Igihugu cya Congo cyaciye umurongo utukura mubiganiro kigirana na M23 i Kampala!

Publié le par veritas

Raymond-Tshibanda.pngNyuma y'imirwano ikaze yahanganishije ingabo za Congo n'abarwanyi ba M23 muri Kivu y'amajyaruguru, ubu leta ya Congo n'umutwe wa M23 bari mu biganiro i Kampala mu murwa mukuru w'igihugu cya Uganda ariko inzira iracyari ndende kugira ngo impande zombi zishobore kugera ku mwanzuro washobora kumvikanwaho; ababikurikiranira hafi bakaba babona amaherezo intambara hagati y'impande zombi izongera ikubura.

 

Impande zombi zikigera i Kampala, buri ruhande rwagaragaje ko rutsimbaraye kubitekerezo byarwo.Umutwe wa M23 wageze i Kampala utsimbaraye kubitekerezo byo gusaba leta ya Congo kwemera ko uwo mutwe ugomba gushyira intwaro hasi ari uko FDLR yirukanywe burundi muri Congo kandi impunzi z'abakongomani zahungiye mu bihugu bihana imbibi na Congo zimaze gutahuka muri Congo zigasubizwa mubyazo. Leta ya Congo nayo yahaye umutwe wa M23 umurongo utukura itagomba kurenga ariwo wo kudaha imbabazi abarwanyi ba M23 bashinjwa ibyaha by'intambara cyangwa kubinjiza mu ngabo za Congo. Nyuma y'icyumweru ibyo biganiro bitangiye nta ntambwe iraterwa yatuma impande zombi zizera ko zizagira aho zihurira nk'uko bitangazwa n'uhagarariye intumwa za Congo muri ibyo biganiro François Muamba.

 

FDLR ni kimwe mu bibazo bikomeye mu biganiro!

 

Nk'uko amakuru dukesha urubuga "Afrikarabia" abyemeza,kimwe mu byo umutwe wa M23 utsimbarayeho ni ikibazo cyo gusenya FDLR. Bertrand Bisimwa uyoboye umutwe wa M23 avuga ko uwo mutwe ugomba gushyira intwaro hasi ari uko FDLR ibanje gusenywa kandi impunzi z'abakongomani zigasubizwa mu byabo. Umutwe wa M23 ubona FDLR ariyo ifite uruhare runini mu ihungabana ry'umutekano muri Kivu kandi M23 ikaba ifite inshingabo zo kurwana no kurengera ubwoko bw'abatutsi.

 

Ikibazo ni ukumenya impamvu M23 yadukanye icyo kibazo cya FDLR muri ibi biganiro bya nyuma mugihe icyo kibazo cya FDLR  itigeze ikivuga mu bihe byashize kuva yatangira imirwano muri Gicurasi 2012! Bigitangira umutwe wa M23 watangiye uvugako usaba ko amasezerano yo kuwa 23 werurwe 2009 ashyirwa mubikorwa ariyo yo gushyira abarwanyi ba CNDP mu ngabo za Congo kandi bagahabwa amapeti bihaye mu ishyamba, ibyo byifuzo akaba ntaho byari bihuriye na FDLR. Aho umutwe wa M23 wari umaze kugaragariza imbaraga kurugamba wongeye gutanga ibindi byifuzo bishya birimo gutesha agaciro amatora yo mu mwaka w'2011 abakongomani bavuga ko yagaragayemo uburiganya bukabije, bityo M23 igasaba Perezida Kabila kuva kubutegetsi kuko atatowe n'abaturage. Muri ibi biganiro by'i Kampala umutwe wa M23 wahinduye ibyifuzo usaba leta ya Congo, ibyo gukuraho kabila ntibikirimo, ibyo gusubizwa mu ngabo za Congo nabyo yarabitaye, ubu ikibazo ni FDLR!! Dore zimwe mu mpamvu zituma M23 yibanze kuri iki kibazo cya FDLR:

 

FDLR iteye ikibazo koko cyangwa ni urwitwazo?

 

Umutwe wa M23 uvuga ko FDLR ariyo ntandaro y'umutekano mucye mu karere ka Kivu y'amajyaruguru na Kivu y'amajyepfo, nyamara abahanga muby'umutekano basanga FDLR nta kibazo na gito cy'umutekano mucye iteye kuko umubare w'abasilikare ba FDLR wagabanutse cyane ukava ku bihumbi 10 ukagera ku bihumbi 2 mu gihe k'imyaka 10. FDLR rero nta gihugu na kimwe iteye umutekano mucye kuko n'u Rwanda rwirirwa ruyivuga ubu rufite abasilikare barenze ibihumbi 100.

http://www.amnesty.fr/sites/default/files/157233_FDLR_fighter_in_Ntoto_North_Kivu_back_view_holding_a_rocket_launcher..jpg

Abakurikiranira hafi ikibazo cya politiki n'impamvu z'umutekano mucye mu karere , basanga umutwe wa M23 utangiye gushyira mu majwi FDLR bitewe n'uko aribo banzi bawo ba mbere ariko impamvu nyamukuru ni uko umutwe wa M23 utagishoboye kurwana intambara y'amasasu bitewe n'uko ingabo za Congo zagiye zigaragaza intege nke kenshi ubu zagize amahirwe yo gufashwa urugamba n'umutwe udasanzwe wa ONU , bigatuma M23 isubizwa inyuma ibirometero 30 byose ! Kubera gutsindwa hagakubitiraho no kuba umutwe wa M23 ufite ibibazo byo kuvugwa nabi n'amahanga, M23 yazanye iturufu rya FDLR kugira ngo ijijishe ONU ,ingabo zayo ziri muri Congo zerekeze ijisho ryazo ku mutwe wa FDLR cyane ko ONU yafashe umwanziro wo kuyirwanya , noneho umutwe wa M23 ubone agahenge ko kwisuganya mu gihe ingabo za ONU zirangariye FDLR!

 

Umushakashatsi Christoph Vogel asanga M23 yarazanye ikibazo cya FDLR muri gahunda yo gutegura uburyo bwo kwigarurira burundu akarere uwo mutwe ugenzura kuko uzi neza ko kurwanya FDLR bidashobora gukorwa mu kwezi kumwe cyangwa mu myaka myinshi; M23 izi neza ko u Rwanda rufatanyije na Congo byateguye gahunda nyinshi z'ibitero bya gisilikare byagabwe kuri FDLR bigahabwa amazina anyuranye : Kimia ya 1, Kimya ya 2, umoja wetu... byose bikarangira FDLR idatsinzwe; ubu abahanga muby'umutekano bakaba bari kugira inama ONU ko ikibazo cya FDLR kizakemurwa na politiki gusa igomba guhinduka mu gihugu cy'u Rwanda n'igihugu cya Congo!

 

Ubu haravugwa ko umutwe wa M23 ukomeje kunaniza mu mishyikirano i Kampala ariko kandi na leta ya Congo ikaba yarahatiwe kujya muri iyo mishyikirano n'umuryango mpuzamahanga itabishaka ! Kuri leta ya Congo ibona ikibazo cya M23 kigomba kurangizwa n'intambara ibyo bituma Congo ikurikiza amabwiriza yose isabwe n'umuryango mpuzamahanga n'ubwo yaba itayemera kuko ikeneye imbaraga za ONU kugira ngo igabe ibitero kuri M23 bityo leta ya Congo ikaba iri mu mishyikirano iseta ibirenge kugirango igihe cyatanzwe k'ibiganiro kizarangire ntamwanzuro ugezweho ahubwo hakaba imirwano! Imbuguke mubya gisilikare zifite impungenge ko ingabo za ONU zishobora kwifata ntizinjire mu mirwano ahubwo uwo muryango ugafata icyemezo cyo guhuza ibihugu bitatu aribyo u Rwanda , Congo na Uganda bigakemura ikibazo cya M23 nta mirwano ibaye!

 

Ubu hari amakuru avuga ko ingabo z'igihugu cya leta zunze ubumwe z'Amerika kiri guha imyitozo ikaze ya gisilikare ingabo za Congo mu kigo cya gisilikare cya Gitona , ubwo bufatanye mubya gisilikare bw'Amerika na Congo bukaba bwarateye ubwoba Paul Kagame bigatuma ajya kugura abacancuro bo mu gihugu cya Eritereya bazafasha M23 intambara , ariko iyo myitwarire ya Kagame ishobora kumukurira uburakari bw'ibihugu by'ibihangange bigasaba Kagame gusubizayo abo bacancuro batarwanye n'ubwo yabatanzeho amafaranga menshi cyane yateye igihombo gikabije leta y'u Rwanda bigatuma ihagarika buruse kubanyeshuri ahubwo igahitamo gufunga buri wese uteye agatoki hejuru avuga ko yabuze ubushobozi bwo kwiga !

 

Ikibazo cya Congo kizasiga abayoboye u Rwanda muri iki gihe bagira amateka ateye agahinda !

 

 

 

Ubwanditsi.

Commenter cet article