ITANGAZO RY’ABANYAMAKURU B’ABANYARWANDA BAKORERA MU BUHUNGIRO

Publié le par veritas


amakuru.png

None kuwa kane tariki ya 3 Gicurasi 2012 ni umunsi w’itangazamakuru ku isi yose. Twebwe abanyamakuru b’abanyarwanda bakorera mu buhungiro twishimiye uruhare Itangazamakuru rikomeje kugira mu guharanira demokarasi mu bihugu bitandukanye ndetse no guha urubuga abanyagihugu ijambo mu mibereho yabo ya buri munsi. Twishimiye kandi impinduka z’iterambere mu ikoranabuhaga zigenda zirushaho koroshya akazi ko gusakaza amakuru ku isi hose.

 

Nkuko insanganyamatsiko y’uyu mwaka igira iti “Media Freedom Helping to Transform Societies”, (ubwisanzure bw’itangazamakuru bufasha mu guhindura sosiyete), twebwe abanyamakuru b’abanyarwanda bakorera mu buhungiro dusanga mu gihe Leta y’uRwanda ikiniga Itangazamakuru ryigenga nta mpinduka zizaba muri sosiyete Nyarwanda. Leta y’uRwanda iyobowe na FPR ikomeje kugaragaza igitugu cyeruye, aho imaze gufunga ibitangazamakuru byose byigenga mu Rwanda, yamenesheje abanyamakuru bose bafite ibitekerezo bitandukanye n’umurongo wayo, iterabwoba ikoresha ku banyamakuru ryatumye n’abasigaye mu gihugu bahitamo guhindura imirongo y’ibitangazamakuru byabo ngo hato na hato batazafungwa, cyangwa bakagirirwa nabi nk’uko byakunze kugenda biba kubandi kuva ubutegetsi bwa FPR bwajyaho.

 

Amashyirahamwe y’abanyamakuru mu Rwanda akomeje kuyoborwa n’abantu baba bashyizweho na Leta ya FPR mu rwego rwo kubabuza kwisanzura biciye mu mashyirahamwe yabo yakagombye kuba ariyo afata iyambere mu guharanira ubwisanzure bw’Itangazamakuru. Leta y’uRwanda yashyizeho nkana amategeko atuma itangazamakuru ryigenga ritisanzura mu gutangaza amakuru, bityo ayo mategeko akaba ari nayo yagiye ikoresha mu gufunga abanyamakuru.

 

Kuri uyu munsi w’ubwisanzure bw’Itangazamakuru, ni umwanya twongeye kubona ngo twibuke ku buryo bw’umwihariko bagenzi bacu bishwe bazize umwuga wabo aribo Jean Leonard Rugambage wishwe mu mwaka wa 2010, na Ingabire Charles (Imana ibahe iruhuko ridashira) bose bakoreraga ibitangazamakuru byanengaga ubutegetsi bw’uRwanda.

 

Twongeye kugaragaza akababaro kacu no kwamaganira kure amagambo ababaje kandi y’agashinyaguro Perezida Paul Kagame yavugiye i Kampala ubwo yabazwaga ku rupfu rwa Ingabire Charles, aho yavuze ko yari umujura ashakishwa n’ubutabera bw’uRwanda nk’aho umujura agomba kwicwa.

 

Twifatanyije n’abanyamakuru bagenzi bacu bari muri gereza bazira umwuga wabo aribo Agnes Nkusi Uwimana akaba umuyobozi w’Ikinyamakuru Umurabyo na Mukakibibi Saidat bateshejwe imiryango yabo kubera ibitekerezo byabo, ubu inkiko z’uRwanda zikaba zarabakatiye igifungo cy’imyaka 4 kuri Agnes n’igifungo cy’imwaka 3 kuri Saidat.

 

Nubwo mu Rwanda ibitangazamakuru byiyongera harimo ibinyamakuru n’amaradio, twe dusanga bidasobanuye ko ubwisanzure buhari nk’uko

Leta y’uRwanda ikunze kubeshya amahanga, kuko ibyo bitangazamakuru byose bivuka nta na kimwe gitinyuka kunenga ubutegetsi bw’uRwanda. Gukorera mu bwisanzure no kugaragaza ubwigenge mu bitekerezo bikomeje kuba kure nk’ukwezi i Rwanda, akaba ari yo mpamvu dusaba abanyarwanda bose guhagurukira icyarimwe bakamagana Leta ibabuza kwisanzura mu bitekerezo.

 

Turasaba imiryango mpuzamahanga n’ibihugu bifasha u Rwanda guhatira Leta y’u Rwanda kurekeraho kuniga Itangazamakuru nk’inkingi ya demokarasi bityo abaturage bakagira uburenganzira bwo gutanga ibitekerezo byabo uko babishaka.

 

 

 

Bikorewe Suwede, tariki ya 3 Gicurasi 2012

 

Itangazo rishyizweho umukono n’abanyamakuru b’Abanyarwanda bakurikira:

 

Tharcisse SEMANA, Journal UMUSESO

Email: semsanassuisse@yahoo.fr

 

Nelson Gatsimbazi, Journal UMUSINGI

Email: callnelson2000@gmail.com

 

Macdowell Kalisa, Journal UMUSESO

Email: ellymacdowell@yahoo.com

 

Amiel Nkuriza, Journal LE PARTISAN

Email: amiel2007@yahoo.com

 

Robat Sebufirira, Journal UMUSESO

Email: rsebufirira@yahoo.com

 

Uwigenga Christian, Contact FM

Email: chrisupatty@hotmail.com

 

Didas Gasana, Journal UMUSESO

Email: diga_mbi@yahoo.fr

 

Lucie Umukundwa, VOA Radio

Email: lumukundwa@gmail.com

 

Furaha Mugisha, Journal UMUSESO

Email: mugishafu@yahoo.com

 

 

 

 

 

 

Commenter cet article