Imirambo ikomeje kugaragara mu kiyaga cya Rweru,umunyarwanda n’abarobyi b’abarundi batabwa muri yombi.

Publié le par veritas

Imirambo ikomeje kugaragara mu kiyaga cya Rweru,umunyarwanda n’abarobyi b’abarundi batabwa muri yombi.
Imirambo izanwa n’uruzi rw’Akagera ruyikuye mu Rwanda rukayiroha mu kiyaga cya Rweru kiri ku mupaka w’u Rwanda n’u Burundi ntabwo irahagarara. Ejo kuwa kabiri taliki ya 28/10/2014 indi mirambo ibiri yabonetse mu kiyaga cya Rweru. Iyo mirambo yagaragaye mu kiyaga cya Rweru yari yashangutse cyane. Abayobozi b’u Burundi bashatse gufata umurambo wari umaze kuboneka ngo bawushyingure basanze watwawe n’amazi, mu gihe barimo bawushaka bahise babona undi murambo nawo wangiritse cyane kuburyo nawo bananiwe kuwufata ngo bawushyingure, uwo murambo wa kabiri ngo bikaba bigaragara ko ari uw’umusore uri mu kigero k’imyaka 16 nk’uko byemezwa n’umunyamakuru wa BBC.
 
Uretse iyo mirambo ikomeje kugaragara mu kiyaga cya Rweru, hari ibimenyetso bikomeje kugaragara byerekana ko ikibazo cy’imirambo yatoraguwe mu kiyaga cya Rweru igashyingurwa i Burundi gishobora kuzakurura ibibazo bikomeye hagati y’ibihugu byombi. Kuwa kabiri taliki ya 28/10/2014 inzego zishinzwe umutekano z’igihugu cy’u Burundi zataye muri yombi umunyarwanda wari ufite icyuma gifata amafoto. Uwo munyarwanda akaba ari umwarimu mu ishuri rikuru rya KIST akaba yarinjiye i Burundi mu buryo butazwi, akaba yarafashwe amaze iminota 12 ari gufata amafoto y’ahantu imirambo yatoraguwe mu kiyaga cya Rweru ishyinguwe! Uwo munyarwanda ari mu maboko y’inzego zishinzwe umutekano I Burundi kugira ngo bamenye ibye.
 
Itabwa muri yombi ry’uyu munyarwanda mu gihugu cy’u Burundi riteye amakenga kuko hari abakomando bavuye mu gihugu cy’u Rwanda mu kwezi gushize baje kwiba iyi mirambo bakirukanwa batarabasha kuyikura aho iri, kuba uyu munyarwanda yagendaga afata amafoto mu gace gashyinguyemo iyi mirambo ni ikimenyetso cyerekana ko hari igikorwa kiri gutegurwa cyo kuzajya kwiba iriya mirambo bazi neza inzira bazanyuramo n’uburyo aho ishyinguye harinzwe. Igikomeje gutera ubwoba abanyarwanda ni uko igihugu cy’u Burundi cyavuze ko kizakira neza inkunga yose y’amahanga azayifasha kumenya umwirondoro nyawo w’abo bantu bishwe dore ko iperereza ry’ubutabera bw’i Burundi ryamaze kwemeza ko iyo mirambo yavuye mu Rwanda!
 
Mu gihe imirambo ikomeje kugaragara mu kiyaga cya Rweru , abasilikare b’u Rwanda bafashe abarobyi b’u Burundi n’amato yabo babajyana mu Rwanda babashinja ko barimo barobera mu mazi y’u Rwanda, abo barobyi bageze mu Rwanda babamarana umunsi wose baza kubarekura ku mugoroba ariko buri murobyi bakaba baramuciye amafaranga ahwanye n’ibihumbi 11 by’amafaranga y’u Rwanda. Biragaragara ko u Rwanda ruri kugerageza kwirukana abarobyi b’abarundi ngo batagera mu mazi y’u Rwanda kuko abo barobyi iyo babonye imirambo bahita babivuga ariko abarobyi b’abanyarwanda bo bakirinda kugira icyo bavuga kuko bahita bicwa. Kubuza abarobyi b’u Burundi kugera mu mazi y’u Rwanda biteye amakenga y’uko muri ayo mazi y’u Rwanda hari imirambo myinshi bashaka guhisha.
 
Ikibazo cy’imirambo ikomeje kugaragara mu kiyaga cya Rweru cyagombye guhagurutsa amahanga yose kuko aho ibintu bigeze bigaragara ko ari génocide iri gukorwa mu ibanga mu Rwanda amahanga arebera ntagire icyo abikoraho.
 
Iyi nkuru tuyikesha BBC

Commenter cet article

MAKENGA 30/10/2014 16:18

Amaraso arasama! Imyaka 20 irashize abantu bicwa, ikiremwa muntu gihohoterwa bikabije mu Rwanda! Ababikora baribesya ntabwo bazamaraho abanyarwanda. Kwibeshya ko hari ushobora kumaraho ubwoko bumwe mu Rwanda ntibizashoboka niyo bakoresha imyaka 100! Mubareke bisige amaraso amaherezo bazabibazwa.