Rwanda : ku kibazo cy’impunzi, Madame Mukantabana arabeshya, akagera n’aho yibeshya ubwe!

Publié le par veritas

Mukinyarwanda baca umugani ugira uti : «Umwera uturutse ibukuru, bucya wakwiriye hose»; birumvikana ko abanyarwanda batagize amahirwe yo kwiga uru rurimi rw’ikinyarwanda mu mashuri (kuko ikinyarwanda cyaciwe mu mashuri na leta ya Paul Kagame) badashobora kumva uyu mugani, ariko muyandi magambo, uyu mugani usobanura ko icyo umuyobozi mukuru avuze ari nacyo abagaragube bavuga! Muri iki gihe Paul Kagame uyoboye u Rwanda agaragara muruhando mpuzamahanga nka Semuhanuka kubera ibinyoma byinshi yabeshye amahanga, none n’abaministre be duhereye kuri Mukantabana niko bameze! Ikinyoma kimeze nk’inkota y’amugi abiri, urabeshya ukageraho nawe ukibeshya kandi bikakugiraho ingaruka! Ikinyoma cya Madame Mukantabana kigaragara ku ngamba zo gukemura ikibazo cy’impunzi z’abanyarwanda, amaherezo icyo kinyoma  kizahindukirana leta yose ya Paul Kagame kiyiturikane  nk’ikirunga!
 
Kuwa gatanu taliki ya 08/01/2016 Bwana Faustin Twagiramungu, umuyobozi w’ishyaka RDI Rwanda Rwiza yashyize ahagaragara ikibazo gikomeye cy’impunzi z’abanyarwanda ; akaba yaravuze ko muri uyu mwaka w’2016 cyangwa se umwaka w’2017 leta  ya Kigali igomba kuba yashyize ahagaragara gahunda y’uburyo impunzi z’abanyarwanda cyane cyane iziri mu mashyamba ya Congo zigomba kuba zatashye mu gihugu cyazo. Niba Kigali idashoboye gukemura icyo kibazo cy’impunzi mu maguru mashya, hakaba hasigaye inzira imwe gusa : Ni uko izo mpunzi nazo zizafata intwaro zigataha zirwana nk’uko impunzi zari mu gihugu cya Uganda ziyobowe na Paul Kagame mu mwaka w’1990 zafashe intwaro zigataha ku ngufu!
 
Bwana Faustin Twagiramungu akimara kuvuga iki kibazo cy’impunzi, kuwa mbere taliki ya 11/01/2016 madame Mukantabana Séraphine ushinzwe ministeri y’impunzi n’ibiza muri leta ya Paul Kagame, yagiranye ikiganiro n’itangazamakuru ryo mu Rwanda agira ibisobanuro atanga ku kibazo cy’impunzi nk’uko Twagiramungu yakivuze. Madame Mukantabana akaba yaratangaje ibinyoma biteye isoni byasohowe n’ikinyamakuru "imirasire.com ". Madame Mukantabana akaba yaragaragaje ko ntacyo yiyumvira mu kibazo cy’ubuhunzi kubanyarwanda kandi ari ministre ushinzwe gucyura impunzi! Aho kugirango leta ya Kigali ikemure ikibazo cy’ubuhunzi kubanyarwanda ari nacyo kibazo cyagizwe urwitwazo mu gutera igihugu mu mwaka w’1990 n’abafite ubutegetsi muri iki gihe bo muri FPR Inkotanyi, ahubwo birirwa bakwiza ibihuha mubinyamakuru byo mu Rwanda ngo Twagiramungu agiye kuyobora umutwe w’impunzi zizatera u Rwanda !
 
Ibinyoma biteye isoni bya Madame Mukantabana :
 
Madame Mukantabana agira ati : «Twagiramungu…ngirango amakuru mufiteho n’uko atari impunzi. Yahereye kera avuga ko atari impunzi, ko ngo ari Umunyarwanda wagiye hanze, bityo rero njye nkumva ko nibyo yirirwa avuga ngo aravugira impunzi nta gaciro byaba bifite kuko ntago ari umuvugizi w’impunzi tuzi, kuko ntago ari mu mpunzi tuzi tujera. Twebwe impunzi tujera tuzi ko ari impunzi zitagomba no kujya mu bikorwa bya politiki, akenshi n’iyo abigiyemo cyangwa akajya muri ibyo byo kuvuga ngo yafata umuheto...mu buryo bwo gutera igihugu cye, ko convention zishinzwe impunzi ntago zibyemera. Umuntu wese watekereje kuba yakora ibikorwa bijyanye no guhungabanya umutekano w’igihugu yahunze, ntabwo uwo nguwo aba ari impunzi mu buryo bwa convention ».
 
1.Kuri ibi bisobanuro bya Mukantabana harimo kubeshya no kwibeshya bidakwiye kugaragara ku muntu ufite urwego rw’ubuyobozi nk’urwe. Impunzi bivuga umuntu utari mu gihugu cye kandi udashobora kugisubiramo bitewe n’uko ubuzima bwe bushobora guhungabana. Ntabwo impunzi bivuga igipapuro cyanditseho ubuhunzi gitangwa na leta umuntu abamo cyangwa se ishami rya Loni ryita ku mpunzi UNHCR. Kuri icyo gisobanuro, Twagiramungu Faustin ni impunzi yujuje ibyangombwa 100% kuko ntashobora gukandagira mu gihugu cye kuko yahita ashyirwa mu igunira akoherezwa mu kiyaga cya Rweru ! Twagiramungu yagerageje gutaha  leta  ya Kigali yanga kumuha ibyangombwa byo gukandagira i Kigali ; Mukantabana yumva inzira Twagiramungu yanyuramo ngo agere mu gihugu cye ari iyihe ?
 
Mukantabana abeshya ko ashinzwe ku jera (kwita) impunzi z’abanyarwanda ! Iyo umuntu yahunze igihugu cye, ntaho ubuyobozi bw’igihugu yahunze buhurira nawe; Madame Mukantabana yabeshye icya semuhanuka aho avuga ko Twagiramungu atari mu mpunzi ajera (ashinzwe). Ntabwo Mukantabana ashinzwe impunzi z’abanyarwanda zahunze leta akorera, ashinzwe kujera impunzi z’abarundi n’iza M23 kuko nizo aha ibyangombwa kandi muri izo mpunzi ashinzwe ntabwo Twagiramungu arimo, uretse na Twagiramungu kandi n’impunzi ziri mu mashyamba ya Congo ntabwo azijera nk’uko abivuga. Madame Mukantabana yagombye kuba azi neza umuntu cyangwa se urwego rujera (rwita) impunzi kuko nawe yabaye impunzi mu gihugu cya Congo brazzaville aho kubyiyitirira!
 
2.Madame Mukantabana akomeza abeshya avuga ko Twagiramungu atari umuvugizi w’impunzi uzwi! Ntabwo Madame Mukantabana yasobanuye neza umuvugizi w’impunzi z’abanyarwanda uzwi bakorana nawe uwo ariwe, kuburyo atemera Twagiramungu. Mukantabana agomba kumenya ko Twagiramungu ari umuyobozi w’ishyaka rya RDI Rwanda Rwiza, iryo shyaka rikaba rifite abayoboke barimo n'abanyarwanda b’impunzi bari mu bihugu binyuranye byo ku isi, kubera uwo mwanya afite wa politiki, Twagiramungu afite uburenganzira busesuye ahabwa n’abanyarwanda bahunze ingoma ya Kigali bari mu ishyaka RDI; ubwo bubasha bwo kuvugira izo mpunzi z’abanyarwanda ntabwo ari Madame Mukantabana ubuha Twagiramungu, ahubwo abuhabwa n’ishyaka rya RDI n’ubwo Madame Mukantabana yaba abishaka cyangwa atabishaka.
 
3.Madame Mukantabana abeshyako impunzi azi ngo zitemerewe gukora politiki cyangwa gufata umuheto, ko iyo zigiye muri ibyo bikorwa ziba zinyuranyije na convention zishinzwe impunzi. Madame Mukantabana yibagiwe ko raporo z’imiryango mpuzamahanga zishinja leta  akorera ya FPR Inkotanyi guha imyitozo ya gisilikare impunzi z’abarundi ziri mu nkambi mu Rwanda! Ubusanzwe umuryango wa UNHCR washinzwe mu mwaka w’1951 niwo ushinzwe impunzi ku isi, ntabwo ari ministeri ya Mukantabana ishinzwe impunzi ku isi nk’uko abivuga. Mu mwaka w’1990 nibwo Paul Kagame kimwe n’abo bari kumwe bari abasilikare mu ngabo za Uganda, iyo wabaye umusilikare w’igihugu uba ufite ubwenegihugu bw’icyo gihugu ariko bafashwe intaro batera u Rwanda babeshya amahanga yose ko bacyuye impunzi zangiwe gutaha iwabo, iyo ntambara bayishyigikiwemo na UNHCR kuko ntacyo yakoze ngo ibabuze kurwana!  Mukantabana yagombye kwibuka ko icyo gihe Kagame atera u rwanda, izo conventions zibuza impunzi gufata intwaro zariho icyo gihe, none se byagenze gute kugira ngo izo mpunzi zitahe ku ruhembe rw’umuheto maze zikica abari mu gihugu abandi zikabahungisha nyuma zikigarurira ibintu byabo?
 
4.Mukantabana yemera ko iyo wafashe intwaro utaba uri impunzi mu buryo bwa Convention, ariko ntahakana ko uwo muntu wafashe intwaro aba ari impunzi! Ikirushijeho gukomera ni uko ikibazo cy’impunzi z’abanyarwanda kigomba kubazwa leta  ya Kigali ariko n’ishami ry’umuryango mpuzamahanga ushinzwe impunzi UNHCR ugomba kugira ibisobanuro utanga. Muri convention (amasezerano agenga impunzi) ntabwo byemewe ko igihugu kirema abantu batagira igihugu (apatrides). Ikibabaje muri ibyo byose, ni uko leta  ya Kigali yahaye ruswa abakozi b’umuryango mpuzamahanga ushinzwe impunzi UNHCR maze bemeza ko ubuhunzi bukuweho kubanyarwanda.
 
Izo mpunzi z’abanyarwanda zakuriweho ubuhunzi ntabwo zatashye mu Rwanda kubera impungenge z’umutekano wazo kandi nta nubwo zifite icyemezo cya UNHCR ko ari impunzi, muri macye nta gihugu izo mpunzi z’abanyarwanda zifite bityo zikaba zihindutse apatrides. Birumvikana ko leta  ya Kigali na UNHCR byakoze ayo makosa yo guhindura impunzi z’abanyarwanda apatrides umwe muribo akingira undi ikibaba ariko amaherezo bizajya ahagaragara ! Impunzi z’abanyarwanda aho ziri hose ku isi zigomba kwirwanaho kuko zihigwa na Leta ya Kigali zikaba zaranatereranywe na UNHCR. Iki kibazo cy’ubuhunzi kubanyarwanda nigikomeza kwirengagizwa, impunzi zizafata umuheto zirengere uburenganzira bwazo bwo kubaho kandi na UNHCR nta burenganzira izaba ifite bwo kuzibuza kuko yahinduye izo mpunzi apatrides!
 
Kugira ngo igihugu kitagwa mu kaga nk’ako cyaguyemo kubera intambara FPR inkotanyi yagabye ku gihugu mu mwaka w’1990 ; ishyaka RDI Rwanda Rwiza risaba leta  ya Kigali gushyira ahangaragara ingamba zisobanutse neza zigomba gutuma impunzi z’abanyarwanda zitaha mu mahoro bitarenze umwaka w’2016, byaba bitinzeho gato ntibirenze umwaka w’2017. Leta  ya Kigali igomba kumva neza ubutumwa butangwa n’ishyaka RDI aho gufata ingamba zo kwica impunzi z’abanyarwanda aho ziri hirya no hino ku isi kugira ngo izimanganye icyo kibazo cyo gukuraho ubuhunzi! Uko bizagenda kose «ntabapfira gushira»kandi «amaherezo y’inzira ni mu nzu » ; impunzi z’abanyarwanda zizataha ku neza cyangwa se ku nabi, Kigali yabishaka itabishaka.
 
 
Faustin Ntakirutimana
Commissaire wa RDI-Rwanda Rwiza