Kuba Kagame ari umuzigo ku banyarwanda, ntagomba kutubuza kugera kuri demokarasi ! (Faustin Twagiramungu)

Publié le par veritas

Kuwa kane taliki ya 31/12/2015 Paul Kagame yatangaje ko aziyamamariza manda ya gatatu mu itora rya perezida wa repubulika riteganyijwe mu mwaka w’2017, ubwo ubwo manda ye ya kabiri izaba irangiye. Igihugu cya Leta Zunze Ubumwe za Amerika cyashyigikiye Paul Kagame mu mafuti menshi n’ibyaha bitagira ingano yakoreye abanyarwanda, cyahise gisohora itangazo rivuga ko icyo gihugu kitashimishijwe n’uko kwiyamamaza kwa Kagame kuko ari igikorwa cyo kubuza amahirwe abanyarwanda yo kubona demokarasi banyotewe kuva mu myaka irenga 20 bayiharanira ! Paul Kagame yasubije abanyamerika avuga ko Abanyarwanda biyemeje gutwara umuzigo wabo ku buryo ntawe ukwiye kuremerera ! Radiyo « Ijwi ry’Amerika » yaganiriye n’inararibonye muri politiki y’u Rwanda Bwana Faustin Twagiramungu, akaba yarabaye ministre w’intebe mu Rwanda nyuma y’1994, ubu akaba ari umuyobozi w’ishyaka RDI-Rwanda Rwiza kuri uyu wa mbere taliki ya 05/01/2016. Twagiramungu yagize icyo avuga ku kwiyamamaza kwa Kagame n’itangazo ry’Amerika :
 
Bwana Faustin Twagiramungu yavuze ko icyo cyemezo cyo kwiyamamaza kwa Kagame atacyakiriye neza, akaba abona ko Paul Kagame yumva ageze ahantu afite ubwigenge buhagije bwo gukora icyo ashaka ndetse agakubitiraho n’ikinyoma cyo kuvuga ko ashyigikiwe na rubanda ko abandi ntacyo bamubwiye.Twagiramungu akaba yemera ko ibyo abanyamerika bavuze ariko nawe abyemera, yagize ati : « ntabwo byumvikana ko imyaka 22 tumaze, umukuru w’igihugu atashoboye kugira abantu yizera, ngo abe yabaha uburyo ngo nabo biyamamaze ngo bakomereze aho yari ageze » ! Twagiramungu yavuze ko uko abanyamerika babonye uko Kagame abeshya ko ariko nabo bari kumwe mu ishyaka babonye ko Kagame abeshya !
 
Twagiramungu yagize ati : «incuro zirenga 4 (Paul Kagame)yagiye abwira abanyamerika, aho yagiye anyura hose ko atazongera kwiyamamaza, ko manda ya gatatu atayishaka, kubona rero baravuze ko babajwe n’uko yisubiyeho, ngirango babivuze ahari babivanye ku mutima. icyo batavuze ni uko ntacyo bateganya gukora kugira ngo abireke».
 
Ku kibazo cy’uko Twagiramungu yahanganye na Perezida Kagame mu matora yo mu mwaka w’2003 bikavugwa ko ariwe (Kagame) watsinze amatora, kandi akaba ashaka gushimangira demokarasi yongera kwiyamamaza mu mwaka w’2017 kugirango ashimangire imishinga yatangije n’ibikorwa yagejeje kubanyarwanda mu myaka ishize ; Twagiramungu asanga kuvuga ngo « aho u Rwanda ruhagaze » ataribyo Kagame yakwitwaza, Twagiramungu yagize ati : « hari abakire bacye n’abakene benshi, ariko we icyo areba ni abakire, ibyo sibyo bivuga ko u Rwanda rwateye imbere».
 
Twagiramungu avuga ko hari ibintu byinshi biranga ubukire Kagame atagejeje kubanyarwanda, yatanze urugero ko abanyarwanda bakeneye amahoro, umubano mwiza, guhoza amarira abiciwe abantu bo mumoko yose… ibyo byose Kagame akaba yarabyirengangije ; kuvuga ngo yazanye amajyambere bikaba bitagomba kumuha uburenganzira bwo gukomeza kuyobora ! Twagiramungu yagize ati : « Siwe amajyambere aturukaho !amajyambere aturuka ku mibanire y’igihugu cyacu n’ibindi bihugu n’abanyarwanda bene cyo, ariko si ibye bwite ? Numva hari abandi banyarwanda babikora kandi wenda bakabikora na neza».
 
Twagiramungu asanga ibyo gutekinika amatora nk’uko batekinitse umuco wo kwikorera inkangara zuzuye impapuro bigomba gucika. Twagiramungu yagize ati : «Icyo twarwaniye kandi tugatanga ibitambo ni demokarasi, iyo demokarasi rero iramutse itaje mu Rwanda, abanyarwanda ntabwo ari abantu bo kuzongera kuva ku muco, bazakomeza gushaka uburyo bazabona iyo demokarasi, Kagame siwe uzabibabuza, bazakora ibishoboka byose kugira ngo iyo demokarasi bayigereho, kuko Kagame ibyo ashaka mu Rwanda ni ubwami ! »
 
Twagiramungu yavuze ko Kagame agomba kuvuga niba ari umwami hakiri kare akaba azasimburwa n’umwe mubo yabyaye ! naho ibyo kuvuga ngo yazanye amajyambere akaba ariyo mpamvu azategeka kugeza igihe azapfira nta muntu uzabyemera ! Ku kibazo cyo kumenya uko demokarasi Twagiramungu avuga izagerwaho, yasubije ko nta demokarasi ishingiye ku muntu umwe, akaba asanga ubutegetsi bugomba kuba bushingiye kuri rubanda ko iyo ariyo demokarasi nyayo abagereki bashyizeho kuva kera.
 
Twagiramungu asanga Kagame afite porogarame ye idafite aho ihuriye n’ibyo rubanda ishaka, Twagiramungu yagize ati : « Niba Kagame yibwira ko ibyo byo kuzamura umujyi wa Kigali no kuwukubura aribyo abanyarwanda bashaka, twe sibyo dushaka, dushaka kubana nk’abanyarwanda, ikibazo cy’abahutu n’abatutsi ntabwo cyari cyarangira, niba abantu batabizi, turashaka gushyira hamwe, turashaka kubaka u Rwanda rwacu tubajijwe ibyo dushaka, ibyo byose  ntidushobora kubigeraho tubitegetswe n’umuntu umwe ! »
 
Twagiramungu yasobanuye ko afite amateka yo kurwanira demokarasi, ko umuntu umwe atagomba kuyibuza abanyarwanda, akaba ashaka ubwisanzure mu gihugu cy’u Rwanda butagengwa n’umuntu umwe !
 
veritasinfo