Dusangirijambo :Abanyarwanda bateye impuhwe kuko bameze nk'intama zitagira Abashumba! (leprophete.fr)

Publié le par veritas

Harya ngo muri iki gihe Abatutsi bonyine nibo bashoboye kuba abayobozi bakuru b'ingabo z'igihugu ? Koko nta mu ofisiye n'umwe w'umuhutu ukwiye umurimo nk'uwo ? Iri si ivangura gusa , ni ikimenyetso cy'ubutegetsi bwenda kuvamo umwuka!

 

 

“Mbega abashumba b’abatindi, batererana intama zikicwa urubozo  cyangwa bakazireka zigateragira…Kubera ubukozibwibibi bwanyu intama zanjye zarayobaguritse ndetse ziratatana kuko mwanze kuzitaho. Kubera iyo mpamvu rero ni mwebwe ngiye guhagurukira!”(Yer23, 1-2)


Ngayo amagambo atangira ubutumwa umuhanuzi Yeremiya yatugeneye kuri iki cyumweru!


1. Ubutumwa bw’umushumba ni ubuhe?


Umurimo w’UMUSHUMBA cyangwa UMWUNGERI ni ukuragira intama. Kuragira  ntibivuga kujyana mu rwuri gusa ahubwo bisobanura gukenura. Ni ukwita ku ntama muri byose: kuzigaburira, kuzisukura, kuziririmbira, kuzivura igihe zirwaye, kuzitabara no kuzirengera mu gihe zatewe cyangwa zihigwa n’inyamaswa z’inkazi.


Umushumba mwiza ni ukora ako kazi kose atitangiriye itama, kandi kuko  ako kazi gasaba ubwitange budasanzwe, umushumba mwiza ntiyagatunganya atageretseho GUKUNDA INTAMA ashinzwe!


Iyo umushumba adakunda intama akora nk’Umucancuro, ashyize imbere inyungu ze bwite gusa! Ubuzima bwiza bw’intama ntacyo buba bukimubwiye ndetse iyo amagara atewe hejuru, umushumba mubi akiza aye, ay’intama agasandara!


2. Abayobozi b’igihugu n’ab'amadini ni ABASHUMBA.


Mu bihugu by’Ubulayi bw’iburengerazuba bakunze kenshi gukoresha ishusho (metaphore) y’umushumba bashaka kuvuga abami. Muri Isiraheli iyo shusho yari ikwiranye ahanini n’umwami Dawudi kuko we yabaye koko umushumba w’amatungo mbere yo gutorerwa kuba umwami. Iyo shusho kandi yakomeje no gukoreshwa ku bamukomokaho.Byumvikane rero ko Umwami mwiza ari uwita ku baturage b’igihugu cye nk’uko umushumba mwiza yitangira amatungo ye.


Icyo abaturage b’igihugu baba bateze ku bategetsi babo ni ubutabera, uburinganire, umutekano n’amahoro (droit, justice, sécurité). Umutegetsi ushoboye guharanira izo ndangagaciro afasha abaturage be kuticamo íbice ahubwo bagahora baharanira ubumwe.

 

Mu ibaruwa Pawulo Mutagatifu yandikiye Abanyefezi (3,13-18) , aremeza ko ababatijwe bagomba kurenga ibibacamo íbice ahubwo bakarangwa n’ubumwe , kwiyunga, bityo bagashobora kubaho babanye mu mahoro . Ibyo kandi abivuga anenga cyane imigenzereze igayitse yagaragaye mu Rusengero rukuru rw’i Yeruzalemu aho wasangaga icyumba kinini cyagenewe Abayahudi bonyine, abandi (abataragenywe) bakaba bari babujijwe kugikandagizamo ibirenge(le parvis d’Israel). Icyo cyumba nicyo Pawulo yita urukuta rw’urwango (le mur de la haine).

Byumvikane neza ko iyo mu iyobokamana harimo ukwivangura guteye gutyo, ibintu biba biteye inkeke !


3. Abakristu b’Abanyarwanda batekereza iki ku rukuta rw’urwago ?

 

Muri iki gihe, n’ubwo mu Rwanda ababatijwe ari benshi, n’ubwo twese twemeza ko twayobotse Kristu, guharanira ubumwe bw’abana b’Imana biracyari ingorabahizi! Kuri benshi, kuba Umuhutu cyangwa Umututsi biracyafite agaciro karenze kuba dusangiye ukwemera. Iyobokamana ntirirashobora kutubera isano isumba iy’amaraso, mbese nk’uko byari bimeze mu gihe cya Yezu hagati y’abayahudi n’abataragenywe! Ubukristu ntiburashobora kutubyarira ubuvandimwe nyabwo! Ibimenyetso birigaragaza.


Irondakoko riravuza ubuhuha mu Rwanda kandi no mu kiliziya ntiribuze! Hagenderwa ku bwoko mu gutanga akazi, buruse, mu gisilikari, muri polisi…ivanguramoko ryahawe intebe kugera no mu irimbi : hari abafite uburenganzira bwo gushyingurwa mu cyubahiro abandi bo bakaba badakwiye guhambwa nk’abantu! Kuba ivangura nk’iryo rigishobora guhabwa intebe mu kinyejana cya 21,  biteye ubwoba, hari ubwo umuntu abitekerezaho akibaza niba Abanyarwanda nabo ari abantu!


Nyamara iyo witegereje neza usanga bamwe mu biyita abakristu aribo bashyigikiye bene iryo rondakoko! Kandi ibyo ntibibabuze kwirirwa mu biterane by’amasengesho no kwamamaza hose ko ari abakiranutsi, ko bafite ukwemera gushyitse, ko ari bo bakristu b’intangarugero! Mu by’ukuri ahantu hose hagaragaye kuvangura abantu no kwicamo íbice, byerekana ko SEKIBI (le Diviseur) yahashinze amajanja. Kuvangura ubwoko no kwicamo íbice nk’uko bigaragara mu Rwanda rw’iki gihe, aho hatoneshwa ubwoko bumwe bw’Abatutsi ubw’Abahutu bugahindurwa ruvumwa, byerekana ko ukwemera Kristu kwabo kuba kurwaye bikomeye. Ntawakwemera Batisimu imwe ngo agaruke abone muri bagenzi be ba Nyagupfa, badakwiye kuramirwa.


Muri make, urukuta rw’urwango ruracyakomeye mu Rwanda, ndetse no mu nsengero, mu misigiti naza kiliziya urwo rukuta rurahari ndetse barusize irangi! Aho abayobozi bakuru b’amadini nabo barabibona?


4. Abanyarwanda bameze nk’intama zitagira abashumba!


Birababaje cyane kuba abategetsi benshi bo mu Rwanda nta yindi gahunda bagira uretse guharanira inyungu zabo bwite, gutererana abaturage no kubacamo ibice (Diviser pour regner). Politiki yo gushaka abanzi(IBIPINGA,ADUI) mu benegihugu , nta kindi yageraho uretse gusenya igihugu no kugitwika kugeza kibaye umuyonga!


Uwareba uko benshi mu Banyarwanda bahora bahagaritse umutima kubera iterabwoba ribahora ku mutwe, uwakwitegereza uko Abanyarwanda basonzeye ubutabera n’amahoro ariko bakuhirwa akarengane n’igitugu, uwareba uko Abanyarwanda bifuza gusaranganya uduke Imana yabahaye ariko bakabangamirwa n’Abategetsi bikunda kurusha abazima n’abapfuye, bahora bashaka kwikubira bonyine ibyiza by’igihugu,  uwakwitegereza ukuntu Abanyarwanda benshi cyane bananijwe mu mutwe no mu mubiri, ntiyabura kubagirira impuhwe nka Yezu(Mariko 6, 30-34), ndetse byacamo agaturika akarira  kuko mu by’ukuri Abanyarwanda b’iki gihe bameze nk’intama zabuze abashumba!


Na none ariko amarira yonyine siyo gisubizo, ikiruta byose ni ugutinyuka kwitoza no kwiyemeza kureka Imana ikagutora maze ikahoreza kubabera UMUSHUMBA MWIZA.

 

Icyumweru cyiza ku bakunda Imana n'u Rwanda mwese.

 

Padiri Thomas.

 

Commenter cet article

muyobozi@yahoo.fr 21/07/2012 19:14


Ubwo rero uzanye irondakoko! Se abo bahutu bavehe ko abaribo ari abicanyi. Abazima baraje kandi bari muri bariya wita abatutsi gusa!! NGENDAHIMANA na RWARAKABIJE se ntabo ubona hariya!!!! None se
abandi barihe!!!! Reba mu bajeunes bariho ubu, iranga muntu yanyu siyo dukoresha wamupadiri w'umwextremiste we!!!Ibi se wanditse uribwira ko hari uwo bishitura cyangwa uribwira ko hari ubiha
agaciro!!!!!Puuuuuuuuuuuuuuuuuuuuuu!!!!!!!!!!!!!!!!!!!!!!!!