19H30 : Mu itangazo yatangiye mu bwihisho yibereyemo, Perezida wa Burukina Faso Blaise Compaorè yatangaje ko asheshe guverinema y'igihugu cye, akaba yatangaje umukwabo mu gihugu nk'uwo mu gihe cy'intambara; akaba yasabye abahagarariye amashyaka atavuga rumwe n'ubutegetsi kugirana ibiganiro. Ikibuga cy'indege kirafunze, nta ndege zikigwaho nta nizigihagurukaho; radiyo y'igihugu na televiziyo birafunze. Abakurikiranira hafi ibibera muri Burukina Faso basanga kuba Blaise Compaorè yasheshe leta ye bigiye kurushaho guca intege ubutegetsi bwe!
16H50: Perezida wa Burukina Faso Blaise Compaorè yaburiwe irengero, kuri aya masaha ya nyuma ya saa sita ntabwo abantu bazi irengero rye kuko aho yagombaga kuba ari hose atagaragara ,ibyo bikaba byemezwa n'abanyamakuru benshi ndetse n'abahagarariye ibihugu byabo muri Burukina Faso. Blaise Compaorè akaba yaburiwe irengero nyuma y'aho mu rugo rw'umwe mu bavandimwe be hiciwe umutage arashwe isasu. Umwe mubarwanya ubutegetsi witwa Bénéwendé Sankara yabwiye itangazamakuru ko aho ibintu bigeze Blaise Compaorè agomba kuva kubutegetsi kugira ngo ituze rigaruke mubaturage! Abatavuga rumwe n'ubutegetsi bemeje ko bashyigikiwe n'abasilikare bakaba bateganyije imibonano n'abakuru b'ingabo kugira ngo barebe ikigomba gukorwa.
14H18: -François Compaorè, murumuna wa perezida wa Burukina faso Blaise Compaorè yafatiwe ku kibuga cy'indege cya Burukina faso agiye guhunga.
-Muri aya masaha ingabo za Burukina Faso zarekuye urufaya rw'amasasu ku bantu bari mu myigaragambyo, imirwano ikaba iri kubera mu marembo y'ingo y'umukuru w'igihugu cya Burukina Faso, muri iyo mirwano umuntu umwe amaze kuhasiga ubuzima.
-Ibiro by'ubuyobozi n'ikicaro cy'ishyaka rya perezida Blaise Compaorè biri mu mujyi wa kabiri mu bunini witwa Bobo Dioulasso bimaze guhabwa inkongi y'umuriro.
-Mu murwa mukuru wa Ouagadougou, ingoro y'inteko y'abadepite b'icyo gihugu yafashwe n'inkongi y'umuriro.
-Umuvugizi wa leta ya Burukina Faso yatangaje ko icyifuzo cyo guhindura ingingo ya 37 yo mu itegeko nshinga ibuza Blaise Compaorè kuzongera kwiyamamaza gihagaritswe, abadepite bakaba batagomba guhindura iyo ngingo.
Mu gitondo cyo kuri uyu wa kane taliki ya 30/10/2014 abantu benshi bigaragambya bashoboye kwinjira mu ngoro y’inteko ishingamategeko y’igihugu cya Burukina Faso iri mu murwa mukuru wa Ouagadougou. Abigaragambya bamenaguye inzugi, amadirishya n’ibindi bikoresho biri mu ngoro y’abadepite, icyo gikorwa cyakozwe n’abigaragambya mu rwego rwo kubuza abadepite b’icyo gihugu bari biteguye gutora itegeko ryemerera perezida w’icyo gihugu kuzongera kwiyamamaza, abigaragambya bamaze no kwigarurira radiyo y'igihugu.
Imodoka 18 zari imbere y’ingoro y’abadepite zatwitswe n’abigaragambya kimwe n’imodoka zari ku kibuga cyo hanze nazo zanginjwe bikomeye, muri aka kanya twandika iyi nkuru ingoro y’abadepite ba Burukina Faso yafashwe n’inkongi y’umuriro hanze yayo hakaba hari kugaragara umwotsi mwinshi cyane w’umukara! Indege ya kajugujugu iri kugenda hejuru y’ingoro y’abadepite b’icyo gihugu.
Abadepite bashyigikiye perezida Blaise Compaorè bashoboye kwihisha n’ubwo aho bihishe hatatangajwe, abashinzwe umutekano bashoboye kurasa imyuka iryana mu maso ariko baza kuganzwa n’abigaragambya nabo barahunga. Urubyiruko rushyushye cyane nirwo ruri imbere y’abigaragambya rukaba rwaririmbaga indirimbo zivuga ko ruje kubohoza ingoro y’abadepite ba Burukina Faso.