ABATELEFONA MU RWANDA MURI HANZE MUGOMBA KWIZIRIKA UMUKANDA :IBICIRO BYO GUTELEFONA MU RWANDA KUBARI HANZE BYARIYONGEREYE BIGIRWA IBANGA!

Publié le par veritas

 

tele.pngImikorere y’ubuyobozi bw’u Rwanda mu nzego zose , yaba iya leta cyangwa ibigo byigenga usanga ihindagurika buri kanya , byagera kubyerekeye ifaranga na politiki bigahinduka bibi nk’ikirere nta nteguza kenshi bigatera igihombo abashoye imari yabo mu bikorwa by’ubucuruzi; ariko noneho iyongezwa ry’ibiciro ku bantu bari hanze y’u Rwanda batelefona mu Rwanda riragaragaza urujijo n’uburiganya!

 

Inkuru y’uko ibiciro byo guhamagara mu Rwanda na telefonee byahindutse yatangajwe n’urubuga rw’ikinyamakuru igihe.com ; veritasinfo yatangaje iyo nkuru yo ku gihe nkuko yari yatangajwe ,ariko mu gihe gito iyo nkuru yarasibwe ariko urwo rubuga ntirwagira ikindi rutangaza , veritasinfo yabajije abakozi bo muri RURA bivugwa ko ariyo yahinduye ibiciro; abo bakozi bavuga ko inkuru yatangajwe ku gihe.com atariyo ; veritasinfo yashatse kumenya uko ibiciro bya telefoni byifashe mu Rwanda isanga ibyo abakozi ba RURA bayibwiye nabyo ataribyo! Ikibazo kifashe gite ?

 

Urujijo mu biciro by’itumanaho rya telefoni mu Rwanda:

 

Urujijo mukongera ibiciro by’itumanaho rya telefoni mu Rwanda ririmo ibice 3 aribyo ibi bikurikira:

 

-Igice cya mbere: Iki gice kigaragazwa n’inkuru yatangajwe n’urubuga igihe.com taliki ya 20/07/2012 tukayinyuza no kuri veritasinfo: Mu nkuru urubuga igihe.com rwatangaje , rwavuze ihinduka by’ibiciro byo gutelefona muri aya magambo:Abantu bose bakoresha itumanaho ryo mu Rwanda, batangiye kujya bacibwa amafaranga igihe bitabye telefoni zo hanze, kandi ibyo bigakorwa no ku banyamahanga bitabye telefoni zo mu mahanga bari mu Rwanda, nk’uko byatangiye ku itariki ya 1 Nyakanga 2012. Ibyo biciro byiyongereye, nyuma y’aho Ikigo cy’ibikorwa bifitiye igihugu akamaro (RURA) cyari cyemeje ko uwitabye telefoni yo hanze yagombaga kujya yishyura amafaranga 66.1, ariko ubu yikubye kabiri agera ku mafaranga 132.2 ku munota”.

 

-Igice cya kabiri :ubwanditsi bwa veritasinfo ; bumaze kubona iyo nkuru yatangajwe n’igihe.com bwihutiye kubaza bamwe mu bakozi bi’ikigo cya RURA maze nabo batangaza ibi bikurikira kuri iyo nkuru y’ibiciro: “umunyarwanda cyangwa umunyamahanga ukoresha MTN Rwanda uzajya asohoka akajya hanze y’u Rwanda (mu mahanga) azajya ahamagara umuntu uri mu Rwanda noneho muri icyo gihe akariha iryo tumanaho (aho niho igiciro kiyongereye) ariko uwakira ubutumwa mu Rwanda ntacyo ariha , noneho igihe uri mu Rwanda ahamagaye uwo uri mu mamahanga ufite ya  telefoni ya MTN Rwanda azajya ariha ku giciro gisanzwe cy’uhamagaye umuntu mu Rwanda ariko wawundi uri hanze y’u Rwanda wakiriye ubwo butumwa nawe azajya ariha ubwo butumwa yakiriye (aho niho igiciro cyongerewe kiva kuri 60 kijya kuri 132.2 ku munota).

 

-Igice cya gatatu: Nyuma y’ibisobanuro byatanzwe n’abakozi ba RURA ,veritasinfo yanyarukiye ku masoko y’itumanaho hanze y’u Rwanda: Afurika-Amerika-uburayi –Aziya n’amasosiyete akoresha uburyo bwa Voip kuri internet; icyagaragaye hose ni uko ibiciro byo guhamagara umuntu uri mu Rwanda ku bantu bari hanze yarwo byikubye incuro zirenga ebyiri kuburyo bwose bwakoreshwa! Dufashe nk’urugero rw’ igiciro kiri hasi cyane ku bantu bakoresha uburyo bwo guhamagara mu Rwanda bari hanze (voip) ku munota barihaga amafaranga hafi 60 y’u Rwanda (0.08€) nyuma y’italiki ya 01/07/2012 igiciro cyarazamutse kigera hejuru y’amafaranga y’u Rwanda 132.22 (0.18€ ); naho kubakoresha amakarita y’itumanaho akoresha iminota , ikarita yabaga ifite iminota 80, ubu ni iminota 38.

 

Nyuma yo kubona ko ibiciro byo guhamagara mu Rwanda byiyongereye HOSE , niho bigaragara neza ko amakuru yatangajwe ku iyongerwa ry’ibyo biciro atariyo kuko ari igihe.com ari n’abakozi ba RURA bemezaga ko ibiciro byongerewe kubakoresha itumanaho ryo mu Rwanda ariko mu by’ukuri ibiciro byikubye incuro zirenga ebyiri kubantu bose bahamagaye mu Rwanda bari hanze yarwo  ku itumanaho iryo aryo ryose bakoresha !   


Uburiganya muri iryo yongezwa ry’ibiciro:

 

Si igitangaza ko ibiciro by’itumanaho byakwiyongera ku mpamvu iyo ariyo yose ariko aho uburiganya buri ni uko iyongerwa ry’ibi biciro ryategetswe na leta y’u Rwanda, ntabwo iki cyifuzo cyaturutse kumasosiyete y’itumanaho ikindi kigaragaza uburiganya bukomeye ni uko ari leta ari n’aya masosiyeti yitumanaho byongereye ibiciro mu ibanga ahasigaye hakajya hatangazwa amakuru ameze nk’ibihuha ku iyongerwa ry’ibiciro inego zisbishinzwe zikicecekera ntizivuge uko ikibazo giteye! Ibi bivuze ko abantu bakomeje gutelefona uko bisanzwe ntibasobanukirwe uko amafaranga ari kubashiraho kandi bari kuba barabimenye mbere bakamenya uko bizirika umukanda ! Abantu benshi bari kujya bikoma amasosiyeti yo mu mahanga bafitemo ifatabuguzi ko abiba ahubwo byose byaratewe ni uko u Rwanda rwongeje ibiciro by’itumanaho maze bakabigira ibanga!

 

Ahasigaye abashaka kuvugana n’ababo twababwira iki , ikingenzi ni uko bamenya no kwizirika umukanda mu magambo !  

 

 

Ubwanditsi bwa veritasinfo

 

 

 

 

 

 

Commenter cet article