Ibihugu by’ibihangange byiyemeje gushaka inzira yo kwikiza umuzigo w'urukozasoni witwa Paul Kagame.

Publié le par veritas

    Blair-kag.png

Kuki Tony Blair yihambira buhumyi ku mwicanyi ruharwa ? Ni iki ahora ajya kureba mu Rwanda ? Ababikurikiranira hafi bemeza ko ngo aba agiye kubaka urugo kuko Kagame yamugabiye umugore mwiza cyane w'umunyarwandakazi...!(corruption !) Ngo uwo mwana w'umukobwa ni we ubwira Blair ibyo agomba kwemera no gutangaza ku Rwanda ! Iyi nkuru tuzayibagezaho ubutaha iherekejwe n'amazina n'amafoto !


 
 

Igihugu cya Leta zunze ubumwe z’Amerika kirasa n'igitangiye kuva mu bitotsi, gitangiye kubwira perezida Kagame w’u Rwanda icyo gitekereza nta kundi kumuhendahenda. None ni ryari Abongereza bo bazasobanukirwa ko uwo bagize igihangange atabikwiye mu iterambere yaba ahagaze ku birenge by’ibumba?


  

« Umuyobozi ureba kure bidasanzwe», uko ni ko Tony Blair yitaga Perezida w’u Rwanda Paul Kagame. Bill Clinton na we akungamo, ati «uyu ni umwe mu bayobozi b’ikirenga isi ifite uyu munsi ». Ubusanzwe ibisingizo nk’ibi byajyaga biharirwa uwahoze ayobora Afrika y’epfo Nelson Mandela.   

 


Nyuma ya jenoside, Ubwongereza na Leta zunze ubumwe z’Amerika ntibyahwemye gukoresha ububasha bwabyo bwose, tutirengagije na miliyoni zitabarika z’amadolari yatanzwe mu mfashanyo, hagamijwe guha ingufu ubutegetsi bwa Kagame no muri gahunda zo kuvura igihugu ibisare ndetse no kunga Abanyarwanda bisa n’ibyakozwe na Mandela nyuma ya politiki ya ruvumwa y’ivanguramoko.

 


Ni yo mpamvu icyemezo giherutse gufatwa na Leta zunze ubumwe z’Amerika cyo guhagarika imfashanyo ku Rwanda, kikaba gikurikiwe no kuburira Kagame ko ashobora kuzakurikiranwa mu nkiko mpanabyaha kubera ko akomeje kudurumbanya igihugu cy’abaturanyi cya Kongo, kije ari nk’impinduka ikoza isoni Kagame ariko nanone ikaba ari impinduka yari itegerejwe igihe kirekire.


 

Iyi mpinduka iratuma Abongereza na bo ku ruhande rwabo bemera ko uwabaye umutoni wabo igihe kirekire, akaba yarafatwaga nk’igitangaza cy’umuyobozi , ko mu by’ukuri uwo muntu wabo atari miseke igoroye.

 


Hari impamvu ebyiri u Rwanda rwa Kagame rwakomeje kuba indakoreka kugeza magingo aya:

 

Iyambere ni uko ibihugu by’ibihangange byagumanye inkomanga ku mutima nyuma yo gutererana u Rwanda mu gihe itsembabwoko n’itsembatsemba byabaga mu 1994, bikaba byarahitanye abantu bagera ku bihumbi 800. Bill Clinton wari perezida w’Amerika muri icyo gihe yavuze ko iryo kosa ryabaye aryibaraho ku giti cye. Uyu akaba akubutse mu rugendo yagiriye mu Rwanda mu cyumweru gishize.


 

Ubwongereza, Leta zunze ubumwe z’Amerika n’ibindi bihugu byihutiye gusigasiga ubuyobozi bushya bw'u Rwanda no kubufasha kubaka igihugu bundi bushya, ng'uko uko u Rwanda rwitaweho bidasanzwe ndetse ruranateteshwa. Amariba atemba imfashanyo yafunguriwe icyarimwe, maze amafaranga aza ku bwinshi ku buryo yavuyemo umusaruro ufatika mu rwego rw’uburezi n’urw’ubuzima, mu guhosha ubukene no kubungabunga umutekano.


 

Impamvu ya kabiri, ni uko u Rwanda rwagizwe nk'icyitegererezo ku buryo imfashanyo zigomba gukoreshwa. Ibi byakomeje kuba urwitwazo rw’Ibiro bishinzwe iterambere mpuzamahanga by’Ubwongereza (DFID) igihe cyose Ministeri y’Ubukungu yabaga ishatse gufunga amariba y’imfashanyo. Kugeza ubu Ubwongereza ni bwo buri ku isonga mu gufashisha u Rwanda inkunga itubutse ihwanye na miliyoni 83 z’amafaranga y’Ubwongereza buri mwaka.

 

Umushakashatsi Carina Tertsakian w’umuryango Human Rights Watch yagize, ati« igihe uwitwa Clare Short yari ministiri wa Leta mu Bwongereza, yari umufana ukomeye wa Kagame, ku buryo yumvaga ko Kagame ari intungane, nta kosa na rimwe yakora. » Carina yongeyeho, ati « n’uyu munsi hari abakibifata batyo, ndetse na Tony Blair wahoze ari Ministiri w’intebe w’Ubwongereza yagendeye muri icyo kigare. »


 

Uyu Tony Blair akomeje kuba umwe mu bashyigikiye Kagame buhumyi ,bakamurwanira ishyaka, bagatwikira ibyaha bye bikomeye, ndetse akaba n’umujyanama we w’umukorerabushake. Umuryango yashinze wita ku miyoborere muri Afrika (Africa Governance Initiative) wohereza abanyeshuri kwimenyereza akazi mu biro binyuranye bya Leta y’u Rwanda! Hashize umwaka n’igice Tony Blair abwiye ikinyamakuru The Guardian, ati «  ndi umuntu wemera kandi nkanashyigikira Paul Kagame. Sinyobewe ibyo bamushinja, ariko kandi mujye mwemera ko u Rwanda rutagomba gufatwa nk’ibindi bihugu, kubera ko rwabayemo itsembabwoko n’itsembatsemba. » .

 

Tony Blair yakomeje agira, ati «  ikindi kandi, ntushobora kujya impaka ku ntambwe igaragara u Rwanda rumaze gutera mu majyambere. Uko ngeze i Kigali no mu nkengero z’umugi, bihita bingaragarira ko igihugu kirimo guhinduka. »


 

Uwasimbuye Tony Blair ku mwanya was Ministiri w’Intebe mu Bwongereza, David Cameron, na we asa n’aho afitanye agakungu na Kagame. Ministiri we ushinzwe iterambere, Andrew Mitchell, nta cyumweru amaze avuye gusura u Rwanda. Agikubukayo, yatangaje ko yabwiye u Rwanda na Kongo icyo Ubwongereza butekereza ku midugararo n’ihohoterwa biri mu karere ngo akaba yaratanze ubutumwa adakebaguzwa.


Iyo ni imvugo ya kidiplomasi, naho ubundi Ubwongereza bwakomeje kuruma buhuha ku myitwarire mibisha y’u Rwanda mu gihugu cy’igituranyi cyashegeshwe n’intambara.

 

Icyegeranyo giheruka gushyirwa ahagaragara n’impuguke z’Umuryango w’abibumbye kirimo urutonde rw’amazina y’abategetsi n’abasirikare b’u Rwanda bakorana n’abigometse ku butegetsi muri Kongo:U Rwanda rutanga imyambaro n’ibirwanisho hanyuma rugasahura amabuye y’agaciro ya Kongo izuba riva. Ibyo byose Kagame abihakana yivuye inyuma, ndetse n’Ubwongereza bugasa n’ubwikiriza. Abongereza bakomeje kwihagararaho mu gushyigikira Kagame ahari batinya kwemera no kwicuza ko bashyigikiye umwicanyi ruharwa kuko basanga byabatera ikimwaro gikomeye!


Mu cyumweru gishize, impuguke imwe iba mu Bwongereza yagize iti  : "ubwo Kagame aherutse hano yungikanyije indahiro arahakana, abeshya Ministiri w’Intebe David Cameron n’abandi bategetsi b’Ubwongereza ko u Rwanda rudateza umutekano muke muri Kongo kandi nyamara ibimenyetso simusiga bigaragarira buri wese. »


 

Ubwongereza n’ibindi bihugu bikomeje nanone gufunga amaso ku bibazo byo mu Rwanda imbere. Ubutegetsi bwa Kagame buregwa iterambwoba n’ubwicanyi ndengakamere, ndetse n’ifungwa bya hato na hato byibasira abanyapolitiki batavuga rumwe na Kagame kimwe n’abanyamakuru.


 

 

Iyi nkuru ikurikira  yanditswe na David Smith ari i Johannesburg, itangazwa na The Guardian kuri uyu wa 25 Nyakanga 2012, ihindurwa mu Kinyarwanda na Ismaïl Mbonigaba.


 

 

 

 

Commenter cet article