bw’ikiremwa muntu buhagarare.

 

 

Nkunda L.

Kigali City

 

 

 

Commenter cet article

kwizera 23/07/2012 11:12


Ibyo mwandika nibyo rwose ,twumva ibyo abaturage bavuga:gusa abanyarwanda hafi ya bose ni indyandya, kuko urebye uburyo bamwe baba bashima Kagame :igihe habaye inama nyuma y'umuganda,inama se
yatumijwe n'umuyobozi w'akagari ....nizindi.,wagira ngo ni ok


Hanyuma wahura n'abantu babiri ,cg se abaganirira mu tubari two mucyaro ,ukumva ibyo bavuga,urumirwa, abatazibagirwa ni benshi ,hari ukubwira ko se bamuciye imyanya ndangagitsina muri Congo nawe
aryamye mu ntumbi ari kubireba,undi nawe ngo umwana wa mukuru wanjye ndera ababyeyi be babiciye muri Congo na bakuru be,niwe wenyine warokotse,ariko kubera kubura uwamwishyurira yavuye mu ishuli.


Mu gihe uwarokoste genocide,ufite ababyeyi yawe bafite amaduka,abana babo bararihirirwa bose.yavuze babiri ,batangiye kurihirira kuva secondaire,na nubu baracyabarihirira,bararangiza uyu Mwaka
Universite,baravukana


Ukunva abaturage bafite umujinya ,gusa wunva bakunda Ingabire ko ariwe wabavugiye bimwe.Kandi numva na none bavuga ko Pasteur BIZIMUNGU yari umugabo pe!!! Baramushima ,ariko cyane Ingabire,none
se biriya bintu bizagarukira he.Hari uwigeze kuvuga ko yifuza u Rwanda rwazaba rurimo bose !!!Kagame,Ingabire,Kayumba ,Mushayindi ,Nziza.


Hashakwe umuti watuma ibyo bishoboka.

ZU 22/07/2012 16:22


Yeah! Iyi nkuru ibyo ivuga birenda kwegera ukuri cyane!


Kagame nawe azi neza ko nta muntu n'umwe wakwemera kumugwa inyuma; yewe n'umuryango we ushobora kumuhunga kuko amyato ye iteye agahinda!


Ahubwo dushyire ingufu zoze mu kurwanya uyu MUTINDI wateye Gakondo yacu akayihindura UMWAKU!