DUSANGIRIJAMBO : Itorwa ry’INTUMWA Matiyasi ryakwigisha iki Abanyarwanda ? (leprophete.fr)

Publié le par veritas

Itorwa rya Matiyasi Intumwa.


 

Umubyeyi wanjye yitwaga Matiyasi. Buri taliki ya 14 Gicurasi, ba Matiyasi bose twari duturanye bahimbazaga umunsi mukuru wa Bazina wabo mutagatifu. By’umwihariko wari umunsi mwiza cyane ku bana bato : nyuma y’igitambo cya misa, twazengurukaga mu ngo za ba Matiyasi, tugakora umunsi mukuru, ibiribwa n’ibinyobwa…bikatugeraho ku bwinshi ! Iyo twageraga muri buri rugo, icyabanzaga kwari ugutega amatwi isomo ryo muri Bibiliya rivuga itorwa rya Matiyasi intumwa, ku buryo ndetse abana bari bararifashe mu mutwe ! Hakurikiragaho kuririmba ya ndirimbo igira iti :

 

Mutagatifu Matiyasi,

Munsi wubahaga Imana,

None yakwituye ibyiza,

Turagushima uyu munsi...

 

Abo ba Matiyasi bose twahimbazaga icyo gihe nta n’umwe ukiriho ! Kwibuka…..

 

Kuri iki cyumweru kibanziriza umunsi mukuru wa Pentekosti, Liturjiya iradusaba kuzirikana itorwa ry’intumwa Matiyasi. Iyo nkuru tuyisanga mu gitabo cy’Ibyakozwe n’Intumwa 1,15-26. Matiyasi yatorewe gusimbura Yuda. Turibuka neza uko Yezu yatoye intumwa 12, kugira ngo zizamufashe kugeza Inkuru nziza y’umukiro ku bantu bose batuye isi.

 

Mbere yo gutora Intumwa 12, Yezu yaraye ijoro ryose asenga Imana kugira ngo imurikire ayo MATORA. Yatoranyije mu ncuti ze z’amagara abagabo yari yizeye kuruta abandi, bafite ubushake bwo kumukurikira no gufatanya na we gukiza isi . Nyamara umwe muri bo yaje guta umurongo aramugambanira, baramwica.


1. Yuda yazize iki?


Yuda yari umuntu ukwiye kwizerwa, yari intungane, ntabwo Yezu yamutoreye kugira ngo azamugambanire! Ahubwo kuba Yuda yaragurishije uwamutoye bitwumvisha ko  Umuntu agumana UBWIGENGE bwe, kugeza n'aho ari bwo  aheraho mu guhangana n’Iyamuhanze!


Nk’uko Petero abivuga uyu munsi “Yuda yataye(déserter) ku bwende bwe umurimo mwiza yari yaratorewe”, amaherezo ye aba ayo gupfa nabi yimanitse. Yuda yazize ingeso yo gusumbisha inda ye ubutumwa bwiza bwo gukiza benshi yari yaremeye nta gahato. Bibaho !

 

Iyo umuntu wahawe kwita ku nyungu za benshi agize atya agahitamo kwita ku nyungu ze zonyine, ndetse agafata ibya benshi akabyita ibye wenyine, aka wa mugabo urya utwe akarenzaho n’utw’abandi,  aba atatiye umurimo wo kuba ingirakamaro .Iyo uwo muntu ari umutegetsi w'igihugu aba akwiye kwegura cyangwa se kweguzwa mu maguru mashya atarakora ishyano: kwimanika cyangwa kumanika abo ashinzwe! Ntihakagire ubabeshya, nta mahoro y’umuhemu: n'iyo atimanitse ngo bigaragare apfa ahagaze , kandi urwo nirwo rubi !


2. Umurimo we uzahabwe undi!


Intumwa zari zarumvise neza ko umubare wazo wa 12 ufite icyo usobanura. Koko rero ntiwagenuraga gusa imiryango 12 ya Isiraheli , uwo mubare ni n’umubare w’IKIPE YUZUYE! Muri iki gihe twavuga ko umubare 12, ari uw’Ikipe ya  Football=11+umutoza wayo ; cyangwa  iya Volleyball n’abasimbura bayo….Kugira ngo ikipe igire abafana bayishyigikira igomba kuba ari ikipe yuzuye, ifite umutoza (muzima nka Yezu), yemera gukora imyitozo, yemera kujya mu kibuga abakinnyi bakagabana imyanya hakurikijwe impano ya buri mukinnyi, bityo IKIPE igashobora gutsinda ibitego no gutwara ibikombe….


Intumwa zibibwirijwe na Roho Mutagatifu zumvise kare ko zigomba gusimbura Yuda kugira ngo umubare ugize IKIPE Yezu yashatse ukomeze wuzure. Kwamamaza inkuru Niziza si umurimo w’umuntu umwe, ikipe yari ngombwa, kandi koko bariya bagabo 12 gusa baragakoze, Inkuru nziza bayamamaza ku migabane yose y’isi, dore imyaka ishize irenga 2000 ibyo bitangiye! N’ubu Match iracyakomeza.


(1)Ni irihe tegeko ryayoboye ITORWA rya Matiyasi  ?


Nuko Petero  araterura ati: “Dore icyo tugomba gukora: Hari abantu babanye natwe mu gihe cyose Nyagasani yari kumwe natwe, guhera ku munsi abatijwe na Yohani kugera atuvanywemo agasubira mu ijuru. Ni ngombwa ko umwe muri bo afatanya natwe kuba UMUHAMYA W’IZUKA rye”.  Nuko bahitamo abakandida 2, Yozefu Barisabasi bitaga Justus(kubera ubutungane bwe bwari buzwi na bose !)  na Matiyasi. Hanyuma ikoraniro risenga Imana muri aya magambo : Nyagasani  wowe uzi umutima wa buri muntu, twereke uwo uhisemo muri aba bagabo bombi kugirango ahabwe umurimo wa gitumwa Yuda yataye akajya kwimanika. Nuko bakora ubufindo, maze ubufindo bufata Matiyasi, kuva ubwo yinjira mu RUGAGA rw’Intumwa zari zisigaye ari 11”.


Iyi nkuru iratwereka uko Kiliziya yatangiye kwisuganya, ihereye ku Ntumwa Yezu yari yaratoye. Gusa urupfu rwa Yuda rweretse Intumwa ko zitazabaho ubuziraherezo hano ku isi kandi nyamara ubutumwa zari zaratorewe bwo bwagombaga gukomeza na nyuma y’urupfu rw’Intumwa za mbere zose. Bumvise kare ko bagomba kwemera no kwitegura KUZASIMBURWA.


(2)Intumwa itorwa hashingiwe kuki?


Mu gutora Matiyasi ntabwo hashingiwe ku gihagararo cyangwa ubundi bwemarare bushingiye ku mico myiza y’umuntu ku giti cye. Ikibyemeza ni uko Matiyasi  nta handi avugwa  muri Bibiliya mbere y’uko atorwa. Ndetse na nyuma yo gutorwa nta handi Bibiliya yongera kumuvuga. (Bivuze ko burya hari abandi bantu basanzwe batari bake bakurikiraga Yezu, uretse ziriya ntumwa 12).


Nyamara  CONDITION y’ingenzi Matiyasi yari ayujuje: kuba yarakurikiye Yezu ubutagoheka (Fidélité) hamwe n’Intumwa guhera mu ntangiriro Yezu abatizwa, akaba yarumvise inyigisho ze mu gihe cy’imyaka igera kuri itatu yose, akaba yarasangiye na we kandi akaganira na we, akaba yaramubonye apfa ariko cyane cyane akaba yaramubonye amaze KUZUKA mu bapfuye! Le point est là.

 

(3)Intumwa itorerwa iki


Nta bundi butumwa Matiyasi yahawe uretse gufatanya n’izindi Ntumwa kuba UMUHAMYA w’IZUKA rya Nyagasani Yezu.


Iri tora riratwereka UBWIGENGE n’URUHARE rukomeye buri Ntumwa ifite mu kubaka Kiliziya no kwamamaza Inkuru Nziza y’Izuka. Muri make, ”Byose bikorwa n’abantu”. Intumwa nizo zitora izindi ntumwa. Hatagize abantu bitanga, ngo batekereze, batore abafasha babo,….bagategereza ko Imana izabakorera byose….ntacyakorwa!


Na none ariko uruhare rukomeye rw’abantu rugira agaciro iyo ruretse kuba urwa kimuntu gusa, ngo ruyoborwe n'urunturuntu, Imana nayo igahabwa umwanya. Imana niyo dukomoraho indangagaciro zirenze kamere muntu yonyine (Ubutabera, Ubuvandimwe,Urukundo...).Itora rya Matiyasi ryakozwe mu nzira y’ubufindo (tirage au sort). Byari byoroshye ko Petero yagira ati njye ndabona ari Matiyasi cyangwa Barsabasi ukwiye uyu murimo. Nyamara siko byagenze. Nyuma yo gusenga, ahari batereye igiceri hejuru…Abayahudi b’icyo gihe bemeraga ko iyi nzira y’ubufindo ari bwo buryo bwiza bwo guharira Imana icyemezo cya nyuma. Ng’uko uko Roho Mutagatifu ari we ubwe wahisemo Matiyasi ! Yapfuye ahowe Imana, Abagereki bemeza ko yaba yariciwe muri Etiyopiya.

 

3.Iyi nkuru yakwigisha iki Abanyarwanda muri iki gihe?


Mu gihe igihugu cyacu cyugarijwe n’AKARENGANE KARENZE IGIPIMO, inkuru nk’iyi yatwungura byinshi :

 

(1)Abanyarwanda benshi barihebye , bahora mu cyunamo kidashira kubera gupfusha abantu benshi bazize akaboko k’undi munyarwanda no gutakaza imitungo bagezeho biyushye akuya ! Birakwiye ko Abahamya b’Izuka bakora umurimo wabo wo guhoza abashavuye(Consolation). Nanone ariko biragoye cyane guhoza ABAGIPFUSHA….Umurimo wo GUHOZA ukwiye kujyana n’uwo guhagarika imashini yica Abanyarwanda umusubizo. Ni ukuvuga ko umurimo w’Intumwa zigisha Inkuru nziza y’Izuka ukwiye kunganirwa n’umurimo w’Izindi Ntumwa ziyobora igihugu mu nzira y’UBUTABERA.

 

(2)Kugira ngo Ubutabera bugere ku Banyarwanda bose cyane cyane abakene, hagomba kuboneka abagabo 12 b’intwari biyemeza kwitanga kugira ngo ibintu bihinduke mu gihugu.

 

(3)Si ngombwa ko abo bagabo baba abantu b’ibihangange basanzwe bazwi kuri« scène politique nationale et internationale ! ». Bene abo twarabategereje amaso ahera mu kirere, none imyaka n’imyaniko irashize, ntibigaragaza !Abakomeza kwituramira bibwira ngo « Hari abandi babirimo… »basubize amerwe mu isaho !


(4) Abo bagabo bagomba kuba gusa ari ABAHAMYA b’uko Akarengane kifashe mu gihugu (uko Abanyarwanda bamburwa uburenganzira bwabo: uko bavangurwa, uko bafungirwa ubusa, uko bakubitwa, uko basenyerwa amazu, uko barandurirwa imyaka, uko bamburwa imitungo yabo,uko bicirwa ubusa…). Abavugira mu kirere gusa batazi ibibazo nyakuri abenegihugu barimo cyangwa se ababyirengagiza nkana ; abatitaye k’uko abaturage babayeho ; abitekerereza gusa imyanya y’ubuyobozi bazakukana…abo ni abashumba b’inda zabo zonyine, ntibajyanye n’igihe, nta n’icyo bamaze.


(5) Nk’uko nta muntu wari kwiterera mu rugaga rw’Intumwa atabitorewe, abakwiye kwitwa ABAYOBOZI beza b’igihugu si abarusha abandi ubukana bwo gufata ubutegetsi ku ngufu ! Nk'uko amateka yacu yabitweretse, "Bene abo" nibo ba NYIRABAYAZANA b’ibibazo byose bitwugarije. Niba Itegeko nshinga u Rwanda rugenderaho muri iki gihe ritinyuka rikavuga ngo : Ubutegetsi bwose bukomoka ku mbaga y’Abanyarwanda ...kandi nta Gatsiko cyangwa umuntu ku giti cye wakwiha ubutegetsi, (Ingingo ya 1 n’iya 2)…nihigwe inzira zose zishoboka ngo Abanyarwanda batangire bayoborwe n’Abategetsi bihitiyemo, bibonamo, bafitiye icyizere! Hatabayeho IBIGANIRO byimbitse kuri icyo kibazo… intambara zizakomeza zibe ndende!


(6) Ubwo igihugu cyacu kirimo abategetsi benshi barenganya rubanda, kandi abo bategetsi bakaba batiteguye GUSIMBURWA, kubasimbura ntibizoroha kandi ntibizikora, icyo akaba ari nacyo gitera benshi KUGIRA UBWOBA. Niyo mpamvu Abagabo 12 bakenewe kugira ngo bashobore kugira icyo bahindura mu Rwanda bagomba kuba ari ABAHAMYA B’IZUKA rya Nyagasani. Ni ukuvuga abantu (abagabo n’abagore) barangije kumva neza no kwemera n’umutima wabo wose ko no « HAKURYA Y’IMVA HARI UBUGINGO ». 


Naho ba bandi batuye ku bilometero 10.000, kure y’u Rwanda, nyamara hakoma gato bagatera hejuru, ngo murabe maso Kagame yohereje ba Maneko be kutumara….kubashingiraho amizero ni uguta irembo ugaca mu cyanzu!


Iyaba twese twashoboraga kubyumva kimwe:


Mu Rwanda rw’iki gihe gukora politiki irwanya akarengane igasubiza Abanyarwanda UBWIGENGE n’UBUTABERA, si ibintu byo gukina: ni UGUTINYUKA, ni UKWITANGA, byaba ngombwa ukamena amaraso yawe aho kumena ay’abandi! Na Matiyasi Intumwa yapfuye yishwe kubera ubutumwa bwe bwo kwamamaza Inkuru Nziza...ariko tumwemera nk'intwari kandi ariho mu ikuzo rizira iherezo.


Niba rero ari uko ibintu byifashe, ubwo se izo NTUMWA 12 Abanyarwanda bategereje zizaboneka zite? Ryari?


Ko njye numva nakwitanga nkaba umukandida wo kwinjira muri urwo rugaga , nawe wabyemera?


 

Padiri Thomas Nahimana.

 

Commenter cet article

muyobozi@yahoo.fr 21/05/2012 08:38


Ariko uyu mupadiri yaje mu Rwanda akerekana ko ashaka ko u Rwanda ruyoborwa. Akiri mu Rwanda ntiyigeze avuga imvangura ryakorwaga ntacyo yavugaga. Ubu umunyarwanda arishyira akizina, nta muntu
uzira icyo ari cyo. Ariko imburamukoro zirirwa kuri internet zandika ubusa. Se mwibwira ko abanyarwanda batazi gushishoza, babona ko ibi mwandika nta gaciro bifite, ari ugushaka iposho
ry'abazungu. Internet se isomwa na bangahe.Politique yo kuri internet!!! Quelle politique!!!!!Watashye ukerekana uko wayobora neza!!!! Amatiku gusa!!!!!!!!!!!!!!!!!!Uhamagaye so utuye Nzahaha
azakubwira ko ubutegetsi bumutwaye iki!!Bumubuza kwihingira umurima we, bumubuza kwishyira akizana. Erega wa mupadiri we ujye utubaza twamenye ubutegetsi bubi!!!! Widutesha igihe wandika
amahomvu. Imana nayo irareba ko uri mu matiku!!! Utanditse ibi abazungu bakubaza icyo ukora aho!!!!!Malheureusement uzarinda uhenuka ntacyo bitanze!!!!Ubisoma wese, abona ari amateshwa!!! amatiku
gusa!!!!