Burundi : iki ni igihe cy’ubushishozi kubanyepolitiki batavuga rumwe na Nkurunziza !

Publié le par veritas

Agathon Rwasa, umwe mubatavuga rumwe na Nkurunziza

Agathon Rwasa, umwe mubatavuga rumwe na Nkurunziza

Igihe kirageze kubanyepolitiki b’abarundi kugira ngo bahitemo kwiyamamaza cyangwa kutiyamamaza ku mwanya wo kuba perezida w’icyo gihugu kuko isaha ntarengwa yo gutanga kandidatire iteganyijwe uyu munsi wo kuwa gatandatu taliki ya 09/05/2015  saa kumi nimwe n’igice ku isaha y’i Bujumbura. Atitaye ku gitutu cy’abigaragambya ndetse n’amahanga, Nkurunziza yatanze kandidatire ye mu rwego rushinzwe amatora CENI ejo kuwa gatanu taliki ya 08/05/2015, itora rya perezida mu Burundi riteganyijwe ku italiki ya 26/06/2015. Uyu munsi abanyepolitiki bagomba guhangana na Nkurunziza niwo mwanya wa nyuma bafite kugira ngo bahitemo kwiyamamaza cyangwa kubireka.
 
Nyuma y’aho kuri uyu wa gatanu Nkurunziza atangiye kandidatire ye mu rwego rushinzwe amatora arirwo CENI, abarwanya Nkurunziza basigaranye amasaha make ngo babe barangije gutanga kandidatire zabo mu biro bya CENI kugira ngo bajye guhangana na Nkurunziza mu biro by’amatora. Umwe mu banyepolitiki batavuga rumwe na Nkurunziza yavuze ko gutanga kandidatire bisaba ubushishozi bukomeye kuko kudatanga iyo kandidatire kubanyepolitiki birahita biha Nkurunziza rugari rw’uko yaba yiyamamaje nk’umukandida umwe rukumbi ; ubwo ntaguhitamo kwaba guhari n’ubwo hatora abaturage babiri ubwo yaba atowe nka Perezida !
 
Ikosa ryo guha rugari Nkurunziza rikaba ryarakozwe n’abanyepolitiki b’i Burundi mu mwaka w’2010 ubwo bikuraga mu matora bigatuma Nkurunziza atorwa ntakibazo ahuye nacyo, kubera iryo kosa ryo kwikura mu matora bakoze icyo gihe abanyepolitiki b’i Burundi ntibashaka kongera kurigwamo. Agathon Rwasa ufatwa nk’umwe mubanyepolitiki bafite amahirwe menshi yo guhangana na Nkurunziza nk’umunyepolitiki utavuga rumwe n’ubutegetsi bwe,  yiyemeje gutanga kandidatire ye, Agathon Rwasa yagize ati : 
 
«Kuba Nkurunziza yaratanze kandidatire ye ntabwo bibuza ko natwe dutanga izacu, ariko niba kandidatire ye yemewe, tuzakomeza kwibutsa ko inyuranye n’itegeko nshinga, ubwo bizagenda bite ? (…) kandi mbere ya byose, twitegereje uko umwuka umeze muri iki gihe, ntabwo mbona uburyo amatora nyayo ashobora kuba, hagombye gutekerezwa ahubwo uburyo bwo kuyegeza inyuma gato. Ndatekerezako imikorere ya CNDD FDD na perezida Nkurunziza ari iyo kugira ngo biharire urubuga rwo politiki bonyine nk’uko babifitemo akamenyero».
 
Ntabwo ari Agathon Rwasa wenyine wiyemeje gutanga kandidatire wenyine kuko n’uwigeze kuba umukuru w’igihugu cy’u Burundi Domitien Ndayizeye, ndetse na Jean Minani uyobora ishyaka rya FRODEBU Nyakuri, biyemeje gutanga kandidatire zabo. Jean Minani yagize ati: «Nzakomeza kwamagana kandidatire itemewe n’amategeko kandi itujuje ibyangombwa bisabwa ; ariko kandi nshyigikiye kandidatire yose inyuze mu kuri, tuzatanga kandidatire zacu kandi dukomeze dusabe ko amatora agomba gukorwa mu buryo bwiza ndetse bishobotse igihe cyayo kibe cyakwegezwayo».
 
N’ubwo abo banyepolitiki bavuga batyo, hasigaye igice cy’abandi banyepolitiki batavuga rumwe na Nkurunziza badakozwa ibyo gutanga kandidatire nka Léonce Ngendakumana umuyobozizi w’impuzamashyaka ADC Ikibiri, wagaragaje ko adashobora guha agaciro ikintu cyose cyatuma amatora aba, kuko kuriwe ngo anyuranyije n’itegeko nshinga. Ntabwo ari abo banyepolitiki batekereza batyo gusa kuko n’abayobozi b’imiryango itegamiye kuri leta (société civile) bayoboye imyigaragambyo yo kwamagana manda ya gatatu ya Nkurunziza, nabo babona amatora atagomba kuba n’ubwo igice kini cy’abo bayobozi b’ayo mashyirahamwe gishyigikiye ko Nkurunziza atagomba guhabwa rugari akajya mu matorora wenyine !
 
Ni ukubikurikiranira hafi.
 
Inkuru ya RFI yahinduwe mu kinyarwanda na « veritasinfo »