Harya ngo Prezida Kagame ntashobora gukorerwa kudeta ?

Publié le par veritas

Ngo kudeta bashobora gukora ? Bayikora gusa se ko abahungu bamugarika nko mu gihe cyo guhumbya ijisho ! Nzaba mbarirwa ra !

 

Imwe mu mpamvu  zitera  Prezida  Kagame  kuvuga ngo ntazakorerwa kudeta

 

Kugeza ubu Prezida Kagame aravugwaho abantu batabarika amaze kwica. Muri abo harimo Abanyarwanda  b’amoko yose : Abahutu, Abatutsi ndetse n’Abatwa ; Abarundi , Abagande, Abanyekongo, Abazungu n’abandi ntarondoye. Muri uko kwica kandi nanone ntiyaretse na bene wabo  basangiye ishyaka n’igisilikare ba FPR. Muri abo rero ba FPR, hakaba hari abatangazwa nuko harimo n’ababa  bafite imyanya cyangwa amagarade yo hejuru byumvikana ko nabo baba bafite inshuti n’imiryango  ikomeye, ariko nabo  bagapfa nk’abandi  bakabura gikurikiranwa.Utarabona uburyo asangira n’uwishe se kandi ngo uhagarikiwe n’ingwe aravoma . Umuntu acishirije yashakisha  zimwe mu mpamvu muri iyo migani ariko si izo gusa.


Natwice ntazatumara


Hari abantu bamwe  b’abasilikare bakagize n’icyo bakora, ariko ku bwabo bakaba bamubonamo igikonyozi gishobora guhangana na demokarasi. Bakaba basanga bajenjetse cyangwa  bakamuca mu rihumye bakamuritura,  wenda yazasimburwa n’undi udafite ubuzobere mu bugome n’ubwihanduzacumu,  ni uko we akaba yareka « demokarasi»  igataha mu Rwanda .


Kuri bo kandi iyo bumva demokarasi bahita bayibonamo amatora. Amatora ya banyamwinshi ni uko bakongera bagategeka, bakinjira mu buyobozi bukuru bw’inzego zose  z’igihugu zirimo n’igisilikare. Bakabona rero ko bibaye , agahu kaba gashyikiriye umunyutsi. Bati  “94 abacu bishwe, abenshi bazize urwikekwe n’amahari adafite epfo na ruguru  byari hagati y’amoko, none ubu  noneho urwango ruri   hagati yayo ni ishyano ryose”. Urwo runyagwa rwatewe no kubeshyerana, kwica, gutwara utw’abandi,  kwikubira umutungo w’igihugu… umunsi rwasutswe hanze ntawe uzahonoka .

Bagakomeza bakagira bati “Nimureke Kagame wacu, n’iyo yatwica ntazatumara. Ibiri amambo abo adukingira ni bo badutsembatsemba ntihasigare n’uwo kuzabara inkuru”. Abo kandi ubanza batekereza ko ntacyamukoraho, ko ari rudahangarwa ; ntibatekereza ko  “bucya bwitwa ejo”.


Iryo banga rero Prezida Kagame ararizi akaba ariyo mpamvu ahora yirata ngo nta kudeta iteze kumukorerwa . Nyamara iyaba yari azi  ibyabaye muri Liberia ku bwa Prezida William Tolbert ahagana mu w’1980. Bamubwiye ko bazamukorera kudeta,  arakameza ngo « uwayikora yaba avuye he ko kuva kuri jenerali kugeza kuri ba ajuda bose ari abacu ?». Ni uko nyine iza gukorwa na serija  chefu Samweli Doe .


Urwanda n’ibirurimo byose ni iby’Abahutu


Abo batekereza batyo bari bakwiye gusubiza amaso inyuma, bakibuka indirimbo yakanyujijeho muri za 1994 ngo  “Urwanda n’ibirimo byose ni iby’abahutu” ! Nyamara se abo bayirimbaga ntibakwijwe imishwaro, ubu  u Rwanda n’ibirurimo byose bikaba biri mu maboko ya Kagame Paul n’Agatsiko ke k’abantu batagera kuri bangahe ? 


Aba  JMPR  na TONTON MACOUTE  bo barengeye he?


Mobutu.pngNiba hari abagitekereza ko gutegekesha intwaro bifite umumaro, nabibutsa ko umuperezida witwaga Mobutu Sese Seko Kuku Ngbendu Wazabanga wa Zayire yashinze ishyaka ryitwaga MPR  (Mouvement Populaire de la Révolution) ni uko riza kugira insoresore zitwaga JMPR. “Eh  Buana !” mugani wa ba bandi. Abo basore utabazi arababarirwa. Byari ibihangange  bya hatari, byarakubitaga, bikica, bigakiza,  bigasahura,  bikagira bite … Ariko se ninde wamenye imiyoyokere yabyo ?


Dutereye amaso iyo riterwa inkingi nabwo twakwibuka inkorokoro zitwaga TONTON  MACOUTE zagacishijeho muri HAITI mu myaka   ishize  iyinga 50. Abo rero bajyaho, hari hagamijwe kurinda umutekano, ariko icyo byaje gutanga ni ishyano. Iyo migirigiri nayo itarahembwaga,  dore nyine ko “ntawe uragira iyo adakama” nabo baje kujya bihemba  biba utwa rubanda, si ukwiba gusa kandi bagerekagaho n’ibindi byaha akangari. Ubwo bukozi bw’ibibi bwabo ni bwo bwatumye bavaho, ni uko basiga inkuru mbi mu mateka.


Umuti w’Urwanda uzaba uwuhe ?


Bajya bavuga ngo “urwishe ya nka ruracyayirimo” koko. Uroye ukuntu Urwanda rwategetswe kuva   imyaka n’agahumbi,  usimbuye undi akaza amurusha amakosa inshuro zitabarika ? Ibyo bihita byerekana ko hari ipfundo rigomba gusobanuka. Mu kurisobanura bikazaba ngombwa ko hazaba ikintu gisa nka ARUSHA (ya mishyikirano),  nanone ikabera mu mahanga aho buri wese avuga adakebaguza, ni uko hakaganirwa ku mitegekere yaranzwe mu Rwanda  n’icyateye  amakozere yose igihugu cyaciyemo. Ushaka gukira indwara arayiganira”.


Ubwo  rero nyuma y’ibyo, Abanyarwanda bakagaya abagize uruhare rubi rwo gushora igihugu muri ayo matindi, hagashakwa uburyo budakuka bw’imicungire y’igihugu,    abacyo bagasaranganya  ibibonekamo  ntawe ucuze undi,  haba mu bukungu, mu bumenyi, mu mutekano n’ibindi. Ikibazo cy’Abahutu, Abatutsi  n’Abatwa  nacyo kikabonerwa  umuti  unyuze impande zose, atari ibi usangababanye urw’amafi n’inshishi”. Iyo  witemberera, utambuka ku mafi yikinangura mu  cyuzi cyayo, hakurya ukabona  n’inshishi zibereye mu turimo twazo mu  gisambu,  ukabona ntakireba nabi ikindi. Ariko si igihe amazi abaye menshi  cyane akarenga icyuzi, ya mafi akarya za nshishi. Ejo nabwo amazi yaba macye mu cyuzi, za nshishi zikadukira ya mafi zikayatapfuna !


Kagame ntiyakwemera inama yo gucocerwamo ibibazo


Iyo ni imvugo wumvana abantu benshi  bakagira bati “afite imbaraga, amafaranga n’abamushyigikiye kuva ku izima  ntibishoboka ”. Bokongera bati  “imbaraga zari kumuhashya ni iz’amashyaka yo hanze atavuga rumwe na we (opposition), none yacitsemo ibice, ba Nyamwasa nabo nta  mbaraga zikanganye bafite, FDLR nayo abayigize bashize bataha mu Rwanda”. Ibyo rero ntawabihakana  ngo atsembe  ariko burya ngo agacumu kazaguhorera ntumenya uwagacuze. Abo bavugwaho gucikamo ibice nabo bashobora kuziyungayunga, imbaraga zabo zikazaza zirenga iz’imbarabara. Abo bandi nabo bakerenswa ntiwamenya imbaraga bazaba bafite ejo hazaza  uko zizaba zingana. Ahandi  kandi nabwo umuntu yarambiriza ni  ku mbaraga zazava ku batuye mu gihugu. Buriya bazakomeza bacurwe bufuni na buhoro, ariko umunsi ni umwe ivu rigatumuka. Nyuma y’ibyo, izo mbaraga bavuga za Kagame  zizagenda nka Nyombere .


Justin FAIDA (leprophete.fr)

 

Commenter cet article