Rwanda: Urubyiruko ntirugomba gutega amajosi ngo bayateme nka 94, rugomba guhaguruka rukirwanaho rugatabara n'abanyarwanda!

Publié le par veritas

Aba bana n'ubwo babayeho nabi nibo bazatabara igihugu!

Aba bana n'ubwo babayeho nabi nibo bazatabara igihugu!

Ndabaramukije mwese nshuti,basomyi duhurira kuri uru rubuga,mugire impagarike n'ubugingo! Ndabakomeje mwese kandi aho muri hose ku migabane itandukanye kuko igihe nk’iki nziko kibutsa abanyarwanda benshi ibihe bibi by'umwijima igihugu cyacu cyanyuzemo mumwaka wa 1994, ubu ni ubugira kabiri nsangiza ibitekerezo byange abanyarwanda ku itariki nk’iyi ya 11 Mata mbinyujije kuri uru rubuga, nahisemo kujya mbikora nkigikorwa ngaruka mwaka kuko italiki ya 11 Mata 1994 nabuzemo abo mumuryango wange barenga 78. Ntekerezako ibyabaye kubanyarwanda benshi byo kubura abacu ndetse ingaruka zikagera kuri buri munyarwanda kandi nanuyu munsi rukigeretse dukwiye kubikuramo amasomo yadufasha gutegura ejo hazaza heza ku igihugu cyacu nabazadukomokaho aho guhora munzangano n'inzigo.
 
Imyaka 21 irashize igihugu cyacu kigwiririwe n'amahano ya genocide nubwo nari muto ariko amateka mbwirwa, nsoma kimwe n’andi ncukumbura ku gihugu cyange agaragaza ntagushidikanya ko ibyabaye mu gihugu cyacu by'ubwicanyi ndengakamere mu 1994 ndetse nibyakurikiye nyuma yabyo byavuye kubuyobozi bubi bwaranze igihugu cyacu. Abanyepolitike baranzwe no guharanira inyungu zabo mbere yo kureba inyungu rusange z'abene gihugu bose, kenshi dukunze gusabwa kwigira ku amateka kandi nibyo koko kuko bidufasha gutegura ahazaza, ariko mubyukuri iyo urebye usanga amahano twanyuzemo agahekura igihugu cyacu ntamasomo akwiye benshi mubanyarwanda bakuyemo,ibyo bikaba ari ikibazo gishobora kuzagira ingaruka zikomeye ejo cyangwa ejobundi kubanyagihugu.
 
Iyo witegereje usanga ikibazo cyatumye tunyura muri aya mage gituruka k’ubuyobozi bubi bwikunda kandi ubwo buyobozi buteye butyo akaba aribwo bwongeye buhabwa intebe mu Rwanda, ikibabaje kurutaho ni uko hari abacyogeza bakanashimagiza abayobozi bikunda kandi barwanira inyungu zabo mbere y'inyungu z'igihugu, kumva hari abanyarwanda bacyumva ko KAGAME adategetse ubuzima bwe bwose u Rwanda rwazimangana, biteye isoni ! Ese abatekereza ko igihugu kizahirima niba Kagame atayoboye bataniye he n’abadutse mubaturanyi babo bagatemagura ngo kuko umubyeyi yahanuwe mu ndege? Nubwo ngaya bikomeye abishe Habyarimana sinabura kugaya abatemaguye abantu ngo ni uko yishwe kandi ataribo bahanuye iyo ndege ! Kandi nifuza kuzabona abishe umukuru w’igihugu bagezwa imbere y’ubutabera !
 
Mbese byagenda gute  ejo PAHULO KAGAME aryamiye aryamiye akaboko k’abagabo ko ari umuntu uzapfa ? Aho zangirwa bayobozi zivugako atakwirwa muri SENA ntizizajya muntore zigasabako abanengaga kagame bakubitwa agafuni mu gahanga maze u Rwanda rukongera kuzura imivo y'amaraso? Ni mureke mbibarize, Kagame afite ibiro byinshi biruta ibyizindi nkotanyi nka RUTAREMARA nibikoresho byazo nka MAKUZA n’abandi ko bo bakwirwa muri SENA ? Uziko u Rwanda rwagushije ishyano koko? Umukinnyi wikinamico nka BAMPORIKI(KIDEYO) azajya ahaga imisoro y'abanyarwanda narangiza ashake gukina iyo mikino ye hejuru y'ubuzima bw'abanyarwanda barenga miliyoni cumi n'ebyiri ! Njye nashimye uwavuzeko aziyahura Kagame nadakomeza gupyinagaza abanyarwanda byibuze we aziyemeza gupfa ariko abanyarwanda dukire ifuni n'ingoyi bya FPR-KAGAME. Uwo ukunda Kagame azaba apfuye apfuye ariko benshi babangamiwe n’ingoma ye babohoke.
 
Ese turagana he niba tugifite abanyarwanda bakirebera ikibi aho kukirwanya ahubwo bakagisingiza? Turaganaho mu gihe dufite abacanshuro nka BUSINGE na MUSA FAZILI n’abandi biyita abanyepolitike kandi mu byukuri bareba inda zabo aho kureba ubuzima bwabanyarwanda ? Ese murabona ejo hazaza h’igihugu cyacu hadateye amakenga n’impungenge mu gihe abitwa abayobozi bakomeje gusingiza ikibi bakita ikiza ? Mu bihe byashize nakunze kujya niyemeza gusura urwibutso  ruri ku Gisozi , nkajya mu nzu y’ububiko bw’amateka (archive) ; nagiye nsoma muri iyo nzu inyandiko z’ibyandikwagwa n’ibyavugwaga n’ibitangazamakuru byariho mu Rwanda mbere y’umwaka w’1994 ; nabonye imvugo z’abayobozi b’icyo gihe n’uburyo barwanyaga abanyepolitiki bari mu mashyaka atavuga rumwe n’ubutegetsi bwariho icyo gihe ; icyarushijeho ku ntangaza cyane ni uko ureba ibivugwa n’ibinyamakuru biriho kuri ubu butegetsi bwa Kagame n’uburyo amashyaka atavuga rumwe n’ubutegetsi bwe bayahinduye ruvumwa, ukitegereza ibitutsi Kagame yatukwaga noneho ukareba n’uburyo nawe muri iki gihe atuka abantu banze kuba abarenzamase be, ukumva amagambo inkomamashyi za FPR zirirwa zihuragura, usanga ejo hazaza habanyarwanda hateye ubwoba !
 
Niba abanyarwanda badahagurukiye rimwe ngo bavuge ko ibintu biri gukorwa byose babirambiwe, ngo berekane ko batemera ko abantu bakomeza gutobanga igihugu cyacu, u Rwanda ruzarimbuka kandi ingaruka zizagera kuri buri wese ndetse n’abicecekera muri iki gihe nabo ntibazarokoka ! Munyandiko natambukije umwaka ushize nibazaga niba koko BAN KI Moon wiyemeje gusaba imbabazi leta  ya Paul Kagame kuwa 07 Mata 2014 ngo kuko umuryango wabibumbye utatabaye abanyarwanda mu 1994 niba mubihe bizaza azagaruka i Kigali gusaba imbabazi z'abanyarwanda FPR-KAGAME birirwa bica, isi yose iebera ariko ikaruca ikarumira ; ndumva uyu munsi ibyo navuze byumvikana neza kuko ubu nyuma yo guhitana umunyemari RWIGARA(RIP) kagame ageze aho yica n’abamuvura ! Ese umuntu yakwica umuganga we umumenyera ubuzima akazagira impuhwe za rubanda giseseka ?
 
Koko twemere igihugu cyacu cyorame dukanuye twicecekere? Tube nka BILLY CLITON wigambyeko yaraziko u Rwanda rwenda kugusha ishyano ariko akinumira! Ese ko nta muntu numwe utaziko we n'igihugu ke bari bafite inyungu muri ako kaga kamaze abacu, nkawe munyarwanda urenza ingohe z’ijisho ibibi ubona bibera cyangwa bishobora kubera murwatubyaye ubifitemo nyunguki? Ese ibyo bibi bikorwa ukicecekera nibitaguhitana wumva ntanuwawe byazahitana? Ese ntangaruka wumva uzabigiramo? Ubu hari umuntu wakwihandagaza akavuga ati ese ibi nandika ndabikurahe? Nababwiye ntangirako dukwiye kwigira ku amateka niba impunzi zahunze 1959, 1962,1973 zitarusha ubwinshi izahunze 1994 nubu zigihunga uko bwije nuko bukeye, niba ubuyobozi buriho ubu bwica, bukarenganya kuruta ubwariho mbere ya 1994, niba abanyarwanda bashimutwa umunsi ku munsi, niba FPR ikomeje kunyunyuza imitsi y'abanyarwanda ibaca amafaranga tutamenya icyo akora.
 
Niba abaturage dukomeje kubuzwa uburenganzira kumitungo yacu nkubutaka n’ibindi, niba KAGAME avugako adashobora kuganira n'abamunenga kandi we abo yanengaga baremeye kuganira nawe, niba hakomeje kwigishwa urwango no gufata abarwanya ubutegetsi nk’isazi zigomba gukubitwa inyundo, niba dukomeje kubuzwa uburenganzira kugihugu cyacu kandi tutari abantu bamugaye, tukaba dufite amaboko n'amaguru kandi tukagira uburenganzira nkikiremwamuntu bwo kwirwanaho, ntakabuza igihuru kizabyara igihunyira, kandi ndumva bidatinze kuko imyaka 21 agatsiko k’abantu bake gategekesha igitugu igihugu ni myinshi cyane ! Byatangiye babeshyako bakora munyungu z'abatutsi ngo abahutu batabamara, bukeye bati burya nibyabavuye hanze, bidateye kabiri bati ni abavuye UGANDA, ariko ntagushidikanya birabonekako ari inyungu za KAGAME, NZIZA nibindi bisambo bitakuzura bisi(BUS) imwe ; abo akaba aribo benda koreka igihugu, miliyoni nyinshi z’abanyarwanda zikaba zikomeje kurengana tugaceceka kubera Ubwoba.
 
Mubyukuri ntakiremwa-muntu kibaho ngo kibure kugira ubwoba, nanjye wandika ndabugira ariko ikibazo niki, kuki twakomeza gutinya abatwica? Ese kuki twakwemera gukomeza kuyoborwa n'ubwoba? Ese kuki tutatsinda ubwoba niba dushaka kwibohora ingoyi ya FPR kandi tuziko intwaro ikoresha ari ukudutera ubwoba? Ese twatinya bingana iki kugira ngo FPR yunamure icumu? Ndagirango mbabwireko ntakintu nakimwe wakora kugirango umuntu ushaka kukwica akubabarire nta cyaha wamukoreye ! Ahubwo instinzi ni ugushirika ubwoba tukirwanaho ; reka mbahe urugero rumwe rushobora kubereka ko ibyo mbabwira ari ukuri niba tudahagurutse tuzashira nka twa dushwiriri : Mu 1994 ubwo ubwicanyi bwatangiraga iwacu aho nkomoka abo mumuryango wanjye bihurije hamwe bateranira mu rugo rumwe kwa data wacu bibwirako ubwo babanye neza n'abaturanyi ntakibi babakoreye ntacyo bari bubatware !
 
Nyamara siko byagenze kuko italiki nk’iyi nkuko nabivuze, baraje babahindamo hapfa abarenga 78, ariko ikibabaje n’uko ababishe batari n’abenshi mumubare kubaruta ; nonese mbibarize, aba iyo birwanaho mutekerezako baribupfe aka kageni? Kuki se umuco nk’uyu wo gutega ijosi ngo ugushaka akwice, ukomeje guhabwa intebe tuzi aho byatugejeje? Ese ubu BYABAGAMBA, KAREGEYA, KAYUMBA, RUSAGARA, RUDASINGWA, GAHIMA, RWIGARA, RUJUGIRO, MITALI, wenda reka mvuge aba kuko urutonde ni runini, ariko niyo baba aba gusa iyo batarebera umwicanyi KAGAME, ntibari bumutwuburure hejuru ataragenda abajoga mo umwe umwe nkuko ubu benshi dukanuye nk'ifi ireba urumuri turindiriyeko ejo aritwe tuzajya muri RWERU?
 
Banyarwandakazi,banyarwanda cyane cyane rubyiruko bagenzi bange, haragezeko tuva mubyo turimo, hari abigize ba bitanturukaho, bati twe hari utuvungukira tuva kumeza yakagatsiko tutugeraho, bati twashyizwe muri ya myanya babashyiramo bakabakoresha nka robo mukora ibyo mubwiwe ntagutekereza, ndagirango mbabwireko igihugu cyanyu kibakeneye ko mugitabarira kandi hari byinshi mwakora muri naho muri kandi bigafasha muri uru rugamba, akarengane KIZITO arimo mwakavanyemo somo ki? Hari abandi bahungiye mubihu bya Afurika,ubwoba ni bwose ngo DMI itanyiyicira, ese impongano muzaha umwanzi w'urwababyaye ngo areke kubirukaho muzayikurahe?
 
Ni mureba ibiri kubera muri CONGO baratwica buri munsi, UGANDA ho ntiwarora hahindutse ku gicumbi cy'abicanyi, ZAMBIA reba ibyo batangiye kubadurumbanya, ejo ni MALAWI, MOZAMBIQUE nahandi, nonese tuzabundabunda kugera ryari? Mbese kuki twakomeza kuba ba ntibindeba? ese ko aho gushaka uko twataha dushaka aho twimukira harahandi bababwiye hari u RWANDA atari ruriya abicanyi ba NZIZA bari gutobanga? Hari abandi rero bibeshyako bageze iyo bajya bari i Burayi na Amerika, mbe mwumva mufite gaciro ki mudashobora gukandagiza ikirenge mu rwababyaye, atari uko mwabuze uburyo bwo kujyayo ahubwo ahubwo bitewe n’uko rwashimuswe na kariya gatsiko kamabandi kiyise FPR?
 
Ese abazabakomokaho muzababwirako mwacumuye iki gituma mutajya iwanyu? Reka mbature akaririmbo kitwa UBARIJORO k’umuhanzi Rodrigue Karemera, mugusoza nagirango mbibutseko hagezeko turwanya akarengane kokamye igihugu cyacu muburyo dushobotse bwose, ntagushidikanyako amahoro yigihugu cyacu, kwishyira ukizana kwaburi munyarwanda bizagerwaho aruko FPR-KAGAME basezerewe burundu, hakajyaho ubuyobozi budaheza kandi bushingiye kuri demukarasi, dukwiye kwitanga kugeza no kubuzima bwacu nibiba ngombwa kugirango ibi bigerweho ariko abanyarwanda bagahumurizwa, abakomeje kwitanga mururu rugamba mukomere abasigaye inyuma igihe niki ngo dufatane munda mumoko yose, uturere twose ntavangura maza tugoboke u Rwanda, harakabaho abaharanira impinduka nziza, harakabaho u Rwanda ruzira ivangura no kwica abana barwo.
 
Umusomyi wa vertasinfo muri DR Congo