Rwanda: Ubutegetsi bwa FPR-Inkotanyi buri kudagadwa, ibyo bigatuma bwihimura kubayozi b’amashyaka atavuga rumwe nabwo!
Mu minsi ishize, ibikorwa byo gushimuta no kugirira nabi cyane cyane abayoboke b’amashyaka atavuga rumwe n’ubutegetsi byariyongereye. Iyo bashimuswe abazobereye mu byo kwica babatera ubwoba ari nako banabasaba kuva muli ayo mashyaka bitaba ibyo ngo bakazabarasa ku manywa y’ihangu!
Impamvu ni uko, nyuma y’ikinamico ryari rigamije kwereka amahanga ko Abanyarwanda bifuza ko Itegeko nshinga rwavugururwa kugirango Prezida Kagame ashobore kongera kwiyamamaza, ubutegetsi bwa FPR Inkotanyi, buri kudagadwa bukaba buri kwibaza uko bizagenda amatora ya Prezida nagera. Kandi koko, kubera kumerera nabi abaturarwanda b’ingeri zose, ntibuzi neza uko bishobora kuzagenda igihe cy’amatora ya Prezida, haramutse hagize undi utinyutse kwiyamamaza.
Irindi hulizo FPR - Inkotanyi itabonera umuti, ni uko abashyigikiye ingoma ya Kagame bashobora kumutega undi mutego, noneho bakamusaba gufungura amarembo ya politiki, hakiyamamaza abakandida benshi, bagahabwa urubuga nk’abayoboke ba Leta. Muri icyo gihe abanyarwanda bashobora gutinyuka bagatora uwo bashaka, maze FPR - Inkotanyi igatsindwa burundu. Ubu rero irimo irafata umuhisi n’umugenzi ikeka ko atayishyigikiye.
Ku italiki ya 18/09/2016, Bwana Jean - Marie Vianney KAYUMBA Visi -Perezida n’Umuvugizi w’ishyaka PDP - IMANZI mu Rwanda, bagenzi be Bwana Innocent Kwihangana na Aloys Harerimana batawe muri yombi na Polisi y’u Rwanda. Kuri uwo munsi kandi, Bwana Theophle Ntirutwa uhagaraliye FDU - Inkingi mu mujyi wa Kigali yarashimuswe, hanyuma Polisi iza kwemera ko ariyo yamufashe iramurekura. Abo bagabo bose bahaswe ibibazo byinshi, baterwa ubwoba ndetse Théophile Ntivunwa we akorerwa iyica rubozo kuko yari afite n’ibikomere bikomeye byagaragaraga amaze kurekurwa. Aba bose basabwaga kwitandukanya n’amashyaka bahagaraliye.
Kw’italiki ya 23/08/2016 abapolisi bataye muli yombi umuyoboke ya FDU - Inkingi Mademoiselle Leonille Gasengayire, bamurega ko yaba yaragiriye inama abaturage yo kwanga gucuzwa ibyabo nta ngurane ikwiriye babonye. Ikibabaje ni uko abo bantu bitwa ko bashinzwe umutekano ari bo babuza amahwemo abo bashinzwe kurinda, nyamara bahembwa amafaranga ava ku misoro y’abo balimo kwicishisha urubozo. Ikindi kibabaje akaba ari uko, abo bashinzwe kubahiriza amategeko balimo kuyica nkana, kandi koko abapolisi barahilira kutazivanga mu bintu bya Politiki.
Birabaje rero kandi biteye agahinda ko ubutegetsi butinyuka gushora abashinzwe gucunga umutekano w’abaturage mu bikorwa byo kubatoteza no kubaniga. Igishimishije ariko ni uko izi mpirimbanyi zose zanze kuva kw’izima, kandi abantu benshi bakaba bamaze kubona ko biliya bikorwa RPF Inkotanyi ibakorera byatumye babona ko nta gisigaye uretse gukorera hamwe kugira ngo ubutegetsi bufite urugomo nka ruliya buveho.
Twongeye kwamagana twivuye inyuma ibikorwa biteye isoni bya FPR -Inkotanyi byo gushimuta no kwica urubozo abatavuga rumwe nayo. Duhamagariye abaturage gushirika ubwoba bakigobotora iriya ngoma y’igitugu ikomeza kubabuza amahwemo, kubiba umwiryane mu baturarwanda no kubacuza utwabo.
Bikorewe i Buruseli, kuwa 29 Nzeli 2016.
Jean – Damascène Munyampeta
Chair Platform
acteur.changement@gmail.com
+32488 96 37 65.