Burundi : Imyigaragambyo yakomeje nubwo yari yabujijwe n’akanama gashinzwe umutekano !

Publié le par veritas

Abari mu myigaragambyo barushijeho kuba benshi

Abari mu myigaragambyo barushijeho kuba benshi

Imyigaragambyo yabereye mu murwa mukuru wa Bujumbura uyu munsi yabonetsemo abakobwa n'abagore bituma umubare wiyongera. Ku Musaga hari umusirikare wakomerekejwe n'isasu ry'umupolisi, hari n'abiyerekana 2 bakomerekejwe n'amasasu y'umupolisi. Hari n'imodoka yatwitswe n'abiyerekana babuzaga abantu kujya ku kazi.
 
Amashuri ntiyafunguye n'utuzi twinshi ntitwakozwe nubwo inama nkuru y'umutekano yari yasabye kuwa gatandatu ko uyu munsi byose bikora. Hari inyandiko zakwiragijwe mu ma quartiers zibuza abantu kujya ku kazi kuburyo n'abagiye bagiye batinya cyane.
 
Imihanda yose ntiyashoboye gufungura nkuko byari byasabwe n'inama nkuru y'umutekano. Umuhanda ujya ku kibuga cy'indege uciye ku Buterere uracyafunze ndetse n'uwo kw'i Jabe uracyafunzwe. Ariko iyindi mihanda yafunguwe nubwo igisirikare gikomeza kuyisaka kugirango kirebe ko nta ntwaro zirimo.
 
Muri Komini ya Mugongomanga na Mukike mw'i Jenda mu ntara ya Bujumbura rurale naho hakomeje imyiyerekano. Kuburyo banafunze umuhanda RN7 ujya i Muramvya, Bururi na Mwaro.
 
Ahandi habaye imyiyerekano ni mu makomini 2 yo mu ntara ya Mwaro. Hagati aho ibikorwa byo kwiyamamaza mu matora y'abajyanama bo mu makomini n'ay'abashingamateka byakomeje. Uyu munsi hiyamamaje ishyaka riri ku butegetsi CNDD FDD mu ntara ya Muyinga ahitwa mu Gasoho.
 

Ayandi mashyaka yagiye ku nzu ku yindi ngo kubera ikibazo cy'umutekano, hakaba n'abavuga ko bategereje ibizava mu nama y'abakuru b'ibihugu byo mu karere k'uburasirazuba bw'Afrika izabera i Dar el Salaam muri Tanzania ejobundi kuwa gatatu. Ibyo bikorwa byo kwiyamamaza byatangiye ejo ku cyumweru, bitangizwa n'ishyaka rya UPRONA mu ntara za Muramvya, Rutana, Kayanza no mu murwa mukuru wa Bujumbura.

Mu matora y'umukuru w'igihugu ho, abagejeje amadossiers mu kanama gashinzwe amatora ni : Pierre Nkurunziza, Gerard Nduwayo, Jean de Dieu Mutabazi, Sylvestre Ntibantunganya, Domitien Ndayizeye, Jean Minani, Agathon Rwasa na Jacques Bigirimana.

Prezida Nkurunziza ntava kw'izima
 
Umukuru w'u Burundi, Pierre Nkurunziza yamaganye akamo yatewe n'Amerika n'umuryango w'ubumwe bw'ibihugu by'Uburayi, ko kwigiza inyuma amatora. Prezida Nkurunziza yabwiye BBC ko kwigiza inyuma amatora bizasubiza inyuma u Burundi bwari busanzwe buri mu kibazo.
 
Ibyo Prezida Nkurunziza yabivugiye i Muyinga aho ishyaka CNDD FDD ryari ritangiye kwiyamamaza mu matora y'abajyanama ba komini n'abashingamateka mu matora ateganijwe kw'itariki 26 z'uku kwezi kwa 5. Prezida Nkurunziza yavuze ko abakora imyiyerekano babishishikarizwa n'abari hanze y'igihugu.
Ibi prezida Nkurunziza abivuze nyuma yaho Ububiligi buhagarikiye by'agateganyo inkunga bwateganyaga guha u Burundi kugirango butegure amatora. Ububiligi bwavuze ko iyo nkunga bubaye buyihagaritse kubera ubushyamirane buba hagati y'igipolisi n'abarwanya Prezida Pierre Nkurunziza.

 

Source : BBC Gahuza