Politiki: Reka nsubize abibasiye umunyapolitiki Faustin TWAGIRAMUNGU : Abasenya ntukabateho igihe! (DODINSKY).

Publié le par veritas

Politiki: Reka nsubize abibasiye umunyapolitiki Faustin TWAGIRAMUNGU : Abasenya ntukabateho igihe! (DODINSKY).
Muri iki gihe hari abantu bakunze kwibasira abanyapolitiki ba opposition, bagashishikazwa no gusenya ibyo abo banyepolitiki baba bamaze kubaka muri gahunda ndende yo gukiza abanyarwanda ingoyi ya FPR-Kagame, abo bibasira abo banyepolitiki bagasenya ibyagezweho badatanga byibura umuti cyangwa indi nzira yakurikizwa ngo ikibazo gikemuke. Iyo usomye ibyo batambutsa ku mbuga za internet, nta nubwo baba bateganya cyangwa bifuza kuganira  mu rwego rwo gukora debate!
 
Ubwo, uwitwa Mutarambirwa Bosco aherutse kwerekana uburyo abanyarwanda bashobora kwicarana mu byiciro binyuranye bakaganira ku bibazo by'igihugu cyacu, nibwiye ko abantu babangamiwe na FPR bagiye guhagarika ibyo gupingana (Kanda aha usome iyo nkuru ya Bosco: Let the Rwandan political opposition adopt A DEBATE culture), ariko iyo urebye ibyo ibinyamakuru bimwe bikomeza gutambutsa, usanga urwishe ya nka rucyiyirimo.
 
Nk'umuyoboke w'ishyaka rya RDI Rwanda Rwiza, murambabarira mvuge ku munyapolitiki ukunze kwibasirwa, Bwana Fawustini Twagiramungu, kuko ayoboye ishyaka ndimo.  Abantu rero bakunze kwibasira Twagiramungu Faustin Perezida wa RDI Rwanda Rwiza akaba na Perezida w'Impuzamashyaka CPC, tukabibona tukicecekera tukabigenza nk'uko umwanditsi w’icyamamare DODINSKY yabivuze mu rurimi rw'icyongreza ati “When faced with senseless drama, spiteful criticisms and misguided opinions, walking away  is the best way to stand up for yourself. To respond with anger is an endorsement of their attitude.” Ncishirije mu Kinyarwanda bikaba bisobanura ibi:“igihe cyose ufite umugambi w'ukuri hakaza abantu buzuye urwango kandi bagambiriye  kugusenyera ibyo wubatse, uburyo bwiza bwo gushimangira ukuri kwawe ni ukubihorera. Niyo ubashubije wirinda kubikorana uburakari, kuko kubasubiza ubarakariye ni ugutiza umurindi ubuswa bwabo”.
 
Zimwe mu mpano za  TWAGIRAMUNGU
 
Twagiramungu yagize amateka muri politiki y'u Rwanda nshaka kugarukaho muri aka kanya mu buryo burambuye, ngamije kureba ko byagira icyo bihindura ku myumvire y’abakomeje kudindiza gahunda zigamije impinduka mu Rwanda. Ndibanda ku mpano z’ingenzi Rurema yageneye Twagiramungu, zifitanye isano n’izaranze abanyapolitiki b'ibihangange bazwi kw’isi yose, nka Mandela, Gandhi, Luther King, … Kuva kera na kare, imirimo igenda neza kurushaho iyo nyiri ukuyikora ayifitiye impano. Tujye tumenya kandi ko impano zituruka ku Mana. Bwana Twagiramungu afite impano nyinshi abandi banyapolitiki bacu badafite ubu, izo mpano nizo abantu bakwiye guheraho bakamwegera akabafasha gukura abanyarwanda ku ngoyi ya FPR Kagame. Dore zimwe muzo igihugu cyacu gikeneye kugira ngo kizagere ku mahoro arambye:
 
Kumvwa na benshi
 
Twagiramungu kuva yatangira politiki ku mugaragaro mu mwaka w’1990, abanyarwanda bakunze kumva aho avuga, aho atanga ibiganiro. Ibi byagaragariga muri za meeting yakoreshaga hirya no hino mu gihugu. Abanyarwanda bitabiraga meeting ze ku bwinshi, amoko yose kandi, bazaga nta gahato kabayeho nka bimwe FPR ikora ubu byo guhiga abaturage ngo baze ku ngufu mu manama yayo. Ahubwo igitangaje cya Twagiramungu, nko muri 2003 ubwo yazaga mu Rwanda kwiyamamaza ahanganye na Kagame, FPR yakoresheje ingufu nyinshi cyane zo gukumira abaturage ngo batajya muri meetingi ze, ariko ntibibuze abantu kuzitabira. 
 
Kuva kera kugeza ubu iyo Twagiramungu ari buvugire kuri radio iyo ariyo yose, usanga buri muturage yahagaritse ibindi byose agatega amatwi imvugo n'ibiganiro bye. Abenshi ni abajya ahihishe ariko bagatega amatwi uyu munyapolitiki w'ikigugu. Abashaka impinduka mu Rwanda bagombye guha agaciro ikintu gituma abantu bakunda kumva aho avuga n'ubwo baba babibuzwa ka jana, ariko bakabikora. Hari impamvu ikomeye ibitera, kandi iyo mpamvu ni ya mpano.
 
Birababaje kumva hari abasigaye bashaka kumuziza ko afite impano yo gutegwa amatwi ndetse no kuvuga rikijyana, nk'uko uwitwa Ambroise Nizeyimana (hano ku ifoto) aherutse gushishimura inyandiko kuri www.therwandan.com ngo kuba yarabaye minisitiri w'intebe mu masezerano ya Arusha yaragambanye. None se ko Ambroise atatubwiye uwari kuba Minisitiri w'Intebe wa Arusha ntiyitwe umugambanyi? Abantu nk'uyu Ambroise ni babandi FPR ishukisha imyanya, ikabategeka kuyikorera babanje gusebya Twagiramungu, kabone n’iyo baba batemera amabi bamuvugaho.
 
Kutikubira no kutararikira imitungo
 
Abazi amateka y'u Rwanda kandi babanye na Twagiramungu bya hafi bemeza ko atigeze arangwa n’umuco mubi wo kwikubira imyanya y'ubutegetsi cyangwa ngo yigwizeho imitungo. Hari benshi bamurwanya rero ubu nyamara ari we wababereye intango y'aho bari n'ibyo bari byo ubu. Mbere ya jenoside Ministre w’Intebe Nsanzimana amaze kweguzwa, hatangiye imishyikirano yo gushyiraho guverinoma y’amashyaka menshi, birazwi ko Twagiramungu ataharaniye umwanya wa Ministri w’Intebe.
 
Ahubwo yamamaje  yivuye inyuma umukandida umwe rukumbi, ari we Nsengiyaremye Dismas, ubu tutazi naho aba! Ntawe uyobewe intambara Nsengiyaremye yateje mw’ishyaka MDR arwanya Twagiramungu, ashaka kuba Perezida wa MDR, uretse ko bitamukundiye. Igitangaje ni uko Nsengiyaremye yageze n’aho agerageza kwirukanisha Twagiramungu mw’ishyaka MDR, mu kiswe kongre ya Kabusunzu, uretse ko nabyo ntacyo byafashe.
 
Abandi twavugaho ni bamwe mu bagabo bafashe imyanya jenoside irangiye. Aha navuga nka Makuza Bernard, Rugira Amandin, Safari Stanley, Rwigema Pierre Celestin, Gasana Anastase n'abandi. Abo bose birengagije ko Twagiramungu yabakomeje, bamuvanaho amaboko babitegetswe na FPR, bamwihakana mu buryo bugayitse bwa “MPEMUKE NDAMUKE”.
 
Umugabo Ambroise Nizeyimana, akaba ari murumuna wa nyakwigendera Nepomuseni Nayinzira wahoze ari Perezida wa PDC, agomba kuba aziranye na Twagiramungu muri MDR aho yahoze ari umurwanashyaka wa MDR, Ambroise yanze kujya mw’ishyaka rya mwenenyina kubera ko nta myanya ryatangaga. Muri iyi minsi, uwo Ambroise ari gukwirakwiza ku mbuga za Interneti inyandiko z’urukozasoni zikoma Twagiramungu amushinja ngo kwigwizaho imitungo. Ariko mu by’ukuri, ntawe utabona ko ibyo birego ari ibifitirano, kuko iyo bitaba ibyo, Ambroise aba yarerekanye niba iyo mitungo Twagiramungu yarayisize mu Rwanda cyangwa niba yarayimukanye aho atuye mu BubIligi! Kwandika ibintu nk'ibi udafitiye ibimenyetso, kandi uvuga ko ngo wize menshi, ukabikora kandi usheshe akanguhe uri mu myaka  60 y’amavuko, biteye isoni n’agahinda!
 
Ese ko wumva Ambroise ngo yatangiranye politiki na Twagiramungu mu mwaka w’1990 kandi akavuga ko amuzi imbere n’inyuma, kuki atahishuriye abasoma inyandiko ze ukuntu Twagiramungu yitangiye ishyaka MDR mu kuribyutsa muri za 90 na 91, akarihundagazaho imitungo ye y’icyo gihe, kandi atagononwa : Byageze n’aho icapiro rye ryitwaga Multiservices risigara rikorera ishyaka MDR gusa kandi ku buntu, ndetse n’andi masosiyete yari yarashinze nka Transcontintal cyangwa Pharmachimie ayaburira umwanya kubera kwitangira ishyaka, agenda acumbagira kugez’ubwo ahombye. Kubona hejuru y’ibyo hari abagishinja Twagiramungu gushaka kwigwizaho imitungo, ni ugusetsa imikara wa mugani w’Abanyamakuru. Ahubwo ikigaragara ku bashyira mu gaciro, ni uko Twagiramungu yamye ashyira inyungu za rubanda hejuru y’ize bwite.
 
Ikindi nakongeraho ni uko Twagiramungu iyo aza kuba ararikiye indonke, aba yarakomeye Kagame amashyi nka ba Makuza, maze akamushyira ku mbehe nk'abo tutayobewe. Ahubwo n'utwo yari yararonse yiyushye akuya, Inkotanyi zaratumize twose, zigera n’aho zimusenyera inzu yari asigaranye i Kamembe, byo kumuhima gusa. Icyo narangirizaho kuri iyi ngingo, ni uko Twagiramungu amaze gushwana na Leta y’Inkotanyi no kwegura ku mwanya wa Ministri w’Intebe muw’1995, hari Imiryango mpuzamahanga yifuje kumuha akazi, cyane cyane ikorana na LONI, ariko we yahisemo inzira yo kwitangira u Rwanda n’abana barwo, ashakisha uburyo bwo kubakiza ingoma ngome ya FPR-Kagame. Imana niyo nkuru, amaherezo izamufasha kugera kuri iyo ntego. Muri make rero, iyo mpano Twagiramungu abitse yo kutararikira indonke no kutarutisha abantu ibintu, ifitwe na bake.
 
Gutinyuka
 
Twagiramungu ni umugabo utagira ubwoba, utinyuka aho rukomeye. Aha jyewe kuri iyi ngingo namugereranije na Kaporali NYANDWI mu bijyanye no kugaragaza ubutwari bushingiye ku gukunda igihugu. Aha nakwibutsa muri make ibigwi by’uwo musilikare wabaye icyamamare : Inyenzi - Inkotanyi zateye u Rwanda mu myaka ya nyuma ya za 1960, zinjira mu gihugu (infiltration) ariko ingabo z'u Rwanda ziyoberwa aho zihishe. Kaporal Nyandwi yafashe icyemezo cyo gukiza u Rwanda rwose maze abwira bagenzi be ati, ndagiye aho banyicira niho bazaba bari muhite muhagota. Yaragiye rero, agwa mu bwihisho bw'inyenzi ziramwica, ingabo z'u Rwanda zihita zataka zitsinda icyo gitero. Koko rero, umuntu ukunda igihugu iyo bibaye ngombwa arakitangira kugira ngo ukuri gukomeze kuganze.
 
Muri za 91-94, Twagiramungu ntiyatinye kubwiza Prezida Habyarimana inani na rimwe, akavugira ku mugaragaro ibyo bamwe bavugiraga mu matamatama, ari nabyo byatumye aba ikirangirire, kugeza aho buri wese, no mu batari abafana be, bifuzaga kureba no kumva umuntu watinyutse Ikinani cyari cyarigize ikigirwamana (Ikinani ni izina ry'igisingizo Perezida Habyarimana yari yariyise ubwe, ngo Ikinani cyananiye abagome n'abagambanyi). Amagambo Twagiramungu yavugiye kuri stade régional i Nyamirambo tariki ya 11 Kanama muri 1991, ubwo MDR yari imaze kwemerwa, ari nabwo yasabaga ko habaho inama RUKOKOMA, ayo magambo yo kunenga imikorere  ya MRND na Perezida wayo, ari nawe wari Perezida wa Republika, abenshi barabimwangiye kugeza n’ubu.
 
Kuri bamwe ngo Twagiramungu yatanze Byumba (nkaho Byumba ari igiceri cyari mu mufuka we), ngo   yatanze igihugu kubera ko yemeye amasezerano y’Arusha yabereye muri Tanzaniya, ayo masezerano akaba yari ayo kurangiza intambara no gusangira ubutegetsi n’Inkotanyi; kuba Twagiramungu yari ashyigikiye ko ayo masezerano abaho ngo ni igicumuro gikomeye nyamara ntabwo ari Twagiramungu wasabye ko ayo masezerano abaho cyangwa se ngo abe ariwe wari mu mishyikirano n’inkotanyi maze akabikora nabi! Ese niwe wasabye ayo masezerano? Ese mama niwe wayanegosiye abikora nabi? Ese harya Perezida Habyarimana we ntiyayemeye? (Amasezerano yemewe na Habyarima wari perezida kuko ari nawe wayasinye kugira ngo yemerwe si Twagiramungu). Na n’ubu hari abantu bamwe bakihandagaza bakemeza ko Twagiramungu ari we winjije Inkotanyi mu Rwanda, birengagije ko nta n’ijambo yari afite ku ngabo z’u Rwanda.
 
Ese kuki abamwita umugambanyi cyangwa icyitso, batajya bahingutsa ubutwari yagaragaje ubwo yari amaze gutahura imigambi mibisha FPR yari yinjiranye mu gihugu ? Mu kwezi kwa 12 k’umwaka wa 1994, ataramara n’amezi atanu ku mwanya wa Ministri w’intebe, Twagiramungu yatinyutse kubwiza Kagame ukuri gukarishye, yamagana kuri radiyo ubwicanyi bw’Inkotanyi agira ati : “Hashize imyaka irenga 30 Abanyarwanda bipakuruye ingoyi, ubu si bwo bazemera kuyisubizwaho”. Abonye ko FPR ikomeje kumunaniza no kubangamira amasezerano ya Arusha, yitandukanyije n’ingoma y’igitugu cya Kagame, akiza amagara ye ahunga abo bicanyi, ajya kwisuganya hanze  y’igihugu aho yakomereje urugamba rwa politiki, n’ubu rukaba rukigeretse kuko arukomeje.
 
Ntawe uyobewe ko hagati aho mu mwaka w’ i 2003, yafunze umwuka akajya guhangana na Kagame mu matora ya Prezida wa Repubulika, ubwo FPR yari imaze gusesa ishyaka rya MDR, kugira ngo hatagira umuntu wo muri iryo shyaka uzatinyuka gupinga Kagame mu matora. Abasanzwe bikomye Twagiramungu ku mpamvu zabo bwite, bakwije isi yose ko ngo yari yajyanywe mu Rwanda no guhesha agaciro itorwa rya Kagame, bakirengagiza ko Twagiramungu yari yatowe n’amajwi arenga 60%, akomotse mu banyarwanda bo mu moko yose, uretse ko mu manyanga isanganywe, FPR yamwibye iyo ntsinzi.
 
Birazwi kandi ukuntu Kagame witwaga ko yatowe n’amajwi arenga 95%, yihereranye abameya n’abakada ba FPR akabatura umujinya wose yari avanye muri ayo matora, bazira ko ngo bari baramubeshye ko akunzwe n’abaturage, nyamara mw’ibanga ry’ibahasha y’itora, bagahundagaza amajwi yabo kuri Twagiramungu. Kuba Twagiramungu yaragiye mu matora yo mu 2003 byateye igisebo FPR itazakira haba mu banyarwanda babonye FPR yiba amajwi haba no mu banyamahanga bazi ko FPR yibye Twagiramungu amajwi,iyo atajya muri ayo matora FPR iba ihora yivuga ibigwi ko ari ishyaka ryemera demokarasi!
 
Dufashe izindi ngero ariko za vuba z’ugutinyuka kwa Twagiramungu, twakwibutsa ko nka Perezida w’Impuzamashyaka CPC, yafashe iya mbere mu kubwira amahanga ko LONI nihirahira kurasa FDLR azayitabara. Iyi mvugo ngira ngo bamwe basamira ibintu hejuru, kuyumva byarabananiye kandi basa n'abadashaka kumwegera ngo abasobanurire uko byagenda.
 
Kwihangana
 
Uyu mugabo w'inararibonye muri politiki afite ukwihangana kudasanzwe. Iyobokamana ritubwirako buri muntu agira umusaraba we. Mandela yagize umusaraba w'uburoko bukabije, Martin Luther Kingi yagize umusaraba wo gushumurirwa imbwa ngo zimurye ari mu myigaragambyo yo guca akarengane k’Abirabura muri USA naho, ... Twagiramungu afite umusaraba w'ibitutsi no kwicirwa umuryango uzize ibitekerezo bye. Ni umusaraba kuko aba ari ibyago biba bikujeho bitari ngombwa, bitewe no kureba hafi kw'ababikora cyangwa se bashaka kurengera inyungu zabo bagiye bageraho babanje gukandamiza abandi. Kwihangana burya ni impano idasanzwe kandi nk'uko Dodinsky abisobanura, iyi mpano itera nyirayo imbaraga zidasanzwe mu kurengera inyungu rusange.
 
UMWANZURO
 
Bantu bari mu mashyaka anyuranye ya opposition niba mubona umu leader wanyu afite impano zifatika zamufasha guteza imbere urugamba turiho rwo guhindura imitegekere y’igihugu cyacu, nimuhaguruke mumushyigikire, mushyigikire inzira ababwira yo gukiza abanyarwanda Sekibi FPR. Ntacyo bimaze kwikorera umunyapolitiki urusha abandi amahirwe n’impano y’ubuyobozi, ukamwikorera ugamije gusenya intego nziza yiyemeje kandi ahuriyeho na benshi. Iyo udashobora kwerekana indi nzira ihamye, ugutukana no gusebanya kwawe nta nama byungura, umuhanga w'inararibonye Dodinsky yerekanye uko bishyingurwa.
 
Abandi banyarwanda bafite ziriya mpano twavuzeho nibigaragaze, kandi barahari, bafatanye na Twagiramungu muri uru rugamba, naho abaza batukana barata igihe rwose kandi igihe cyahise kitagaruka. Ntangazwa kandi n'abakomeza gushinja Twagiramungu ibinyoma n'amafuti ariko ntibigere bacisha Kolonel Lizinde watanze pula yo guhanura indege ya Habyarimana, Perezida Habyarimana wanze ibiganiro mbere y'igihe, Perezida Kagame wanze gukurikiza amasezerano y'amahoro y'Arusha, Nsengiyaremye Dismas wirukanye Abafaransa muri 1993, Pasteur Bizimungu na Kolonel Kanyarengwe bemeye kuba ibiragi imbere ya Kagame, etc.
 
Nk'uko rero tutazahwema kubivuga, u Rwanda rwugarijwe n'ibibazo byinshi kandi bikomeye bizakemuka ari uko habayeho inama Rukokoma (conference nationale). Twari dukwiye rwose gukomeza kugirira Impuzamashyaka CPC ikizere tukayifasha kuzageza abanyarwanda bazaba bakiriho ku nama rukokoma. Ibi bizagerwaho duhaye Bwana Twagiramungu Faustin ituze, akatwereka iyo nzira izageza u Rwanda ku mpinduka Abanyarwanda benshi bategereje, cyane cyane abahejejwe ishyanga, baharanira gutaha iwabo bemye kandi bafite umutekano.
 
Harakabaho abanyapolitiki bazi kwihangana kandi buzuye impano z'Umuremyi.
 
Vincent UWINEZA
RDI Southern Estates Commissioner

Commenter cet article

HABIYAKARE stany 14/11/2014 12:56

Twagiramungu ni umuntu twese tuziho gutinyuka no kudahakilizwa.Gukorana na FPR, ntabwo ali Sakilirego, uwaliwe wese byali kumubaho iyo FPR Iticira abahutu kubamara. . ukosa ni wawundi UBAKORA UMULIMO(Nkuko YAKOBO yabibwiye KAGAME ubwo yali Depite). niba ugaya RUKOKOMA ko yavuze nabi; wowe ibyo wavuze neza kumurusha ni ibihe??Ko yakoranye na FPR nyuma akayinenga akigendera, wowe wali umaze imyaka ingahe walirutse? NTA NTUNGANE, Dukosorane Twuzuzanya, aho kugayana gusa.Kandi bamwe bagayana baba bihishe mu NKotanyi, BAGAMIJE GUSENYA GUSA. NGAHO RUSHA RUKOKOMA GUTINYUKA , NO KUVUGA NEZA TUBIBONE SE.....Maze tukwambike impeta...N, ikamba ly,UBUGABO

rwandavura 13/11/2014 22:17

twagiramugu yarahemutse kuko atigeze asaba inkotanyi kurekeraho bwicanyi zagiriye abanyabyumba n'abanyaruhengeli. twagiramungu. en fait pour bien comprendre twagiramungu nk'umuhutu wo muri opposition yatangaga isura yuko abahutu mu rwanda bashaka gukuraho habyarimana naho ba kanyarengwe na lizine n'bandi bagakaragaza ko fpr ari ishyaka ritavangura ko ari umutwe w'ingabo utavangura. lizinde yazize iki? twagiramungu yahunze iki? abo bose n'abandi bashatse guhunga ubutegetsi birashoboka ku bandi biranga bigumira mu rwanda abandi bashaka guhunga bicirwa hanze. none se muyobewe ukuntu twagiramungu yavugaga nk'umuntu ujijutse uzi ibintu ukuriye mdr ndetse na agathe? none se kuki atahunze u rwanda rwa habyarimana yarwanyaga yivuye inyuma nyamara ntabashe gusaba kagame kurekeraho mbere y'intambara? ubu amwamaganira hanze. ubu se ko habyarimana yabonaga ate twagiramungu? ubu se benshi bakoranye na habyarimana babona bate twagiramungu? par comparaison twagiramungu azi neza ko habyarimana aruta inshuro nyinshi kagamé. twagiramungu yari mu kigare atazi aho kiva n'aho kijya ngira ngo habyarimana yabonaga twagiramungu nk'umuntu uri manipulé,habyarimana agombaga kuba yaribazaga niba twagiramungu yararozwe ou yarahumye. abantu bose babonaga kagamé ashaka ubutegetse ku ngufu,habyarimana we yabyumvise kare ariko twagiramungu yabyumvise kera ibintu byararangiye ntacyo akibasha kuramira. niba twagiramungu yararokotse akicirwa abantu byatewe n'isura ye yatangaga,yafatwaga nk'umugambanyi abe nabo bazimiye bafatwa batyo(attention kagamé nawe niko afata abantu)

twagiramungu yarahubukaga kuko inkotanyi zicaga abantu mu rwanda rwagati i kigali,leta ikamagana uwbo bwicanyi naho twagiramungu n'ishyaka rye bagashinja leta ubwicanyi itakoze none se ibyo byitwa gute? neutralité?non byitwa kubeshya mais muri icyo gihe ntarindi zina wabiha ritari ubugambane.

ikibabaje rero ni uko fpr na kagamé bahimbiraga ibinyoma habyarimana maze twagiramungu ntabivuguruze ou ntakore ankete yemeza ou ivuguruza maze habyarimana ahimbirwa ibyaha amahanga atangira kubona ko ari abahutu ubwabo bashaka gukuraho umuhutu ngiye kure mu bitekerezo byanjye navuga ko mu bwicanyi bwabayeho hagombaga kwica habyarimana(niko byagenze)ariko ampleur y'ubwicanyi abanyamerica bararebaga bagasanga kagamé azafata ubutegetsi vuba na bwangu,bagasanga hari kuzabaho ubwicanyi budakabije kuko abahutu bari inyuma ya twagiramungu(hari abahutu benshi muri mdr) batari kujya mu bwicanyi ni ikosa ryabayeho ryo kuvuga ko habyarimana napfa nta kibazo kinini kizabaho kuko n'ubundi abahutu birirwaga baririmba ko navaho impundu zizavuga n'abatutsi(PL) baririmbaga batyo mais nyuma y'uko abahutu bahimbye iyo nirimbo.

none senta kubeshya nimumbwire ukuntu umuntu ushyira mu gaciro yashoboraga kubona twagiramungu? none se we yumva yari gufatwa ate? umuntu w'inararibonye rero ntahubuka, aricara akatekereza agafata umwanya wo kureba no gushishoza,akavuga ibintu uko abibona kari uko biri,nawe se ni gute twagiramungu yarebaga ubwicanyi,iterabwoba ryari i kigali(mwibuke ko hari za grenade mu ma bisi,hari ahantu hatagendrwaga butangiye kwira,...)ritewe na kagamé maze ntaryamagane byabayeho ubwicanyi n'ububandi,ubujura mu ngabo za kera dans ce cas akabyamaga ariko akamagana n'ibikorwa bya fpr yari gufatwa rero nk'inararibonye ntiyari gufatwa nk'umwanzi w'abahutu yari gufatwa n'kumuntu ushaka amahoro koko none se koko kuki ba nyamwasa na ba rudasingwa babashije kwamagana ibikorwa(bibi) bya kagamé trop tard mais ils ont eu ce courage navuga ko bo ari abagabo pe ni inararibonye bazi kagamé baramwamagana naho twagiramungu hari ubwo avuze neza kuri habyarimana mais c'est trop tard ibyo avuga ubu yari kubivuga icyo gihe,ubu arabivuga mais bavuga ko ari umuhutu wamagana abatutsi il n'est plus crédible sinzi icyo yumva yamarira abanyarwanda kabisa kuko ubu urwanda ruri ahabi pe, n'abaturanyi bari habi,twagiramungu siwe wari guhagarika génocide mais iyo avugisha ukuri wenda ntiyari kuba ariko naho yaba ntiyari gufatwa nk'umugambanyi

Simon 12/11/2014 18:31

Nsubize Mahoro.Kwishyirahamwe byo ntibishoboka
Gushaka Abashumba nabyo ntibisobanutse Kuko tutazi uzashaka abashumba uwo ariwe
Ahubwo dukeneye Umushabizi washize ubwoba
ahubwo muri aba bose barimo batubwirango bashinze amashyaka ya opposition bakamufasha kumenya
aho inkunga ya contacts zokubona abadushyigikiye
naho abandi barimo babiryaniramo batarageraKgli

mahoro 12/11/2014 17:18

birababaje kaândi biratangaaje kûumva n'întiti z'âbanyarwaanda ahô zirî hôose zîituramiye ngo ururîmi ry'îkinyarwaanda ngo rupfakâre bigezâha,arî abiîze kuu ngoma zôose z'ûbutêgetsi mu rwaanda kugeza kuriîrîho ubu bagoomba kwiishyura amafarâanga abanyarwaanda(igihûgu) baâbatanzehô bîiga.Imbwâ gusa zubwôoba,ziikûunda zitârwanira ishyaka,umucô,amahôro,ubumwê nô kubâaba hamwê mu gihûgu nô mumahôro.
Nimuhaguruke ibiintu bigeze iwa ndabaga

Ntagisubizo mutanga ku ihurizo ryange
Ndisubiremo
Ikirura n'amasega byigabije inzuri n'amatungo(igihugu n'abanyarwanda) zica abashumba bose b'ingenzi mu turere twose:nguwo Gapyisi Emmanuel(Gitarama),nguwo Gatabazi Felicien(Butare) nguwo Bucyana Martin(Cyangugu), nguwo Habyarimana Kinani(Gisenyi),nguwo Nsabimana Castale(Byumba),nguwo Karamira Froduard(Kigali),nguwo Lizinde Theoneste et Biseruka(Ruhengeri),ngowo Seth Sendashonga(Kibuye), nguwo ngabo hirya no hino,abasirikali ,abamusenyeli,abapasteur ababikira,impunzi,abana, abagore abasaza ,ibimuga,abasazi abarwayi..muri make ntaho ikirura n'amasega batageze
Gukiza amatungo asigaye no kurwana kubusugire bw'inzuri hakarwa iki kingenzi?
1.Gushaka abashumba bo kujya kuragira amatungo yagoswe n'ikirura n'amasega
2.Kwituramira mu buhungiro n'ahandi ugategereza ko ikirura kihagusanga kimaze kurangiza amatungo?
3.Kukivugiriza induru utabariza amatungo asigaye?
4.Kugisaba imbabazi ugafatanya nocyo kurya amatungo asigaye nkuko abahezanguni nka Rucagu babigenje
5.Kwishyira hamwe mugashakisha inkoni n'umuriro wo kucyotsa n'ayo masega yacyo.
6.Kurega abantu bose bagifasha mu kurimbura u Rwanda n'abanyarwanda
7.kumvisha amatungo asigaye kwihungira n'iba adashoboye kwirwanaho
8.Gusenga nkukoMosi na Aroni babikoze Imana igashobora gukiza abana bayo
9.Kuba banyamwigendaho ugasaba ubwenegihugu bw'ikindi gihugu hanyuma ikibesyako wageze aho ujya
10.Kubwejagura,kwandika amafuti,gushinyagurira amatungo ari gupfa,kunywa akabyeri ukarenzaho akaboro(agatuba)sheti hanyuma ukiryamira uraramye,guteza akavuyo mubashaka kwirukana ikirura n'amasiha

Sano 12/11/2014 12:54

Toussain we,Uransekeje nali ntegereje undi wambwira numvaga mfite amatsiko aliko niba Ubona ko Kagame ali Umuhanga muli Politique ukabona yarayoboye igihugu neza sinzi niba ugira amaso akaga yashyizeho Abanyarwanda nibakivanamo bazaba ali abagabo uzambwire undi utali we kuko nawe uligiza nkana kuko ntago kumenya politique ali kumara Imbaga ndashaka ko wambwira undi kuko niba aliwe ubona ntago twakomeza ikiganiro kuko ntaho twagera ahubwo igisubizo uzagihabwa n'ibihe bizaza umaze kubona Ingaruka z'ubutegetsi bubi.

Databuja 12/11/2014 09:27

Uyu Makuba atanze ihurizo ryiza, ribonewe ibisubizo u Rwanda rwagira amahoro.
Iyaba Makuba yarashoboye kujya ahagaragara rwose, agafasha abandi gutekereza muri buriya buryo !!

Gapyisi 12/11/2014 09:21

Urupfu rwa Nyakwigendera Gapyisi n'ishyingurwa bye byabaye mu nyungu za MRND. Erega il est temps de faire des analyses profondes.! Naho Kamari rwose ntiwagereranya Twagiramungu na Bizimungu. Bose baguye mu mutego w'inkotanyi, ni byo, ariko Twagiramungu yahise awubona arawamagana du moins.

Sano 12/11/2014 09:04

Toussain,iyo uvuze ng Twagiramungu n'Umuswa muli Politique,Wampa urugero rw'uwo wemera uzi politique ntawe wabona ntiwambwira ko ali Kagame,ni Kayumba se,ni Murayi se cyangwa n'ugupfa kuvuga gusa utazi ibyo uvuga.

toussaint 12/11/2014 12:44

Santo we jye ndemeza ko Kagame arumuhanga muri politiki kuko atarumuhanga ntago aba ategetse iyi myaka yose urebye nibihe bikomeye yahuye nabyo jye nagenda nguha ingrro nyinshi zerekano ubuhanga bwaba bagabo nubwo atiriyo ntego

toussaint 12/11/2014 07:35

Jye ndemeranya na kamali twagiramungu numuswa muri politiki we icyo azi nukuvuga gusa.amakosa ye ya politiki niyo akomeza gutera urujijo

makuba 11/11/2014 22:52

Bahutu mwe mwarawutaye n'amateka ntacyo ababwira cyangwa ntimunayazi.
Ingoma ya cyami ntutsi yaduka yabanje imaraho abahinza(abami b'abahutu) irangije yica intwari n'abahutu bakomeye iri i bushiru mu majyaruguru y'u Rwanda (Ruhengeli Gisenyi)ari mu bwishaza Kibuye ari mu duga Gitarama iri mu mayaga Butare ari mu mpala cyangugu ntaho abatutsi batatsinze batishe abahutu ariko hari ubahinza banje kwihagaraho abatutsi babafashwa n'abazungu ku bazungura.aha navuga Bukunzi na busozo hafi yaho Rukokoma Twagiramungu aturuka i Mubari muri byumba naho babanje kwihagararaho banza n'i bushiru ninibeshya munyunganire cyangwa mumbeshyuze
Muri iki gihe ingoma mpotozi ntutsi igarukiye yishe arakomeza no kwica abahutu ku bwinshi nko ku ngoma cyami y'ubuhake.Ngaho kinani habyara,ngaho biseruka ,ngaho lizinde theoneste ngaho seti sendashonga,ngaho sindikubwabo theodore,ngaha Karamira Floduard,ngaho Gapyisi Emmanuel,ngaho,Gatabazi Felicien, ngaho Bucyana Martin ,ngahobamusenyeri cumi na bayngahe,ngaho musenyeli Nsengiyumva Vicent, ngaho musenyeri Kwigize phocas ngaho ba Pasteurs n'ababikira batarenga ingano,Ngaho Rwendeye na castale Nsabimana,ngaho Major Cyiza waboye umunyarwanda wa mbere w'umuhanga muri kaminuza ngaho abaprofeseri bo ku rwego rwisi nka Akayezu,ngaho abanyeshuli ba ruhande na nyakinama ndetse na mburabuturo ngaho abahutu beshi muri buri segiteri na selire ngaho nago,pu sinashobora kubarura abishwe ndasaba ko buri serire ne secteur bakora amarisiti y'ababo bishwe bagahita bayoherereza amashyaka ya opposition bityo natwe dutange ibirego iyi niyo nshingano ya mbere ya buri shyaka ishyaka ritabibona gutyo iryo ni irya pirete pirato n'abicanyi be.tugenekereje i by'i Bukunzi na Busozo ndabona umwami wa nyuma w'umuhutu wahiciwe ameze nka RUKOKOMA Twagiramungi bityo ni ba amateka ntacyo amubwira ngo ntazagwe mu mutego w'abazungu nawe agomba gukina iyo mu kirere kandi ntiyitandukanye n'andi banyarwanda nabo kandi bamenye ko son verbial afitiye akamaro gakomeye opposition.ntakumurwanya nibubabarirane munumvikane aho kurwanira imyanya y'aho mutari murwanire inzirakarenga z'abanyarwanda bicwa umunsi n'ijoro
Mumfashe gusubiza iri hurizo:
Ikirurura kiri kumwe n'amasega yica aryana byafashe inzuri zirimo amatungu zimaze kwica abashumba zishoka mu ma tungu.Uramuste ushaka gukiza amatungo asigaye mu rwuri wakora iki?
1.wakwihamba wenyine ku kirura n'amasega mukarwana.
2.wakwiyirukera ukihisha mu buhungiro ategereje kwipfira cyangwa ko ikirura kiza kukwicira mu buhungiri.
3.wakoma akaruru utabaza unatabariza amatungo
4.washaka abashumba bajya kuragira amatungo ikirura kagabije nkuko bamwe barwanira kujya kwiyamamaza no kuzayoboro ingwate zifunzwe n'ikirura n'amasega
5.Nafatanya n'abashumba barokotse tugashaka inkoni tugahanga n'ikirura n'amasega
6.nasaba ikirura n'amasega imbabazi kikanyemerera nanjye nkajya kwirira ku matungo.
7.nategereza ikirura kazahaga cyangwa cyazamara amatungo ngataha mu rwuri n'ubwo aranjye waba usigariwe kuribwa
8.nagirana imishyikirano n'ikirura
9.nagaragaza amakosa y'ikirura n'amasega ngasaba kurengera amatungo
10.Nakora uko nshoboye ngasaba amatungo asigaye kwirwanaho cyangwa agahunga ikirura n'amasega bikaburiramo
mumfashe gusubiza harakabaho ubufatanye

sano 11/11/2014 17:03

Kamali we hali cyera aliko byagaragaye ko Rukokoma yarenganaga,n'ubu se abo mu muryango wa Gapyisi baracyemeza ko yagize uruhare mu rupfu rwe uzababaze,biliya bimeze nk'igihe FPR yicaga umucuruzi Mathias,nyuma bakabitwerera uwo bali inshuti ,nyuma bakabyumvisha umugore we ko yishwe na Ndagije akajya no kubivuga ku Maradiyo,ubu se ntibyagaragaye ko aliko FPR ikora wavuga ikindi upfa na Rukokoma aliko ntuzagire amaraso Umugerekaho

Kamari 11/11/2014 16:25

Arikabanyarwanda muratsetsa ngo ntibavuga Bizimungu kuko ari Umukiga ?Harya Twagiramungu niigiki? ni Umunyanduga?

Abanyarwanda tuzi Umuhemu,Igisambo.Mubishira Imbere bose ngo nibo Mesiya w'Abanyarwanda.
Dushingura nyakwigendera intwari yacu GAPYISI.
Mwebwe mushigikira Rukokoma ko ari miseke igoroye muzamubaze ukuntu bamwirukankanye
ngo ntiyegere aho bari gushingura.

Nimureke ayo mateshwa yanyu ahubwo njye Mbona mwamugira Inama agahinduka naho ubundi muragosorera murucaca. cyangwa azegame aceceke nkuko Bizimungu ameze ubu, ari Twagiramungu cyangwa Bizimungu bose bahemukiye abanyarwanda.

Pierre 11/11/2014 17:48

Nawe Bwana Kamari ngusubije nagira nti nibyo koko politike si umukino wabose ariko iyo utayizi uricecekera. Urenbye amateka yacu bariya bantu bose babaye abayozi tuzi nta n'umwe udafite uko yahemutse. Ubwo rero iby'akarere byo ntagaciro bigifite njye nakwemera uvuze uti nabonaga Twagiramungu yasimburwa na naka ubifitiye ubushobozi kumurusha. niba ntawe ubona wamusimbura nawe ukaba utabishoboye, reka iyo mvugo yawe ntacyo imaze nta n'icyo yungura abanyarwanda bo mugihe tugegezemo. niba hari n'abandi bavuze gutyo mbere yawe ukaba urimo kubasubiza, mwese ntah mutaniye. Cyakora iyo ndwara ngo I Burayi igomba kuba yeze usibye ko haba havanzemo no kwirata no kwiyemera. Abari muri Afurika twe si ibyo dushyira imbere. wa mugani ko mwirirwa musakuza Twagiramungu akaba byibura yaragerageje akajya kwiyamamaza, tukaba tumwumva tukanamubona kuti za TV mpuzamahanga asobanura ikibazo cy'u Rwanda, nkawe na bagenzi bawe muwirirwa muri critiques zámafuti mumaze iki cyangwa mumariye iki abanyarwanda? Please stop this nonsense! Ubwo nawe ngufata nka bariya bose birirwa boreka imbaga.

Abashi we! 11/11/2014 16:22

Musigaye musigaho izishigikiye Myanda Rukokoma mugasiba izivuga amabi ye? Nkawe urasubiza ninde wakwandikiye cyangwa wakureze, Wabonye ko Rukokoma wanyu arwaye? Yongeye kwiha kuvuga ngo FDLR pu

Pierre 11/11/2014 17:37

En fait njye ndabona nta zina ryawe washyizeho nyine bikaba bigaragara ko uri umwe muri bariya Bwana Vincent yavuze haruguru ko bakorera FPR bagasa n'abiyita ko bari kumwe n'abandi kurugamba. Nk'ubu ntacyo uvuze!!!! Uramutse uri umuntu ufite mumutwe hazima ntiwakwishimira ko umuntu arwaye nk'aho kurwara ari igisebo. Ubwo wowe umuntu yakubaza niba uri muzima. Niba kandi aribyo ndamusabira gukira kuko ni umugabo ugeze muzabukuru kandi ufite ibitekerezo. Wowe harya waba ufite imyaka ingahe? ufite ubuhe bumanzi kuba ukiriho niba uri umunyarwanda abapfuye wabarushaga iki? Kwirirwa mvuga byinshi naba mbaye nkawe. Imana igufashe wowe ntuzarware!

Sano 11/11/2014 13:59

Njyewe sinemeranya n;Uvuga ko Ingabire tumufata nka Mandera,kuko siwe Munyapolitique wenyine warwanyije FPR agafungwa ahubwo ababivuga n'uko aliwe bashyigikiye bakabona n'umwanya wo kubyandika ku Bwinshi,hano ku mbuga Ese Mushayidi we afungiye iki kuki se we ataba nka Mandera none se Niyitegeka wagiye no Mu matora we kuki ataba we n'uko adafite abamuvugira,aheze muli gereza ntawe Umuvuga ahubwo abantu bilirwa bavuga gusa Ingabire,njye siko Mbibona Nyamara Muzehe Twagiramungu mu matora yo muli 2003,njye ndamushima kuko yatinyutse akaza bagasesagura amafranga y'Igihugu ngo bamurwanye uko bigenda kose aliko Abaturage bakemera bakamutora,kagame niho yaboneye ko Abanyarwanda batamukunda na gato nta n'ubwo bazamukunda,Abanyarwanda tuzakunda Uwaliwe wese uzarwanya akarengane ku Banyarwanda Utaramennye amaraso,niwe Mandera ni benshi rero.

Venant Habiyambere 12/11/2014 09:08

Ibyo uvuze nibyo. Ariko njye nasomye igitabo cya Mandela. ANC muri stratégie yabo yashatse Slogan (bahitamo one Man, One vote), hanyuma bashaka Leader, umuntu bashyira imbere bakamukorera Mythe maze bahitamo Mandela. Mandela ubwe avuga ko ari mu bintu byamutangaje kubona ariwe bafata ntibafate Walter Sissulu (qui a recruté Mandela) cyangwa n'abandi bakomeye bari bafunganye nawe nka R. Sobukwe cyangwa Mbeki (Ise wa Thabo Mbeki wari warahungiye London) akaba ari mubakoze iyo stratégie. Hanyuma bahitamo Mandela maze batangira campagne bise "Free Mandela".
Icyo nashatse kuvuga nuko abantu batabuze bakwita Mandela rwandais. Ikibuze ni abastratege. Ese opposition igira Slogan ? Tekereza buri munyarwanda avuga par ex. Ibuka bose, Rengera Bose. Amashyaka ya opposition yose afite Slogan bahuriyeho

Semana 11/11/2014 13:21

Buli wese agira uwo ashyigikiye bitewe n'uko amuzi,njye Twagiramungu muzi kuva muli za Mirongo Inani,nibwo bwa Mbere nabonye Umugabo utinyuka abantu bo mu kazu bali ku Butegetsi,ubwo yali President wa FERWAFA akanga gutanga igikombe agiha Mukungwa ya Zigiranyiazo,akemera bakamufunga Iyo aramuka atanze icyo Gikombe yali kuba aciye ku mategeko ya Ferwafa,nibwo nongeye kumubona igihe cy'amashyaka kuko yaravugaga abantu bose bagahaguruka,niwe watumye Oposition ikomera kuko ntarya Iminwa ngira ngo muli RPF barabizi uko yajyaga abagaragura bali mu nama ya Guvernement kugeza ubwo besanze bagomba kumwigizayo kuko yababuzaga gukora gahunda biyemeje yo kumara abantu,Abilirwa bamwandika rero bamusebya bagombye kureba abamusimbuye icyo bakoze,Ndebera Rwigema,Umuntu w'Umugabo ajya guhakwa kuliya koko,reba Makuza,urebe Rucagu ,yewe turetse nabo ninde washima muli Oposition,ni Kayumba se Udashobora kwemera ibyo yakoze Ubwo yali Umugaba w'Ingabo,Rudasingwa Aho Muramuzi muli za 1995,yica agakiza,none abo bose n'Abere bihaye Rukokoma,Murata igihe.

Kabonero 11/11/2014 12:27

Iyi nyandiko ni nziza.Abanyepolitiki bigiza nkana bamwe bagahitamo kwiyibagiza inshingano zabo umuti ukaba kwegeka ibintu byabayobeye cyangwa byabananiye kuri Mr Rukokoma,byaba byiza barebye kure bakareba niba bo ari miseke igoroye.

MUTIMA MICYE 11/11/2014 11:50

Njye ugeza ubu zinsobanukirwa ubukana bw'abarwanya Twagiramungu icyo bagamije,Simbona imbaraga bakoresha aho kuikoresha ahacyenewe aho bazivana.Mbona barimo kuturangaza ubundi umwanzi akitegura urugamba ruzarimbura kanyarwanda abandi bakiri mumanjwe ngo ntibashaka Twagiramungu udafite icyo abatwaye ahubwo atakiryama ashaka icyahirika iriya ngoma.Murabona mwene rutagambwa aragura missiles n'ibifaru kubwinshi namwe mukigumira mumateshwa kumaradiyo n'ibinyamakuru mutuka uwo mwagafatanyije urugamba?Uwabaroze ntiyakarabye reka mwene Rutagambwa azatumarire kw'icumu ntakundi nabona mvuga.Ni agahinda.

john 11/11/2014 12:10

Abo bamurwanya se, ugirango Hari ikindi! Ni ba bandi bareba INDA zabo, Aho kureba intérêt de la collectivité. Ni nabo uzasanga bashyiraho gouvernement kuri internet. Honte à eux.
quand tu critiques, il faut donner meilleure idée.

Kamali 10/11/2014 23:28

Ariko abanyarwanda barasetsa peee! Ngo Twagiramungu nasabe imbabazi z'abo yahemukiye! ni abahe se yahemukiye? Twagiramungu yakoze politique ya opposition nk'abandi bose, ahubwo yicirwa umuryango nawe arokoka aha mana, none ngo nasabe imbabazi? Kuki mutarabwira Rwigema utegera amaboko Kagame ngo asabe imbabazi? kuki mutarabwira Bizimungu waje ashoreye inkotanyi ngo asabe imbabazi ni uko se ari umukiga? Ntabwo muzi ko Bizimungu ariwe wabeshye imibare y'abantu inkotanyi ziciye i Kibeho? Ntimuzi se ko Bizimungu ariwe wohereje inkotanyi gusenya inkambi muri Congo ahagaze mu Bugarama akavuga ngo arashaka Belrin2? cyangwa ntimumuvuga kuko ari umukiga!

Iyaba Twagiramungu yaragambaniraga igihugu Habyarimana yari kumufata akamufunga nk'uko Pilato Kagame yafunze Ingabire , niba Habyarimana atarabikoze ari umukuru w'igihugu kandi azi ko Twagiramungu agambana ikosa ni iryande ubwo? Ntabwo politique yo kwanga Twagiramungu ngo ni uko atari umukiga izagira aho ibageza , muribeshya cyane! Ngaho nimutekereze iyaba ari Twagiramungu wavuze ngo FDLR nijye i Kisangani amagambo muba muri kuvuga! Byiringiro yavuze ko azatanga Mudacumura muraceceka , Twagiramungu avuze ko abashakwa n'ubutabera (kandi atavuze n'izina) n'abahawe ibihano na ONU ko bagomba kuva mu buyobozi muvuza induru, ahubwo Byiringiro yihutira kuvuga ko amunyaze CPC kuko we adashobora no kwishyiriraho un mouvement politique!Koko mugihe tugezemo mwigeze mwumva umusilikare ukora coup d'Etat mu ishyaka rya politique? Uwo se abonye igihugu yakora ibimeze gute?

Hari uwavuze ngo Twagiramungu yageze kuki? Yooo!! Twagiramungu niwe wenyinye wahagurukije miliyoni y'abaturage i Kigali akura Habyarimana ku izima hahita hajyaho leta y'inzibacyuho iyobowe n'ishyaka rye rya MDR, niwe wenyine watsinze Kagame mu matora ya 2003 isi yose ikaba ariwe itangaho urugero ko yibwe amajwi! ibyo bikorwa 2 bikomeye bya politiki ntawundi munyarwanda urabigeraho!!

Venant Habiyambere 11/11/2014 11:08

Hari igihe nganira n’abanyarwanda bakambwira ko mu Rwanda nta Leader dufite nkuko South Afrika yari ifite Mandela. Njye nkuze kubabwira ko un pueple fait un Leader mais un Leader ne fait pas un peuple. Abanyarwanda tubishatse Ingabire twamugira Leader nkuko ANC yagize Mandela Leader. Abanyamerika, igihe bakora Film kuri Rusesabagina abdukoreye un Leader maze turamwanga. Nkuko Mandela ubwe yabivuze, ntabwo ari umuntu w’ IGITANGAZA (Messi) ni umuntu usanzwe.
Igituma abanyarwanda barwanya Kagame badashobora kumvikana nuko akenshi usanga batemera réalités zabo : ntabwo uzabona umuntu twese (Abahutu, abatutsi, abanyanduga, abakiga) duhuriraraho tukamwemera comme un « Leader ». Ariko nkuko Boniface yabivuze bakamwita umusazi, twari dukwiye kwemera ko izo groupes mvuze hejuru ari réalités incontournables. Amashyaka yose yarakwiye gukora une discussion honnête mbere yo kujya muri coallition. Twagiramungu we, kuri izi groupes navuze haraguru, hiyongeraho abandi bamuziza son passé muri MDR (abo bise POWER) ntakuntu ashobora kwemerwa n’igice cyiswe POWER kabone niyo yajya mu ishyaka lindi. Nkaba nibaza rero nimba Twagiramungu muri Coalition ye abo bantu atabashyiramo cyangwa ashaka kubashyiramo atabanje kuganira nabo.
Ariko izi dissension ntabwo zari zikwiye guca intege, ndetse na critique kuri Twagiramungu ntabwo zari zikwiye gufatwa nkaho ari négatif. Ahubwo zari zikwiye kuduha ingufu kugirango habe des vrais changements aho (nkuko Obama yabivuze) haba des institutions très fortes plutôt que des hommes forts aho Twagiramungu atazagera kubutegetsi maze agahinduka MUGABE wo muri Zimbambwe

Niyonzima jean de Dieu 10/11/2014 22:57

Si ntekereza ko hari abantu banga Twagiramungu ahubwo banga amfuti ye no guhubuka. Iyo azakureba kure yari gusaba imbazizi aboyahemukiye. ni mukuru ari ko ntanarimwe azatuza mumutima hari amaraso yinzirakarengane yatanzeho ibitambo ngo arashaka Rukokoma. Niba wowe ufite uko umubona ntabwo ari kibwirizwa watanga ngo abantu bunve kimwe nawe.Habyarimana yemeye imishyikirano kubera induru yabobose wavuze ngo barikurwanya akazu. Abaturage barabaye ni agire ubutwari asabe imbabazi kuribimwe yakoze byagiye kandi bikangiza ituze RY;Abanyarwanda. Abantu bose bakora ibintu bitari byiza ushobora kubashyungera atari uko ushyimihsyizwe nibyo bari gukura ahubwo ushaka kubamenya neza ngo ube wakwirinda. kuba ba mutega amtwi ni ukirango barebe niba koko hari icyiza yadukanye kerenze kubibi byinshi yakoreye la societe rwandaise.

mutimamuke 10/11/2014 22:38

Twagira Rukokoma si umunyapolitiki wo yusuzugura kuko bigaragara ko afite ubutegetsi yayobora neza. ikibazo ni uko hari benshi babushaka kandi batanashobora kuyobora abatura ahubwa bayogoza cyangwa bakayobwa abautrage.Nta karere na kamwe ku Rwanda waburamo abagambaniye igihugu.hari ugambana atabizi cyangwa ubeshywa ntarabukwe nkunko FPR yagenje TWAGIRAMUNGU.Ikindi umugambanyi mubi ni uba yarasangiye n'abandi akabavamo nkuko BIZIMUNGU Pasteur yifatanye n'inyenzi akagambanira kinani n'abanyarwanda.Rucagu na NSEKALIJE Aloys sibo bari abami kwa kinani sibo se nyuma bamwipakuruye.Icyo nagiramo inama umusaza RUKOKOMa ni uko yashyira ahagaragara amakosa ya FPR yose hanze,akanasaba imbabazi kumagambo amwe yavuze atarashyimishije abanyarwanda nyamwinshi ndetse natarashimishije impunzi asaba ko bamukuraho umutaka. ahari yari ataramenya icyo afandi ari cyo nicyo agamije.ikizwi ni uko ashaka ubuprezida kandi nagira ubushishozi bwo ku rwego rwo hejuru akagira n'abajyanama atari abashaka imyanya n'amafaranga azayobora ruriya Rwanda rw'abanyarwanda rugiye kwicwa n'abanyamahanga.Indi nama namugira ni iyo gukina politiki yo hanze no mu gihugu iy'impunzi ntiyivange cyane mubazirinze kuva baraswaho 1997 kugeza magingo aya ahubwo akazigira inama ariko atari uwo kwitanga nkuko kinani yabwiraga inyenzi ngo zimanike amaboko hejuru zitahe.Igihe cy'ubuyobozi bwa gisirikari muri Afrika nta myaka 10 gishigaje.Ikindi ntiyibeshye ngo hari imishyikkirano yakura kagame Paul n'abicanyibe ku butegetsi Azavaho ashyirehe cyangwa ukurweho n'undi mwicanyi nkawe bakingikiranye ikibaba mpaka ushaje utaranasubira mu gihugu.Umuriro zacanye mu Rwanda ni nawo uzazirukana mu Rwanda.bityo ahubwo ni mutoze abato gukunda no kubohora igihugu.Reka FDLR yigeragereze.aho kuvuma abategetsi bayo vuma abishe impunzi n'abashaka kuzimara kuko nawe ubwawe uzi ko mu Rwanda natkigenda ariko ubugambanyi bw'amaganga buvugako mu Rwanda ariho hambere hateye imbere kandi hari democratie.Abanyarwanda bagufitiye ikizere ariko uhagarikiwe ni ngwe niwe uvoma bwa mbere.iyo habonetse imbwa nyinshi zibwejagura hari ubwo ya ngwe yikanga ikiruka abandi bakabona bakavoma.
Ntushobora kuyikanga wenyine ikindi ni uko iyo ibonye igishirira ikuramo akayo karenge.Ufashije aba FDLR kubona icyo gishirira waba ugikoze kandi mbanambura Gishungu baguha icyizere 90 ku ijana.
Mugire umurava n'ubwumvikane

Muto 10/11/2014 21:49

Abanyarwanda muzahumuka ryari?
Jye uyu mugabo nubwo ntamuzi imbona nkubone, ariko namaze kubona ko ibye ari agahomamunwa. Nakomeje gukurikirana ibye nibwira ko hari icyo yageza ku banyarwanda kizima ndaheba. Yahise anyibutsa wa mugani w'agacurama twize kera; mu ntambara inyoni zarwanaga n'inyamaswa, inyoni zatsinda, agacurama kati twatsinze kubera ko mfite amababa nkaguruka; inyamaswa zatsinda, kati twatsinze kubera ko mfite amenyo. Uyu mugabo nawe rero ibye birayoberanye. Ntabwo nagaruka kubyo yakoze byose ariko iyo ibikurikiranye usanga uyu munsi ari hano ejo akaba ari hariya. Duhereye ku mateka ya vuba, ubu ndibaza icyo yatubwira ku nkubi yashyizeho ngo ajyanye na Semushi mu Rwanda? Ese baracyakorana? Ese iby'iyo nshuti ye bigeze he? Mutubwire! Ese igitutu yari afite ngo agiye gukorera politiki mu rwanda kigeze he? Ese ubwo nibwo bunararibonye bwo guhoza abantu mu kujarajara ? Mbere yo kumuvuma mujye cyangwa kumushigikira mujye musubiza amaso inyuma murebe iyo mijarajaro ye, muzasanga ntaho yazatugeza. Tugeze no mu gihugu yatugurisha aho abonye menshi. Murakoze.

KWIZERA 10/11/2014 20:02

Mwabantu mwe nakomeje kubabwira ko Twagiramungu atariwe kibazo kiduhangayikishije ariko mwanze kunyumva,mbisubiremo sindi mu ishyaka rya Twagiramungu,sinziranye nawe duhurira mubikorwa bimwe na bimwe gusa nkuko no kuriyo foto turi mumyigaragambyo place ya Luxembourg agaragaraho najye mbonekaho kuko nari nayitabiriye.Ariko iyo mutinda kumakosa ngo yakoze mumyaka ya za 1990 wagirango niwe wakosheje wenyine(aha sinshatse kuvuga ko ari umwere kuko nanjye nemerako icyo gihe hari amakosa yakoze yibeshya kunkotanyi zari zifitiye gahunda yo kuturimbura no kudusuzugura.)ariko kandi nibuka ko arumwe mubakoranye nazo akimara kubona ubugome bwabo afata ijambo kuri radio rwanda(nararyumvise iyo nari mubuhungiri muri Zayire)yamagana ubwicanyi bwabo babisha Kagame sukumusubiza n'ubwirasi arasizora.Muzi ko yahise afata iyubuhungira ntiyari yanze kwipfuka mumaso ngo agumye yibere pr.ministre. Ageze ino yakomeje kwamagana bariya bicanyi ningufu ze zose.Iyo mbonye ubukana mumwibasirana ndibaza nti:twibagirwe Kagame n'abambari be duhugire kuwo dufatanyije urugamba tunamuhimbire ibirego byo kumucisha umutwe gushyira hamwe tukarandura iriya ngoma tube tubyihoreye?Ese niba tutanamukunda da?Ahandi ntimubona abanyepolitike batanakundana ariko bagakora union kuko bafite intumbero imwe bayigeraho bakabona bakarwanira inyungu ziyivuyemo.Ese twe turwanira iki koko gituma twiha rubanda ducagagurana kubusa?Nabonye nuvuga ngo ni Rutema ayeze! njye narabajije nti ayeze yashakaga kuvuga arihe mwabantu mwe?Abigize inshyanutsi batanga inama ziroha intwari zacu ziri muri Congo mbona batanga undi musanzu ariko ibyubujyanama bakabireka kuko si impano yabo.Nibareke abanyarwanda babishoboye bakorane mugutsinsura iriya ngoma ibindi bizaze nyuma,nibirindi kuryanisha abaturimbere nibagirana no kutumvikana tubasabe babicocere ahiherereye aho kwenyegeza dufata uruhande kubera impamvu izi nizi.Reka ndekere aha kuko narondogoye ahari kuko ndambiwe aya makosa ya bamwe.

Bazumvaryari 10/11/2014 15:29

Nimureke gutukana, ahubwo nimushake umuti. Si Twagira gusa, hari n'abandi: ba Ingabire, Ba Rudasingwa, ba Nahimana Padiri, ..... nimushyire hamwe mujye gukubita kariya kagabo k'ingoto incuro.

kgl 10/11/2014 19:17

Mumbabarire ibitutsi mpurutuye hejuru ; nari nibeshye !

JMV 10/11/2014 14:54

Inanga Twagiramungu ihinduranya amashyaka nk'ihinduranya amakariso! Ntacyo izageraho uretse gutangaho abandi ibitambo no kwiyoberanya. Izi gusenya no gusebya igihugu gusa! Ni inshyanutsi!

Jeanine 10/11/2014 14:31

Kubona umunyapolitiki nka Faustin Twagiramungu ashuka abanyarwanda ngo nta moko aba mu Rwanda. Iman imufashe mu nzozi ze, adahindutse mbabwije ukuri kose ko ntacyo dutegereje muri uyu munyarwanda. Azi kuvuga neza indimi no gushyenga rimwe na rimwe agasetsa abantu. Ntabwo azi amacenga ya politiki ahubwo azi kwirwanya akibona hanze yatsinzwe. Aho akoreye politiki yatsinze he? Yageze kuki yabwira abandi.

Jeanine 10/11/2014 14:27

Yageze kuki? Dukeneye umusaruro, kuvuga ngo baramwumva cg arazwi ni uko avuga menshyi akanashyenga ati ayinya!!! Ubu ibi ntitubikeneye.

Yewe mwese ni aya nda! 10/11/2014 14:56

Nkawe Vincent ibi bigambo uhuraguye aha bimaze iki? Twagiramungu atinyuka he? Ejo bundi bamubwira ngo naje mu mihango yo gushyira intwaro hasi mri FDLR yavuze iki? Ese azwi nande keretse ko azwiho ubucabiranya! Twagiramungu niba unamushigikye azapfa atabaye uwo ureketereza.

manon 10/11/2014 14:23

wari ubivuze neza ni uko uhise winyuramo!
niba Dismas ariwe yirukanye Abafransa, noneho Twagiramungu koko yabaye ingambanyi! nonese Dismas si produit ya Twagiramungu? uziko iyo abafransa baguma murwanda wenda niyo genocide itari kuba? abantu muzi kwinyuramo koko!